Mmọ Ẹma Ẹsọn̄ọ Ẹda ke Ini Ukọbọ Nazi

UKO uko nsọn̄ọnda eke Mme Ntiense Jehovah ke Nazi Germany ọwọrọ ada ata isio isio ye idaha oro mme ufọkabasi Christendom ẹkedade. Akwa ekpep ukpepn̄kpọ mbụkeset oro, John Weiss, etịn̄ emi ke n̄wed esie oro Ideology of Death. Enye ewet ete:

“Ke 1934 ufọkabasi Evangelical ama ọsọn̄ọ eyịre nte ke ana ‘Ido Ukpono Lutheran adara’ mbon Nazi, onyụn̄ ọnọ ‘Ọbọn̄ Abasi’ ekọm ke ndinọ mbon Germany ‘ọbọn̄ mme mbọn̄ oro odotde ukpono ẹnyụn̄ ẹkemede ndiberi edem.’ . . . Bishop Protestant kiet ama ewet ọnọ ọkwọrọ ederi esie ete, ‘Abasi ọkọdọn̄ [Hitler] edi.’” Weiss aka iso ete: “Ufọkabasi Methodist mbon Germany . . . ama enyịme ye Bishop Dibelius nte ke Hitler ama anyan̄a Germany osio ke edinam ukpụhọ ukara Bolshevik oro ekekperede, adade emem ye idaha oro enyenede iwụk edi . . . Ufọkabasi Mormon ama eteme mme andibuana ke enye ete ke ndibiọn̄ọ Hitler ekedi edibiat ibet Mormon.” Ndien enye adian ete: “Ẹma ẹsian mbon Catholic nte ke ndisụk ibuot nnọ obufa ukara edi edisana utom, edinam oro owo mîketreke idem ke mme ọkwọrọ ederi ẹma ẹkefiọk ọkpọsọn̄ ibak oro ẹkenamde ke edem usiahautịn.”

Nso kaban̄a Mme Ntiense Jehovah? Prọfesọ Weiss owụt ete ke “nte otu, Mme Ntiense Jehovah kpọt ẹkesịn nditiene mbon Nazi.” Ẹma ẹsịn ediwak tọsịn ke otu mmọ ke ufọk-n̄kpọkọbi, Prọfesọ Weiss aka iso ete, “edi ẹkpekesana Ntiense ekededi oro ẹkenọde aka itienna ekikere ẹyak n̄kukụre ke ndisịn ubọk ke n̄wed ukan̄ mbuọtidem esie.”

Kaban̄a nsọn̄ọnda Mme Ntiense Jehovah, Prọfesọ Weiss etịn̄ ete: “Uwụtn̄kpọ mmọ owụt ọkpọsọn̄ ubiere ye odudu oro ntọn̄ọ ntọn̄ọ Ido Ukpono Christ ekenyenede mbemiso edikabade ndi n̄ka ye edisịn idem ke mme mbubehe n̄kaowo ọkọsọn̄de ubọk akan udọn̄ edidu uwem unana edikan̄ mbuọtidem. Nte pastọ Protestant kiet ekewetde aban̄a mmọ, ‘Idịghe ikpọ ufọkabasi, edi mbon oro ẹdọkde mmọ edidọk ye mme owo oro ẹsịnde ke ndek ẹkedi mbon oro ẹkesọn̄ọde ẹda ẹbiọn̄ọ ifụtesịt Nazi, ẹkenyụn̄ ẹnyenede uko ekem ndibiọn̄ọ ukeme ekededi ndinam ẹkan̄ mbuọtidem mmọ.’”