Ndọ Unana Ebuana Idan̄?

KE NDIDOMO ndinam ikọ oro ẹdọhọde ke Mary ekedi eyenan̄wan emi mîkọfiọkke erenowo ke nsinsi ekekem ye ndọ esie ye Joseph, ediwak mme ewet mbuwed ye mme odom n̄kpọ ẹwụt Joseph nte owo oro ama ọkọsọn̄. Mmọ ẹnọ ekikere ẹte ke Joseph ekenen̄ede etie nte andikpeme Mary akan ndidi ebe. Edi Pope John Paul II ọnọ isio isio ekikere ke ndondo emi aban̄a n̄kpọ emi. Enye ọdọhọ ete ke Joseph “ikedịghe akanieren ini oro.” Utu ke oro, “mfọnmma esịtidem esie, kpa mfri otode Abasi, akanam enye odu uwem ndọ esie ye Mary ye ima unana ebuana idan̄.”

Edieke Mary okoyomde ndidi eyenan̄wan oro mîfiọkke erenowo ke nsinsi, ntak emi enye okodụkde ediomi ndọ? Pope ọbọrọ ete: “Ẹkeme ndidọhọ ke ini mmọ ẹkedụkde ediomi ndọ ke Joseph ye Mary ẹma ẹdiọn̄ọ ẹban̄a uduak edidu uwem nte eyenan̄wan emi mîfiọkke erenowo.”

Nte ededi, Bible etịn̄ aban̄a n̄kpọ emi ke isio isio usụn̄. Mbụk Matthew ọdọhọ ete ke Joseph “ikenyeneke ebuana idan̄ ndomokiet ye enye tutu enye aman eyeneren.” (Matthew 1:25, New American Bible Catholic, sịghisịghi ubọkn̄wed edi eke nnyịn.) Ke Jesus ama akamana, mbọbọ ndọ Joseph ye Mary ikedịghe eke unana ebuana idan̄ ke baba usụn̄ kiet. Uyarade kiet kaban̄a emi edi nte ke nte ini akakade ke mbụk Gospel, ẹwụt Jesus nte enyenede nditọeka iren ye iban.—Matthew 13:55, 56.

Ntem, ke adan̄aemi Bible ọdọhọde ete ke Mary ekedi eyenan̄wan emi mîfiọkke erenowo ke ini enye akamande Jesus, isọn̄ ndomokiet idụhe ndidọhọ ke enye okodu uwem nte eyenan̄wan emi mîfiọkke erenowo ke nsụhọ ini uwem esie ye Joseph.