“Enye Edi Mfọnn̄kan Obufa Testament Emi Ẹmịn̄de Ikọ ke Nsio Nsio Usem Oro Odude”
ORO edi nte Dr. Jason BeDuhn etịn̄de aban̄a The Kingdom Interlinear Translation of the Greek Scriptures. Enye anam an̄wan̄a ete:
“Ami ndisụk n̄kụre edinọ ukpep edi oro ke Ikpehe Ukpepn̄kpọ Ido Ukpono eke Ufọkn̄wed Ntaifiọk Indiana, Bloomington, [U.S.A.] . . . Emi edi ukpep ẹnọde akpan akpan ke mme Gospel. Un̄wam mbufo okodụk edi ke uduot The Kingdom Interlinear Translation of the Greek Scriptures ẹmi nditọ ufọkn̄wed mi ẹkekamade nte kiet ke otu n̄wed ukpepn̄kpọ otu nditọ ufọkn̄wed oro. N̄kpri eboho n̄wed ẹmi ẹkedi ata ọsọn̄urua n̄kpọ ẹnọ ukpepn̄kpọ oro ẹnyụn̄ ẹwọrọ etop ke otu nditọ ufọkn̄wed mi.”
Ntak emi Dr. BeDuhn akamade edikabade Kingdom Interlinear ke ukpepn̄kpọ akamba ufọkn̄wed esie? Enye ọbọrọ ete: “Ke nditịn̄ ibio ibio, enye edi mfọnn̄kan Obufa Testament emi ẹmịn̄de ikọ ke nsio nsio usem oro odude. Ami ndi eyen ukpepn̄kpọ Bible oro ama ọkọbọ ukpep, emi mmehede ye uwetn̄kpọ ye mme n̄kpọutom oro ẹkamade ke ukpepn̄kpọ Bible eyomfịn, ndien, kamse, ami ndịghe kiet ke otu Mme Ntiense Jehovah. Edi mmọfiọk eti n̄wed ke ini n̄kụtde kiet, ndien ‘Kọmiti Ukabade Bible New World’ mbufo etịm anam utom esie. Edikabade eke Ikọmbakara mbufo emi ẹmịn̄de ikọ ke nsio nsio usem edi nnennen onyụn̄ enen̄ede odu ke n̄kemuyo tutu enye onụk andikot enen̄ede ekere aban̄a ufan̄ oro ẹdude ke edu usem, ido, ye ekikere ererimbot oro ẹkesemde usem Greek ye eke nnyịn. ‘New World Translation’ mbufo edi ata eti, ata ata usụn̄ edikabade ikọ emi efepde mme nsunsu usụn̄ ukabade ikọ ke enye nditiene usem Greek ketket. Enye, ke ediwak usụn̄, ọfọn akan mme edikabade oro ẹkụtde unen ẹkan ẹmi ẹkamade mfịn.”
Mme Ntiense Jehovah ẹmịn̄ The Kingdom Interlinear Translation of the Greek Scriptures man an̄wam mbon oro ẹmade Ikọ Abasi ẹmehe ye akpasarade uwetn̄kpọ usem Greek eke Bible. Enye esịne The New Testament in the Original Greek ke page n̄kan̄ ubọk ufien (emi B. F. Westcott ye F. J. A. Hort ẹketịmde). Ẹkụt ata ata usụn̄ edikabade Ikọmbakara ke idak uwetn̄kpọ usem Greek. Ke ekpri ufan̄ oro odude ke ikpehe ubọk nnasia edi New World Translation of the Holy Scriptures, emi ayakde fi odomo edikabade emi ẹmịn̄de ikọ ke nsio nsio usem ye edikabade Bible Ikọmbakara eke eyomfịn.