‘Anie Esịn Ifiọk Ke Mme Ikpehe Obubịt Enyọn̄’?
“KE INI mbufo ẹkụtde idiọk enyọn̄ ọwọrọde ke edem usop-utịn, idaha oro mbufo ẹte, Edịm ke edi; ndien osu ke uyo mbufo. Ke ini ofụm usụk onyụn̄ abarade, mbufo ẹte, Eyo oyofiop eti-eti; ndien ọwọrọ kpasụk ntre.” Mme ikọ Jesus ẹmi, oro Luke andiwet Gospel ekewetde, ẹdi uwụtn̄kpọ edibem iso ntịn̄ idaha eyo nte ẹkesinamde ke Palestine eset. (Luke 12:54, 55) Ke ndusụk idaha, mbon eset ẹma ẹsikeme ndikot mme idiọn̄ọ nnyụn̄ mbemiso ntịn̄ nnennen se iditịbede ke ekpri ibio ini.
Mfịn, mme ekpepn̄kpọ mban̄a idaha eyo ẹkama mme awak-n̄kukọhọ n̄kpọutom, utọ nte mme satellite ẹmi ẹsan̄ade ẹkanade isọn̄, Doppler radar, ye mme okopodudu kọmputa, ndida ndomo idaha eyo ke anyan ini. Edi se mmọ ẹbemde iso ẹtịn̄ isiwakke ndidi nnennen. Ntak-a?
Ediwak ntak ẹnam edi ọkpọsọn̄ n̄kpọ ndibem iso ntịn̄ nnennen idaha eyo. Ke uwụtn̄kpọ, mbabuat ukpụhọde ke nte eyo ofiopde, mbịtmbịt ofụm, nte ofụm ọsọn̄de, ye usọp ofụm ye ebiet emi enye ofụmede aka ẹkeme ndida mme mfịna ndi. Adianade ye ẹmi edi esen esen usụn̄ oro utịn, obubịt enyọn̄, ye inyan̄ibom ẹnamde n̄kpọ, emi ntaifiọk mîfiọkke ọyọhọ ọyọhọ kan̄a. Ke ntak oro, edibem iso ntịn̄ idaha eyo osụk edi ifiọk ntaifiọk oro mînenke ima.
Esisịt ifiọk oro owo enyenede aban̄a idaha eyo eti nnyịn aban̄a mme mbụme oro Job okobụpde ete: “Anie n̄ko obon ntọi mbara? Ice oto ke idịbi anie? . . . Nte emekeme ndimenede uyo fo ke enyọn̄, man ata ediwak mmọn̄ ofụk fi? . . . Anie esịn ifiọk ke [mme ikpehe obubịt enyọn̄, mîdịghe anie ada asian ọnọ n̄kpọntịbe ikpaenyọn̄, NW]? Anie ekeme ndibat mbubịt enyọn̄ ke ifiọk? Anie ekeme ndin̄wan̄a ikpa-mmọn̄ heaven?”—Job 38:28-37.
Ibọrọ ke kpukpru mbụme ẹmi edi, Idịghe owo edi edi Jehovah Abasi. Ih, inamke n̄kpọ m̀mê ekeme nditie nte mme owo ẹnyene ifiọk adan̄a didie, ọniọn̄ Andibot nnyịn enen̄ede okon̄ akan. Edi ata ima ke n̄kan̄ esie ndisịn ọniọn̄ esie ke Bible nnọ nnyịn, man otodo nnyịn inam usụn̄ nnyịn okụt unen.—Mme N̄ke 5:1, 2.