“Ẹniọn̄ Nte Cedar Ke Lebanon”

MME eto ẹdiọn̄ọde nte Arz Ar-rab, ọwọrọde “Mme Cedar Ọbọn̄” ẹkọri ke ndiye ikpọ obot Lebanon. Ẹtịn̄ n̄kpọ nte utịm ike 70 ke Bible—emi awakde akan nte ẹtịn̄de ẹban̄a eto efen ekededi—ẹban̄a ndiye ikpọ eto ẹmi ẹsisehede kpukpru ini mi, ẹmi inikiet ko ẹkeyọhọde obot oro.

Ke nditịn̄ mban̄a mme ikpọ cedar eke Lebanon ẹmi, N̄wed Abasi ada mme utọ ikọ nte ‘ediye’ ye “ata akamba.” (Ikwọ Solomon 5:15; Ezekiel 17:23) Nte cedar okponde ye nte obukpọk esie esibịghide anam ediwak owo ẹma ndida enye mbọp ufọk ye nsụn̄ikan̄ ọkọrọ ye mme n̄kpọ mbana ufọk. Ufuọn̄ ye ufiop oro ndatndat uduot eto emi enyenede edi se inen̄erede idemede owo udọn̄, ndien enye ndinyene ediwak imịn ọbiọn̄ọ enye ndibu ye n̄ken̄e unam ndita enye. Mme eto ẹmi ẹniọn̄i ẹnyụn̄ ẹkponi ke n̄wọrọnda usụn̄, ẹniọn̄de ẹsịm mita 37 ẹnyụn̄ ẹbarade ke mita 12, ndien mmọ ẹnyene nnyan, n̄kpọsọn̄ orụn̄. Eyịghe idụhe mme ekpep n̄kpọ mban̄a akai eyomfịn ẹtịn̄de ẹban̄a enye nte “akakan ubọn̄ ke otu mme eto”!

Ezekiel andiwet Bible ekemen Messiah ke ntịn̄nnịm ikọ odomo ye nsehe cedar, emi Abasi ke idemesie ọkọtọde adan̄aoro. (Ezekiel 17:22) Ke akpanikọ, ikọ Hebrew oro adade ọnọ “cedar” oto akpasarade ikọ oro ọwọrọde “ndisọn̄ọ nda.” Mfịn, oyom mme anditiene Messiah, Jesus Christ, “ẹsọn̄ọ ẹda ke mbuọtidem, . . . ẹkop odudu,” ukem nte anyan, okopodudu cedar. (1 Corinth 16:13) Didie ke ẹkeme ndinam emi? Ebe ke ndisọn̄ọ mbiọn̄ọ mme edu oro mîdịghe eke Christian nnyụn̄ nyọ ye iwụk ke usụn̄ edinam nsọn̄ọnda ye uten̄e Abasi. Ẹtịn̄ ẹban̄a mbon oro ẹnamde ntre ke Bible nte “ndinen owo . . . [ẹmi] ẹkọride ẹniọn̄ nte cedar ke Lebanon.”—Psalm 92:12, The New English Bible.