Ndidiana Kiet Ke Mfọnn̄kan Usụn̄ Uwem
Edieke ibatowo ke ererimbot akade iso ndikọri, ibịghike mme owo ẹyesịm biliọn itiokiet ke isọn̄. Okposụkedi kpukpru owo ẹtode ete ete kiet, etie nte ata ediwak owo inyịmeke ke mmimọ idi mme andibuana ke ubon ofụri ekondo ndien ke inyene ndinam ibat nnọ enyene-ọniọn̄ ye ima ima Andibot. Unana edidianakiet ye utọk ke ufọt mme idụt, mme orụk, ye mme ido edinam ẹdi n̄kpọsọn̄ uyarade oro ẹsọn̄ọde mme mfụhọ mfụhọ idaha ẹmi.
KE IKEREDE iban̄a mme idaha ẹmi ẹdude ke ererimbot ke emi, edidianakiet eke ofụri ekondo ekeme nditie nte utịtmbuba oro owo mîkemeke ndisịm. The Columbia History of the World ọdọhọ ete: “Ererimbot idahaemi inyeneke obufa ekikere ndomokiet ndinọ, baba kiet, ke ata akpan mbụme aban̄ade nte ẹkemede ndidu uwem ọtọkiet.”
Nte ededi, ndida edidianakiet ndi ke otu mme andidụn̄ isọn̄ iyomke obufa ekikere. Ẹwụt usụn̄ adade esịm edidianakiet ke Edisana N̄wed Abasi. Enye ọkọn̄ọ ke ndituak ibuot nnọ Enye Emi okobotde isọn̄ ye kpukpru uwem oro ẹdude ke enye. Ata edidianakiet ke ekikere, uduak, ye usụn̄ uwem ododu ke otu ikọt Abasi. Ke ẹwakde ẹbe miliọn ition ye ubak ke idụt 233, mmọ ẹdiana kiet ke edinịm ke akpanikọ mmọ nte ke usụn̄ uwem Abasi edi mfọnn̄kan usụn̄. Ukem nte andiwet psalm, mmọ ẹbọn̄ akam ẹte: “Teme mi usụn̄ fo, O Jehovah; nyasan̄a ke akpanikọ fo: kọt esịt mi abak enyịn̄ fo.”—Psalm 86:11.
Prọfet Isaiah ama ebem iso etịn̄ ke anyan ini ko aban̄a edidian mme owo ọtọkiet ke edisana utuakibuot. Enye ekewet ete: “Ama ekem ke utịt eyo, obot ufọk Jehovah oyowụhọ ke enyọn̄ ikpọ obot, onyụn̄ okon̄ akan n̄kpri obot; ndien kpukpru mme idụt ẹyebụn̄ọ ẹdụk ke esịt. Ndien ediwak obio ẹyeka ẹkedọhọ, ẹte, Mbufo ẹdi, nnyịn idọk ke obot Jehovah, ke ufọk Abasi Jacob; ndien enye eyekpep nnyịn ido esiemmọ, nnyịn iyonyụn̄ isan̄a ke usụn̄ esie.”—Isaiah 2:2, 3.
Edidianakiet eke Mme Ntiense Jehovah edi n̄wọrọnda. Ke se ibede esop 87,000 ke ofụri ererimbot, mmọ ẹdia ukem udia eke spirit ke mme mbono esop mmọ kpukpru urua. (Matthew 24:45-47) Nte ededi, ọtọn̄ọde ke ufọt ufọt 1998 tutu esịm ntọn̄ọ ntọn̄ọ 1999, Mme Ntiense ẹma ẹwụt edidianakiet mmọ ke usụn̄ en̄wen—ebe ke ndisop idem ke mme Mbono “Usụn̄ Uwem Abasi” mmọ eke usen ita ke ofụri ererimbot. Ke idụt 13, mboho ẹmi ẹma ẹsịne akwa udịmowo ẹketode nsio nsio idụt ndien ẹkekot mmọ mbono mme idụt. Ẹkekot mbon eken mme mbono district. Edi kpukpru mbono ẹmi ẹkeneme ukem ndutịm nti n̄kpọ eke spirit.
Ekeye didie ntem ndikụt mme andidụk mbono oro ẹkopde inemesịt ẹnyụn̄ ẹsịnede ọfọn̄ ediye ediye ẹbụn̄ọde ẹdụk mme efe mbono ye mme an̄wa mbre man Jehovah ọnọ mmọ ukpep! Uwụtn̄kpọ kiet ekedi ikọ owo emi okodụkde mbono mme idụt emi ẹkenịmde ke Michigan, U.S.A. Enye ọkọdọhọ ete: “Ekedi ata n̄kpọ idatesịt ndikụt nditọete nnyịn ẹtode kpukpru ikpehe ererimbot—Czech Republic, Barbados, Nigeria, Hungary, England, Holland, Ethiopia, Kenya, ye ediwak idụt eken—ẹfatde kiet eken! Ekedi ediye n̄kpọ ndikụt nditọete ẹdụn̄de ọtọkiet ke edidianakiet, mmọn̄eyet idatesịt asiahade mmọ ke enyịn ke ntak ima oro mmọ ẹnyenede ẹnọ kiet eken ẹnyụn̄ ẹnyenede ẹnọ akwa Abasi mmọ, Jehovah.” Ibuotikọ oro etienede oyodụn̄ọde ndutịm mbono oro ediwak miliọn owo ẹkedarade ke ofụri isọn̄.
[Ebiet Ẹdade Ndise Ẹto ke page 3]
Mountain High Maps® Copyright © 1997 Digital Wisdom, Inc.