Ndikan Mme N̄kpọ-Ata eke Edidi Ete ye Eka

NDIBỌK nditọ mfịn, akpan akpan mbon oro ẹdude ke mme isua uyen, edi n̄kpọ-ata oro akamade ndịk ọnọ mme ete ye eka. The Gazette eke Montreal, Canada, ọtọt ete ke edidomo n̄kpọsọn̄ mmịn ye n̄kpọsọn̄ ibọk nse amakabade edi “ido mme uyen.” Enye ọsọn̄ọ owụt nte ke mme ete ye eka ẹnyene “mbiomo ndidu ke ukpeme kaban̄a mme ukpụhọde ke edu mme uyen [mmọ].”

Nso ke mme ete ye eka ẹkpedori enyịn ndikụt nte idiọn̄ọ mme utọ mfịna ini uyen oro? Ndusụk idiọn̄ọ eke ikpọkidem, eke ntụk, ye eke ebuana otuowo oro Esop America Esede Aban̄a Edu Uyen anamde ẹdiọn̄ọ esịne n̄kaiso edikop mmemidem, ukpụhọde ke ido ye edu, edibiat ekese ini ke ubet oro ẹkọbide, edu nsọn̄ibuot, ye edimụm nte abuanade ke edinam ubiatibet.

Didie ke mme ete ye eka ẹkeme ndikpeme nditọ mmọ nsio ke utọ edidomo nse oro ye ndiọi utịp oro ẹsisụn̄ọde ẹto enye? Dr. Jeffrey L. Derevensky, eke Ufọkn̄wed Ntaifiọk McGill, enịm ke akpanikọ ete ke in̄wan̄în̄wan̄ nneme ye ndinam ukpono edem mbiba odu ke mme ntọn̄ọ ntọn̄ọ isua eyen ekeme ndinam mme mfịna ẹsụhọde ke ukperedem. The Gazette adian ete ke idem okposụkedi udọn̄ ndinyene ifụre oro okponde akan esiwụtde idem ke ini edibe ndụk akwa owo, mme uyen ẹka iso ndiyom “ndausụn̄, ibetedem, ndutịm ye ima emi ete ye eka mmọ ẹnọde.” Mme utịn̄ikọ ẹmi ẹsọn̄ọ n̄ke Bible kiet oro ọdọhọde ete: “Tịm teme eyenọwọn̄ nte ekemde ye usụn̄ esie: ke ini enye akabarede idem akani owo, enye idikpọn̄ke enye.” (Mme N̄ke 22:6) Abasi ọnọ mme ete ye eka item ete ẹdi uwụtn̄kpọ, nsan̄a, mme eneme-nneme, ye mme andikpep.—Deuteronomy 6:6, 7.