“Didie ke Nnyịn Ikeme Ndidemede Mme Ufọkabasi Nnyịn?”
MBỤME oro, emi magazine Catholic eke usem French oro Famille Chrétienne (Ubon Christian), okobụpde, idịghe n̄kpọ n̄kpaidem inọ ediwak owo. Cardinal Hume eke Britain akakam okot mme ufọkabasi “ikpọ mbon idap.” Ẹnọ ekikere nte ke mme otu ẹmi ẹdụn̄de ke okụre ufọkabasi ndikwọrọ ikọ nnọ mbon efen ẹdi usụn̄ nditre idap oro. Oku Italy kiet okot enye, “nnennen edida mbufa usụn̄ n̄kwọrọ ikọ.” Ke adan̄aemi pope ke ndondo emi esịnde udọn̄ ọnọ utọ usio-ukot oro, idịghe kpukpru owo ẹkụt ufọn edineme ido ukpono mmọ ye mmọ en̄wen.
Pigi Perini, andise n̄kpọ mban̄a ufọkabasi ke Milan, ama aka Africa ke ndondo emi, do owo n̄ka nun akasian enye ete: “Mmodu mi isua 40, ndien ndehede ntịn̄ mban̄a enyịn̄ Jesus mbak ndibiat ido mbon Africa.” Esenyịn ufọkabasi oro eberi ete: “Nnyịn itịn̄ke n̄kpọ aba iban̄a Jesus, ibuanake Jesus aba, ikwọrọke gospel aba!” Nte ededi, ye ediwak mbon efen, ukwọrọikọ edi akpan ubak uwem mmọ ye usụn̄ ndidu ke edidemede ke n̄kan̄ eke spirit. Pigi Perini enyịme ete: “Ke ini osobode owo iba nte ẹtịn̄de ẹban̄a Christ ke urua, m̀mê ẹmi ẹkamade Bible ke ubọk, afo edidọhọ idemfo ete: Sese, Mme Ntiense Jehovah!”
Ediwak miliọn owo ẹdara ndineme Ikọ Abasi ye Mme Ntiense Jehovah. Eyịghe idụhe nte ke Mme Ntiense ẹnam ndutịm ẹnọ mme nneme Bible ke n̄kann̄kụk mbufo. Kpa nte ekedide ke akpa isua ikie, mme ifịk ifịk Christian ẹmi ẹsịn udọn̄ ẹnọ kiet eken ndibuana ido ukpono mmọ ye mbon efen. Mme itie usop idem mmọ (ẹmi ẹkotde mme Ufọkmbono Obio Ubọn̄) ẹdi mme itie ẹmi ufiop ye itie ufan ẹdude. Ntak mûdụkke kiet ke otu mbono esop oro Mme Ntiense Jehovah ẹdiomide unyụn̄ use nte afo ekemede ndikan idap eke spirit?