Owo Sụk N̄kokon̄ Unam?
“Ndi se nnyịn inịmde ke akpanikọ kaban̄a ntọn̄ọ uwem anam ukpụhọde ekededi?”
N̄kaiferi isua 16 ke Brazil okobụp mbụme emi ke ntọn̄ọikọ utịn̄ikọ oro enye ọkọnọde ke ibuotikọ oro “Owo—Sụk N̄kokon̄ Unam?” (Humans—Just Higher Animals?) Andikpep esie okokot enye ete edinyene nneme ye otu nditọ ufọkn̄wed ke mbụme oro, ke andikpep oro ama ọkọbọ nsiondi Awake! eke June 22, 1998, ke ibuotikọ oro.
Uyen Ntiense oro ama owụt n̄kpọndịk emi odude ke ukpepn̄kpọ edito ke unam mforo owo oro ọkọn̄ọde ke oto-obot edinam. Ke uwụtn̄kpọ, ediwak owo ẹkere ẹte ke ukpepn̄kpọ edito ke unam mforo owo anam ndusụk owo ẹse ekọn̄ nte sụk ubak ndammana nsinsi en̄wan kaban̄a ubọhọ, emi an̄wamde ndiberede usụn̄ nnọ Ukara Fascism ye eke Nazi.
Eyen ufọkn̄wed oro ama owụt nte ke akwa ukpụhọde odu ke ufọt owo ye unam. Enye ọkọdọhọ ete: “Owo kpọt ekeme ndikọri idaha eke spirit. Owo kpọt odomo ndifiọk se uwem ọwọrọde ye uduak uwem. Owo kpọt okop editịmede esịt aban̄a n̄kpa, enyene udọn̄ ke nte enye akasan̄ade edidu, onyụn̄ enyene udọn̄ ndidu uwem ke nsinsi. Edi akpan n̄kpọ didie ntem nte nnyịn ibiat ini ndidụn̄ọde n̄kpọ efen efen kaban̄a nte nnyịn ikasan̄ade ididu!”
Andikpep ama otoro inem inem nneme oro. Enye ama ada uforo emi nneme oro ekenyenede akabuan ye akpanikọ oro nte ke uyen Ntiense emi esima ndikot n̄wed. Ẹdiọn̄ọ n̄kaiferi oro ke ufọkn̄wed nte enyene-ifịk andikot mme n̄wed ẹkọn̄ọde ke Bible nte Awake! ye Enyọn̄-Ukpeme.
Mme Ntiense Jehovah ẹnen̄ede ẹkere ẹban̄a odudu oro ukpepn̄kpọ edito ke unam mforo owo enyenede ke esịt ye ekikere mme uyen. Ke ntak emi, esop oro n̄kaiferi emi abuanade ama esịn udọn̄ ọnọ mme uyen ẹdide Mme Ntiense ndinọ mme andikpep ye nsan̄a ufọkn̄wed mmọ nsiondi magazine Awake! eke June 22, 1998. Ẹma ẹsuan n̄kpọ nte magazine 230 ke nsio nsio ufọkn̄wed ke obio oro. Etubom ke Ikpehe Ukpepn̄kpọ Ifiọk Ntaifiọk ke ufọkn̄wed kiet ama otobo magazine Awake!
Ih, se nnyịn inịmde ke akpanikọ kaban̄a ntọn̄ọ uwem anam ukpụhọde! Uyen emi ye mme ufan esie ẹwụt ẹte ke edinịm Andibot ke akpanikọ anam ata ukpụhọde ke uwem mmimọ.