Se Enye Atabade ke New York City

ẸWET idiọn̄ọ oro ẹkụtde mi in̄wan̄în̄wan̄ ke kiet ke otu ufọk umịn̄n̄wed Watchtower Society ke Brooklyn, New York, ọtọn̄ọde ke iduọk isua 1950. Enye esiti mme akaisan̄ ye mbon efen ẹmi ẹbede ete ẹkot Bible ke usen ke usen. Leta etienede mi, emi ẹkebọde ẹto ekpri eyenan̄wan emi edide Ntiense, owụt nte n̄kpọ editi emi enyenede ufọn.

“N̄keneme nneme ye nsan̄a ubet ukpepn̄kpọ mi mban̄a se n̄koyomde ndinam ke ini n̄kụrede akamba ufọkn̄wed. Mma ntọn̄ọ nditịn̄ mban̄a Bethel, kpa ibuot itieutom Mme Ntiense Jehovah, ndien enye ama enen̄ede okop nduaidem. Enye ama etịn̄ ọnọ mi ete ke imọ ikodụn̄ ke New York City ke ofụri uwem imọ. Ubon esie ikenen̄ekede inyene udọn̄ ke ido ukpono, edi kpukpru usenubọk ke ini enye esịnde iso ke window enye ama esikụt idiọn̄ọ emi ọkọdọhọde ‘Kot Ikọ Abasi kpa Edisana Bible ke Usen ke Usen.’ Ntre kpukpru usen enye ama esikot Bible esie mbemiso akade ufọkn̄wed.

“Ke ama ọkọwọrọ ọkpọn̄ obio oro, enye ọkọdọhọ ete ke n̄kpọ oro imọ itabade ke New York City edi nte ke ini imọ idemerede ke idap, imọ ikwe aba n̄kpọ oro ekesitide imọ ndikot Bible. Edi ke ntak idiọn̄ọ oro odude ke ufọk Watchtower, edikot Bible amakabade edi ido imọ, ntre imọ ke ika iso ndikot Bible ke usen ke usen!”

Nso ikpedi mfọnn̄kan usụn̄ ndida ntọn̄ọ usen akan ndikot itie kiet ke Ikọ Abasi! Ke ndinam ntre, afo nte eyịghe mîdụhe oyowụt esịtekọm ọnọ mme ikọ apostle Paul ẹmi: ‘Edisana N̄wed Abasi . . . ekeme ndinam fi ọwọrọ ọniọn̄ ọbọ edinyan̄a ke edibuọt idem ye Christ Jesus.’—2 Timothy 3:15-17.