Akpan Edinam Nte Afo Oyodụk?

KE AKPAN usen kiet ke se ibede isua 3,500 ẹmi ẹkebede, Jehovah Abasi ama anam ubon Israel kiet kiet oro ẹkedide ifịn ke Egypt ẹwot eyenerọn̄ m̀mê ebot ẹnyụn̄ ẹsịme iyịp esie ke obubọk enyịnusụn̄ ye ke mme itịm ufọk mmọ. Kpa ke okoneyo oro, Angel Abasi ama asan̄a ebe mme ufọk oro ẹkenịmde idiọn̄ọ ke utọ usụn̄ emi edi ama owot mme akpan ke mme ufọk kpukpru nditọ Egypt. Ekem ẹma ẹsana nditọ Israel ẹyak. Ke usenọfiọn̄ n̄kpọntịbe oro ke isua ke isua, mme Jew ẹma ẹsinịm usọrọ Passover.

Ndondo oro Jesus Christ okokụrede ndinịm akpatre usọrọ Passover esie ye mme apostle esie, enye ama ọtọn̄ọ udia oro edinamde ẹti n̄kpa uwa esie. Enye ama ayak uyo eke leaven mîdụhe ọnọ mme apostle esie onyụn̄ ọdọhọ ete: “Ẹbọ, ẹta; emi edi ikpọkidem Mi.” Ekem enye ama ayak cup wine ọnọ mmọ onyụn̄ ọdọhọ ete: “Mbufo kpukpru ẹda ẹn̄wọn̄; koro emi edi iyịp Mi, eke ediomi, emi ẹduọkde ẹban̄a ediwak owo, man ẹfen mme idiọkn̄kpọ mmọ.” Jesus ama ọdọhọ n̄ko ete: “Ẹnam emi nditi Mi.” (Matthew 26:26-28; Luke 22:19, 20) Ntre, Jesus ama owụk mme anditiene enye ete ẹnịm usọrọ n̄kpa esie emi.

Isua emi edifiak nti n̄kpọntịbe emi ọduọ ke Wednesday, April 19, ke utịn ama okosụhọde. Mme Ntiense Jehovah ke ofụri ererimbot ẹyesop idem ke akpan okoneyo emi ndinịm Editi emi ke ido oro Jesus okowụkde. Imọnọ fi ata ufiop ufiop ikot ndibuana ye nnyịn nte mme andida nse. Mbọk dụn̄ọde ye Mme Ntiense Jehovah ke n̄kann̄kụk kaban̄a nnennen ini ye ebiet emi ẹdinịmde akpan mbono emi.