Nti Utom Ẹtoro Abasi
MBON oro ẹmade Abasi ẹsidomo ndiwụt un̄wana eke spirit otode Ikọ esie, kpa Bible. Ke usụn̄ emi, mmọ ẹnam ewụhọ Jesus oro: “Yak un̄wana mbufo ayama ke iso owo, man mmọ ẹkụt nti utom mbufo, ẹnyụn̄ ẹtoro Ete mbufo emi odude ke heaven.” (Matthew 5:16) Ikọ ọkọrọ ye eti edu uwem ẹkeme ndinọ Abasi ubọn̄.
Mme Ntiense Jehovah ẹyom ndinem Abasi esịt ke ndinam n̄kpọ ke n̄kemuyo ye Bible ye ke ndidomo ndin̄wam mbon en̄wen ke n̄kan̄ eke spirit. Mmọ ẹnam oro idem ke mme idụt oro owo mîsịnke an̄wan̄wa utom ukwọrọikọ mmọ kan̄a ke n̄wed nte ekemde ye ibet. Ke ibuot obio kiet ke otu idụt emi, Mme Ntiense ẹsinịm ikpọ mbono eke isua ke isua emi owo 6,000 esịm 9,000 ẹsidụkde. Mmọ ẹsibọ ufọkmbono ke ukpeokụk ke okụre emi ẹsibrede mbre ẹnịm mme utọ mbono oro. Mbemiso mbono mmọ ke 1999, Mme Ntiense ke mme itie ikie ẹma ẹnam utom ọkpọsọn̄ ndinịm ufọkmbono oro asana nnyụn̄ nnam ndutịm ukwak utịn̄ikọ ye ediwak tọsịn akpakaha, nte mmọ ẹkenamde ke mme isua emi ẹkebede.
Kpukpru mben̄eidem emi ikedịghe edịbe. Mme akamautom okụre emi ẹma ẹkụt mme utom emi. Mmọ ẹma ẹkụt n̄ko nte ke, okposụkedi ibat mme andidụk akawakde esịm 15,666, kpukpru n̄kpọ ẹkesan̄a edifọn edifọn ndien Mme Ntiense oro ẹkenam n̄kpọ ke nde ke nde. Nte ẹkenamde itie oro enen̄ede asana ke mbono ama okokụre ama otụk mme akamautom oro n̄ko.
Mme akamautom oro ẹma ẹwụt esịtekọm ẹban̄a kpukpru emi ebe ke ndinịm Mme Ntiense akpa ke udịm mme owo oro ẹdinyenede ifet ndibọ itie oro ke ukpeokụk ke isua oro editienede. Edi mme akamautom oro ẹma ẹkam ẹnam se ikande oro. Ke July 15, 1999, mmọ ẹma ẹnọ kọmiti mbono oro enọ ndiwụt esịtekọm mmọ. Se ẹkewetde ke n̄kpọ ndudiọn̄ oro ekedi mme ikọ emi “esop Mme Ntiense Jehovah”—n̄kpọ oro owo mîkodorike enyịn iban̄a ke idụt oro ẹkpande utom unọ ukpep Bible.
Ke ofụri ererimbot ke 2000/2001, ẹdori enyịn ndikụt ediwak miliọn owo ẹdụkde mme Mbono District “Mme Anam Ikọ Abasi” eke Mme Ntiense Jehovah. Ebede ke ndidụk mbono oro, afo emekeme ndikụt ke idemfo nte mbon oro ẹsịnde ifịk ndinam se Bible ọdọhọde ẹsịnde idem ke nti utom oro ẹtorode Abasi.