Eti Ibuot Emi Otode Abasi—Didie ke Ẹwụt Enye?

‘ẸSE eti ibuot eyen-ubuene ke ndek, inyụn̄ ikopke uyo esie.’ Enyene-ọniọn̄ Edidem Solomon akada mme ikọ emi eberi mbụk aban̄ade enyene-ibuot eyen ubuene oro akanyan̄ade ofụri obio osio ke nsobo. Nte ededi, ke mfụhọ, ‘baba owo kiet iketịghi eyen ubuene oro.’—Ecclesiastes 9:14-16.

Mme owo ẹsiwak ndise mme ubuene ke usụhọde, idem ọkpọkọm mmọ ẹma ẹnam n̄wọrọnda n̄kpọ. Emi ekedi ntre ye Jesus. Isaiah ama etịn̄ ntịn̄nnịm ikọ aban̄a enye ete: “Owo ẹse enye ke ndek, ẹnyụn̄ ẹsịn enye; enye edi owo ukụt, onyụn̄ emehe ke mfụhọ.” (Isaiah 53:3) Ndusụk owo ẹkese Jesus ke ndek sia enye mîkenyeneke idaha m̀mê uwọrọiso nte mme adausụn̄ eke eyo esie. Edi, enye ama enyene eti ibuot oro okokponde akan eke anamidiọk owo ekededi. Mme owo ke obio emana Jesus ẹma ẹsịn ndinyịme nte ke “eyen anam-usọ” emi ama owụt utọ eti ibuot oro onyụn̄ anam mme utọ utom odudu oro. Nte ededi, oro ekedi akamba ndudue, koro mbụk oro aka iso ọdọhọ ete ke Jesus ‘ikanamke ediwak utom odudu do oto ke ntak unana mbuọtidem mmọ.’ Nso ntakurua ke oro ekedi ntem ọnọ mme owo oro!—Matthew 13:54-58.

Akpakam nnyịn inamke ukem ndudue oro. Jesus ọkọdọhọ ete: “Ubọk-utom Eti Ibuot ẹwụt ẹte Eti Ibuot enen.” Owo idaha idaha oro owo enyenede ke n̄kaowo ifiọk mbon oro ẹnamde utom Abasi ẹnyụn̄ ẹnọde eti ibuot otode heaven, edi ẹda “eti mfri” emi mmọ ẹsion̄ode—kpa mbuọtidem ye mme utom mmọ oro ẹkọn̄ọde ke Bible—ẹfiọk.—Matthew 7:18-20; 11:19.