“Ediye Ebot Ikọt”
EDIYE idịghe nsan̄a ikọenyịn̄ oro ediwak nnyịn ikpadade itịn̄ iban̄a ebot. Nnyịn imekeme ndikere mban̄a mme ebot nte nti unam oro ẹkperede ndidia n̄kpọ ekededi, oro ẹsinyụn̄ ẹnọde nnyịn inem inem unam ye ọnọ-nsọn̄idem mmọn̄eba—edi ọsọsọn̄ nnyịn ndikot mmọ ediye.
Nte ededi, Bible etịn̄ aban̄a n̄wanndọ nte “edima okoyo, ediye ebot ikọt.” (Mme N̄ke 5:18, 19, NW) Solomon, kiet ke otu mme andiwet n̄wed Mme N̄ke, ekedi ifịk ifịk anam-ndụn̄ọde mban̄a mme unamikọt Israel, ntre nte eyịghe mîdụhe enye ama enyene eti ntak ndida ikọ n̄ke emi ntịn̄ ikọ. (1 Ndidem 4:30-33) Eyedi enye, ukem nte ete esie David, ama esikụt mme ebot ikọt oro ẹkedude ke ikpehe n̄kan̄ En-gedi, oro ekperede mbenesụk Inyan̄ Inụn̄.
Otu n̄kpri ebot ikọt oro ẹdụn̄de ke n̄kpet n̄kpet Desat Judea ẹsika idịm En-gedi kpukpru ini. Sia edide n̄kukụre idịm oro ẹkemede ndiberi edem ke ikpehe nsatisọn̄ emi, En-gedi edi itie un̄wọn̄ mmọn̄ oro mme ebot ikọt ẹmade ke ediwak isua ikie. Ke akpanikọ ekeme ndidi enyịn̄ oro En-gedi ọwọrọ “enyịn idịm eyen ebot,” kpa uyarade nte ke nditọ ebot ẹsidu ke ikpehe emi kpukpru ini. Edi mi ke Edidem David ekedịbe ọbọhọ ukọbọ Edidem Saul, okposụkedi enye ekenyenede ndidụn̄ nte nyon̄ “ke otu ikpọ itiat ebot ikọt.”—1 Samuel 24:1, 2.
Ke En-gedi afo emekeme n̄ko ndikụt uman ebot ikọt, asan̄ade sụn̄sụn̄ osụhọde itiat itiat ebeden̄ nte enye etienede okpo ebot aka idịm oro. Do ekeme ndidi afo ọyọtọn̄ọ ndifiọk ntak ẹmende uman ebot ikọt ẹdomo ye n̄wan oro anamde akpanikọ. Sụn̄sụn̄ edu esie ye uku uku edinam esie n̄ko ẹwụt mme edu an̄wan. Ikọ oro “ediye” nte an̄wan̄ade etịn̄ aban̄a sụn̄sụn̄ ye uku uku edu ebot ikọt.a
Uman ebot ikọt enyene ndisọn̄ idem nnyụn̄ ntie sụn̄sụn̄. Nte Jehovah akasiande Job, ebot ikọt esiman eyen ke mme aba itiat, ke itiat itiat ndedịbe ebiet oro udia ekemede ndinana ndien mme idaha eyo ẹtịmde ẹfiop. (Job 39:1) Kpa ye mme mfịna emi, enye esikpeme nditọ esie onyụn̄ ekpep mmọ ndidọk enyọn̄ nnyụn̄ mfrọ ke otu ikpọ itiat mmemmem mmemmem nte enye esinamde. Uman ebot ikọt esikpeme nditọ esie n̄ko osio ke ubọk mme unam emi ẹsitade ekemmọ unam. Anam-ndụn̄ọde kiet ama okụt ebot ikọt kiet akan̄wanade ọbiọn̄ọ ntrukpom ke ubak hour, ke adan̄aemi eyen ebot okonụhọde odụk idak idịbi esie oyom ukpeme.
Ibanndọ ye mme eka ẹdide Christian ediwak ini ẹsinyene ndibọk nditọ mmọ ke idak n̄kpọsọn̄ idaha. Ukem nte ebot ikọt, mmọ ẹsiwụt n̄waidem ye unana ibụk ke ndise mban̄a mbiomo oro otode Abasi mi. Ndien mmọ ẹsidomo ndikpeme nditọ mmọ uko uko mbiọn̄ọ mme n̄kpọndịk eke spirit. Ntre, utu ke ndida ikọ n̄ke emi nsụhọde iban itie, Solomon ekenen̄ede odụri ntịn̄enyịn owụt sụn̄sụn̄ edu ye uyai an̄wan—mme edu eke spirit oro ẹsiwọrọde ẹda idem ke ata ọkpọsọn̄ n̄kann̄kụk.
[Mme Ikọ idakisọn̄]
a Nte ekemde ye The New Brown-Driver-Briggs-Gesenius Hebrew and English Lexicon, ke udọn̄ikọ emi ikọ Hebrew oro chen, oro ẹkabarede “ediye,” ọwọrọ ‘sụn̄sụn̄ m̀mê uku uku ido ye edinam.’
[Mme ndise ke page 30, 31]
N̄wanndọ ye eka oro edide Christian esiwụt nti edu eke spirit ke ndise mban̄a mme mbiomo oro Abasi ọnọde enye