Uyai Esịtidem Enyene Nsinsi Ufọn

“AKPARAWA ESIKERE KE UYAI EDI UKEM YE ETI IDO,” NTEM KE ANAM-AKPANIKỌ CHRISTIAN ORO AMA ỌKỌSỌN̄ ỌKỌDỌHỌ.

Ih, owo omodori nsọn̄uyo nte mîdotke ke uyai enyọn̄ idem ke anyan ini, ediwak ini adade esịm edinyene ukwan̄ ekikere mban̄a uyai esịtidem. Nte ededi, Andibot nnyịn esise se nnyịn idide ke ata esịtidem, inamke n̄kpọ m̀mê nnyịn itie didie ke enyọn̄ idem. Ke usụn̄ emi enye enịm eti uwụtn̄kpọ kaban̄a ekikere oro odotde. Nte Bible ọdọhọde, Abasi ke idemesie ọkọdọhọ ete: “[Nsehe] nte owo esede; koro owo esede enyịn, edi Jehovah ese esịt.”—1 Samuel 16:7.

Ata uyai owo oto Abasi, ndien Ikọ esie ayarade nte ke ini enye odụn̄ọrede nte owo enen̄erede odot, mme edu eke spirit ẹsinen̄ede ẹdi akpan n̄kpọ. Bible ọdọhọ ete: “Mfọnidem edi nsu, [uyai] onyụn̄ edi ikpîkpu edi ẹyetoro n̄wan eke abakde Jehovah.” (Mme N̄ke 31:30) Ke akpanikọ, uyai enyọn̄ idem ekeme ndidịp idiọk edu esịtidem. (Esther 1:10-12; Mme N̄ke 11:22) Okposụkedi uyai ikpọkidem ekemede ndikpa mmọn̄ nte ini akade, uyai esịtidem—nti edu ẹtode esịt—ẹkeme ndikọri nnyụn̄ mbịghi.

Ke ntre, owụt eti ibuot didie ntem ndikọri mme utọ edu nte ima, idatesịt, emem, ime, mfọn-ido, eti ido, edinam akpanikọ, ifụre ifụre ido, ye mfara ke idem! (Galatia 5:22, 23) Ke ndinam ntem nnyịn imekeme ndinyene uyai esịtidem, oro ke akpanikọ enyenede nsinsi ufọn.—1 Peter 3:3, 4.