Nte Edidianakiet Ido Ukpono Ekpere?
“Nnyịn imokụt akpan usen ke mbụk ufọkabasi nnyịn,” ntem ke Christian Krause, etieibuot Ufọkabasi Lutheran eke Ofụri Ererimbot ọkọdọhọ. Ukem ntre, Pope John Paul II ama etịn̄ aban̄a “akpan edinam ke ọkpọsọn̄ usụn̄ edifiak nnam ọyọhọ edidianakiet odu ke otu mme Christian.”
Edinam usịnubọk ke N̄wed Ediomi ke October 31, 1999, ke Augsburg, Germany, ndisọn̄ọ Ediomi Edidianakiet ke Ukpepn̄kpọ Utebeikpe, ekedemede mme ufiop ufiop ikọ emi. Ẹma ẹtịm ẹmek ini ye ebiet edinam oro. Ẹdọhọ ẹte ke October 31, 1517, Martin Luther ama ọkọn̄ mme ikọ mfan̄a esie 95 adian ke itịm akwa ufọkabasi ke Wittenberg, ke ntre ọtọn̄ọde Edinam Ukpụhọde Protestant. Nte ededi, Augsburg ekedi ebiet oro mbon Lutheran ẹkekotde mme akpan ukpepn̄kpọ mmọ ke 1530, kpa Ukpepn̄kpọ Augsburg, emi Ufọkabasi Catholic ekesịnde, osụn̄ọde ke akwa ubahade ke ufọt Ido Ukpono Protestant ye Ido Ukpono Catholic.
Nte ẹdọhọde, ndi Ediomi Edidianakiet emi eyedi enyene-iwụk usio-ukot ke ndikan ubahade ufọkabasi? Idịghe kpukpru mme andibuana ke ediomi oro ẹkenyene idotenyịn edidianakiet oro. Se ibede ekpep ukpepn̄kpọ ido ukpono Protestant 250 ẹma ẹsịn ubọk ke n̄wed ndiwụt unana edinyịme, ẹdụride owo utọn̄ ẹbana edidi se Ufọkabasi Catholic adade enyene. Mbon Protestant ẹma ẹkop iyatesịt n̄ko ke ini Ufọkabasi Catholic eketịn̄de aban̄a san̄asan̄a akam eben̄e edifen mme ndudue ke isua 2000, kpa ukem edinam oro ekesịnde ubahade ke n̄kpọ nte isua 500 emi ẹkebede. Ndien sia Ukpepn̄kpọ Augsburg ye ikọ mfan̄a Catholic eke Esop Trent ẹsụk ẹnyenede odudu, edidianakiet ikemeke ndidu.
Ubahade ye eneni oro ẹdude ke Christendom ẹkponi ẹkan se edisịn ubọk ke n̄wed ediomi edidianakiet ekededi ekemede ndinen̄ede. N̄ko-n̄ko, edidianakiet ke mbuọtidem ọkọn̄ọ ke mme ukpepn̄kpọ oro ẹnen̄erede ẹnyene isọn̄ ke Ikọ Abasi, kpa Bible. (Ephesus 4:3-6) Utu ke ndinyene edidianakiet ebe ke ediomi, ata edidianakiet oto ndikpep nnyụn̄ nnam se Abasi ọdọhọde nnyịn inam. Anam-akpanikọ prọfet Micah ọkọdọhọ ete: “Kpukpru mme idụt ẹyesan̄a ke enyịn̄ abasi mmọ; nnyịn iyonyụn̄ isan̄a ke enyịn̄ Jehovah Abasi nnyịn ke nsinsi-nsinsi.”—Micah 4:5.
[Ebiet Ẹdade Ndise Ẹto ke page 32]
© Ralph Orlowski/REUTERS/Archive Photos