Mme Andisobo Eto

KE MME ini Bible, ẹkeda eto nte ọsọn̄urua inyene. Ke uwụtn̄kpọ, ke ini Abraham ekedepde in̄wan̄ ndida mbụk edima n̄wan esie Sarah, ẹma ẹbat eto ẹdọn̄ ke n̄wed ediomi in̄wan̄ oro enye ekedepde.—Genesis 23:15-18.

Ukem oro mfịn, ẹda eto nte ata ọsọn̄urua inyene, ndien ofụri ererimbot ẹnọ ekese ntịn̄enyịn ke edikpeme mme akai. N̄wed oro State of the World 1998 ọdọhọ ete: “Ke adan̄aemi ediwak owo ke mme idụt edem edere ẹkerede ẹban̄a mme akai n̄kan̄ ufiop isọn̄, ekeme ndidi mmọ ifiọkke ite ke mme akai idụt mmọ oro ẹdude ke eti isọn̄ ẹnen̄ede ẹdu ntomo ntomo ẹnyụn̄ ẹdi se ẹfịnade ẹkan kpukpru akai.” Nso ifịna mme akai ke mme idụt edere edere Europe ye Edem Edere America? Ediwak owo ẹdọhọ ke edi edisobo mme akai, edi mme n̄kpọ en̄wen ẹdu oro ẹsobode mme ikọn̄ m̀mê n̄kọk eto kiet kiet, yak idọhọ ntre. Nso ke mmọ ẹdi? Edisabade ofụm ye idiọk mmọn̄ibọk oro ẹdepde. Mme usabaden̄kpọ emi ẹkeme ndibiat eto sụn̄sụn̄, ẹnamde utan̄kpọ ye udọn̄ọ ẹkeme ndisobo mmọ.

Ke ediwak iduọk isua, mme ese n̄kpọ mban̄a n̄kann̄kụk ye mbon eken oro emi otụkde ẹmetọt ẹte ke oyom ẹkpeme n̄kann̄kụk isọn̄. Ke iduọk isua 1980, ke ntaifiọk ke Germany ẹma ẹkedụn̄ọde utịp edisabade ofụm ye idiọk mmọn̄ibọk oro ẹdepde ke n̄kann̄kụk, mmọ ẹma ẹbiere ẹte: ‘Edieke owo mînamke n̄kpọ iban̄a, ke n̄kpọ nte isua 2000, mme owo ẹdikụt akai ke n̄kani ndise ye ke mme ndise senima kpọt.’ Nte enemde, ukeme oro isọn̄ enyenede ndifiak ndiọn̄ idemesie okpon tutu enye ke emi ọmọbọhọ ekese ke otu nsobo oro ẹkebemde iso ẹtịn̄ ẹban̄a mi.

Nte ededi, ke akpatre, edi Abasi edinam se ikponde ikan ndikpeme n̄kann̄kụk nnyịn. “Enye osio mmọn̄ ke ubet esie ebịt ikpọ obot,” onyụn̄ “anam mbiet etịbe ọnọ ufene, ye ikọn̄ emi owo anamde utom ke esịt.” Ndien enye ọn̄wọn̄ọ ‘ndisobo mmọ emi ẹsobode isọn̄.’ (Psalm 104:13, 14; Ediyarade 11:18) Edidi utịben̄kpọ didie ntem ke ini mme andidụn̄ isọn̄ ẹdikemede ndidara ererimbot oro usabaden̄kpọ mîdụhe ke nsinsi!—Psalm 37:9-11.