Se Mme Inuen Ẹkemede Ndikpep Nnyịn
“ẸSE mme inuen enyọn̄, ẹte mmọ itọhọ-tọ, inyụn̄ idọkke-dọk, inyụn̄ ibonke inịm ke ubet; ndien Ete mbufo emi odude ke heaven ọbọk mmọ. Nte mbufo ikponke ikan mmọ?” (Matthew 6:26) Jesus Christ eketịn̄ mme ikọ emi ke ọwọrọetop ukwọrọikọ esie ke obot oro ekperede Inyan̄ Galilee. Idịghe mme anditiene enye ikpọn̄ ẹkedu do. Akwa otuowo emi ẹkekemede ndikabade ndi mme mbet ẹkenyụn̄ ẹtode ke ofụri ikpehe obio oro ẹma ẹdu. Ediwak mmọ ẹkedi mme ubuene emi ẹkedade mbon udọn̄ọ ẹsọk Jesus ọkọk udọn̄ọ mmọ.—Matthew 4:23–5:2; Luke 6:17-20.
Ke ama akanam kpukpru mbon udọn̄ọ ẹkop nsọn̄idem, Jesus ama owụk ntịn̄enyịn ke udọn̄ n̄kpọ eke spirit mmọ, emi ekedide akpan n̄kpọ akan. Se ẹtịn̄de ke enyọn̄ emi edi kiet ke otu mme n̄kpọ oro enye ekekpepde.
Mme inuen enyọn̄ ẹmedu ke ata anyan ini. Ndusụk mmọ ẹsita n̄ken̄, mbon eken ẹsidia mfri ye mme n̄kpasịp. Edieke Abasi anamde akpakịp udia ntre ẹdu ẹnọ mme inuen, ke akpanikọ enye ekeme ndin̄wam mme asan̄autom esie ẹdide owo ẹnyene udia ke usen ke usen. Enye ekeme ndinam emi ebe ke ndin̄wam mmọ ẹnyene utom man ẹnyene okụk udia. Mîdịghe enye ekeme ndinam mmọ ẹkụt unen ke utọin̄wan̄. Amaedi ini mbabuat n̄kpọntịbe, Abasi ekeme nditụk esịt mme mbọhọidụn̄ oro ẹnyenede esịtmbọm ye mme ufan ndibuana udia mmọ ye mbon oro mînyeneke.
Ekese n̄kpọ efen efen ẹdu oro ikemede ndikpep nto editịn̄ enyịn nse uwem mme inuen. Abasi okobot mme inuen ye utịbe utịbe ntụk ndibọp efọk emi mmọ ẹkemede ndida mbọk nditọ mmọ. Kam se orụk efọk inuen iba. Enye oro ẹwụtde ke ubọk ufien edi efọk etụn̄etụn̄. Ẹbọp enye ke akwa itiat mîdịghe ẹbọp ke ibibene ufọk. Enyọn̄ utọ efọk oro edi akamba itiat, mîdịghe nte ẹwụtde ke ndise emi, nnyarakọm ufọk. Ẹda n̄kpri ebok mbat emi ẹbotde etie nte kọp ẹnam isọn̄ efọk inuen oro. Ayara ye uman ẹsidiana kiet ẹnam utom ọkpọsọn̄ ndibiom n̄kpri ebok mbat ndien ekeme ndida mmọ se ibede ọfiọn̄ kiet ndibọp efọk emi mma. Ekem mmọ ẹsida mbiet ye ntan̄ ẹbri ke esịt. Mmọ mbiba ẹsidiana kiet ẹbọk nditọ mmọ. Efọk ayara nsiat odu oro ke idak. Enyene-ifịk inuen Africa emi esida mbiet m̀mê ikọn̄ eto ọbọp efọk esie. Enye ekeme ndikụre efọk kiet ke usen kiet onyụn̄ ekeme ndibọp se ibede efọk 30 ke ndaeyo kiet!
Nso ke ikpep ito emi? Edieke Abasi ọnọde mme inuen utọ usọ ye akpakịp n̄kpọutom ntre ndida mbọp efọk, ke akpanikọ enye ekeme ndin̄wam mme asan̄autom esie ẹdide owo ndinyene ufọkidụn̄. Nte ededi, Jesus ama owụt ete ke oyom inam n̄kpọ efen edieke nnyịn iyomde Jehovah Abasi an̄wam nnyịn ndinyene mme n̄kpọ oro iyomde. Jesus ama ọn̄wọn̄ọ ete: “Ẹkam ẹbem iso ẹyom Obio Ubọn̄ Esie ye edinen ido Esie; ndien ẹyedian kpukpru n̄kpọ emi ẹnọ mbufo.” (Matthew 6:33) Afo emekeme ndikere ete, ‘Nso ibuana ke ndibem iso nyom Obio Ubọn̄ Abasi?’ Mme Ntiense Jehovah, oro ẹsuande magazine emi, ẹyema ndibọrọ mbụme oro.