Ndi Ikpenyene Ndiseme N̄kot Mme Angel Nyom Un̄wam?

NDI odot ndiseme n̄kot mme angel ke mme ini afanikọn̄? Ediwak owo ẹkere ke odot. Ke nditịm ntịn̄, New Catholic Encyclopedia ọdọhọ ete: “Owo esibọn̄ akam ọnọ . . . mme angel . . . n̄kukụre ke usụn̄ifiọk oro nte ke mmọ ẹkeme ndikpe Abasi ubọk nnọ nnyịn.” Nte nnyịn ikpenyene ndiseme n̄kot mme angel ndikpe Abasi ubọk nnọ nnyịn?

Ikọ Abasi asiak enyịn̄ mme anam-akpanikọ angel Abasi iba kpọt, Michael ye Gabriel. (Daniel 8:16; 12:1; Luke 1:26; Jude 9) Sia ẹsiakde enyịn̄ iba emi ke Bible, nnyịn imọfiọk ite ke angel kiet kiet edi san̄asan̄a owo eke spirit emi enyenede enyịn̄, idịghe ikpîkpu odudu emi mînyeneke idem. Kpa ye oro, mme angel eken ẹma ẹsịn ndisiak enyịn̄ mmọ. Ke uwụtn̄kpọ, ke ini Jacob okobụpde angel oro ekedide edise enye enyịn̄ esie, angel oro ikamaha ndisiak. (Genesis 32:29; Judges 13:17, 18) Owo isiakke udịm enyịn̄ mme angel ke Bible, ke ntem akpande mme owo ndinọ mmọ ntịn̄enyịn nte mîdotke.

Kiet ke otu utom mme angel edi ndimen mme etop Abasi nsọk mme owo. Ke nditịm ntịn̄, akpasarade ikọ Hebrew ye Greek oro ẹkabarede “angel” enen̄ede ọwọrọ “isụn̄utom.” Nte ededi, mme angel idịghe mme esịne-ufọt emi ẹmende akam mme owo ẹka ebekpo Andikon̄ N̄kan. Abasi ebiere ete yak ẹbọn̄ akam ẹnọ imọ ebe ke enyịn̄ Eyen imọ, kpa Jesus Christ, emi ọkọdọhọde ete: “Ete [ọyọnọ] mbufo n̄kpọ ekededi eke ẹdiben̄ede Enye ke enyịn̄ Mi.”—John 15:16; 1 Timothy 2:5.

Akananam Jehovah Abasi inanake ini ikaha ndikpan̄ utọn̄ nnọ nnyịn edieke nnyịn isan̄ade ikpere enye ke nnennen usụn̄. Bible ọnọ nsọn̄ọ emi: “Jehovah emekpere kpukpru mmọ eke ẹsemede ẹnọ enye, kpukpru mmọ eke ẹsemede ẹnọ enye ke akpanikọ.”—Psalm 145:18.