Ini Nduọkodudu Ndi Eyetie nte Ekekerede?
“[Akwa] Peter ọkọdọhọ ẹsidụk ederi Obufa Isua ke kpukpru ufọkabasi ke January 1. Ke adianade do, enye ama ọdọhọ ẹsida awawa ikọn̄ ẹbana obubọk enyịnusụn̄ esịt ubet, onyụn̄ owụk kpukpru mme andito Moscow ‘ẹsiwụt ke mmimọ imenem esịt ebe ke ndifiori n̄kọm’ kiet eken ke Obufa Isua.”—Peter the Great—His Life and World.
NSO ke afo odori enyịn ndikụt ke ini emi, oro ediwak owo ẹsikotde ini nduọkodudu? Mme owo ke ofụri ererimbot ẹdọhọ ke ini emi aban̄a Christmas, kpa usen emi ẹdọhọde nte Christ akamanade, edi ke enye abuana n̄ko usọrọ Obufa Isua. Ntre, enye edi anyan ini nduọkodudu. Mme ete ye eka ye nditọ ẹkeme nditre utom ye n̄wed ke ini emi, ntem emi ekeme nditie nte ata eti ini mme ubon ndidu ọtọkiet. Nte ededi, mbon en̄wen ẹkot ini emi “ini Christmas,” sia mmọ ẹyomde ndida ini emi ke isua n̄kpono Christ. Ekeme ndidi afo n̄ko ekere ke akakan ini ke isua edi emi.
Edide edi ini ndikpono Christ, ndidia uwem ye ubon, m̀mê mbiba, ata ediwak ebe, iban, ye nditọ ke ofụri ererimbot ẹsitetie ẹbet ini emi. Nso kaban̄a eke isua emi? Ndi enye edidi san̄asan̄a ini ọnọ ubon, onyụn̄ edi san̄asan̄a ini oro ẹdade ẹnam n̄kpọ Abasi? Edieke ẹnyenede mboho ubon, ndi enye edidi nte afo ekekerede, mîdịghe ndi edidi edikpu?
Mbon oro ẹsidoride enyịn ndikụt nte ẹdade ini emi ẹnam n̄kpọ ido ukpono, ẹsikụt ke nte ẹsidiade Christmas ye Obufa Isua isinyeneke n̄kpọ ndomokiet ndinam ye Christ. Utu ke oro, ini nduọkodudu emi esidi ikpîkpu ini edibọ enọ ye ini edidia usọrọ oro ekemede ndisịne edinam oro mîkponoke Christ, m̀mê akpan ini oro mbonubon ẹtode nsio nsio ebiet ẹnyọn̄ọ ẹdi ufọk. Ediwak ini, owo kiet m̀mê iba ndidia udia nnyụn̄ n̄n̄wọn̄ ọkpọsọn̄ mmịn mbe ubọk esibiat utọ mboho oro, onyụn̄ ada ọkpọsọn̄ eneni edi, emi esiwakde ndida afai ndi. Ekeme ndidi afo ama okụt oro, mîdịghe ekeme ndidi emi ama etịbe ọnọ fi.
Ke edide ntre, ekeme nditie fi nte ke ukpụhọde idụhe toto ke eyo Akwa Peter, kpa andikara Russia, oro nnyịn iketịn̄de iban̄a ke ntọn̄ọ. Sia nte ẹnamde n̄kpọ idahaemi afịnade ediwak owo, mmọ ẹtua ubaha nte ẹkpedade ini nduọkodudu ẹnen̄erede ẹtie ẹkere ẹban̄a mme n̄kpọ ido ukpono ẹnyụn̄ ẹdade ẹnyene inem inem mboho ubon. Ndusụk owo ẹkam ẹnen̄ede ẹsịn idem ẹyom nte ẹkpenamde ukpụhọde, ẹdọhọde ke ẹkpeda utọ ini nduọkodudu emi ẹkpono Jesus. Edi ndi ẹkeme ndinam ukpụhọde? Ndi emi eyenen̄ede ada ukpono ọsọk Christ? Ndi odu mme ntak en̄wen emi ẹkpenamde ẹse ini nduọkodudu emi ke usụn̄ en̄wen?
Man inyene eti ibọrọ, ẹyak ise n̄kpọ emi nte idụt kiet esede, koro akpana idụt emi enyene akpan ntak ndiwụt esịtekọm mban̄a ini nduọkodudu emi.