Nam Editie N̄kere Se Ekpepde Edi N̄kpọ Inemesịt
EKIKERE editie n̄kere se owo ekpepde ekeme ndinam ndusụk owo ndịk. Mmọ ẹkeme ndikere ke editie n̄kere se ikpepde edi ọkpọsọn̄ n̄kpọ oro oyomde owo etie ebiet kiet enen̄ede ekere n̄kpọ. Esịt ekeme ndibiom utọ mbon oro n̄ko edieke mmọ mîsitiehe ikere se ẹkpepde, akpan akpan ke ini ẹkotde ẹban̄a ufọn editie n̄kere se owo ekpepde. (Philippi 4:8) Nte ededi, nditie n̄kere akpanikọ oro ikpepde iban̄a Jehovah, nti edu esie, mme utịbe utịbe n̄kpọ oro enye anamde, se enye oyomde oto nnyịn, ye utịbe utịbe uduak esie, ekpenyene ndidi n̄kpọ oro ọnọde owo inemesịt. Ntak-a?
Jehovah Abasi edi Akakan Andikara ekondo ndien enye ke anam utom ọkpọsọn̄ man osu akwa uduak esie. (John 5:17) Kpa ye oro, enye enen̄ede ekere aban̄a se owo kiet kiet ke otu mme andituak ibuot nnọ enye ekerede. David, andiwet psalm, ama ọfiọk emi onyụn̄ ewet ke idak ndausụn̄ spirit Abasi ete: “O Jehovah, afo omodụn̄ọ mi, omonyụn̄ ọfiọk. Afo ọmọfiọk nte nsụhọrede ntie, ye nte ndahade nda; afo emetịm ọfiọk ekikere mi nsan-nsan.”—Psalm 139:1, 2.
Akpa ini oro owo okotde itien̄wed emi, enye ekeme ndida ikọ emi ke idiọk usụn̄. Enye ekeme ndikere ete, ‘Ọwọrọ Abasi ọfiọk kpukpru ndiọi ekikere oro ẹdude mi ke esịt kpa ye emi enye odude “nsan-nsan.”’ Nte ededi, utọ ekikere oro akam enyene ufọn n̄ko. Enye ekeme ndin̄wam nnyịn in̄wana ibiọn̄ọ ukwan̄ ekikere, ndien ke ini ndiọi ekikere ẹdụkde nnyịn esịt, nnyịn itịn̄ inọ Abasi, inyụn̄ idori enyịn ke enye eyefen ọnọ nnyịn edieke inyenede mbuọtidem ke uwa ufak Jesus. (1 John 1:8, 9; 2:1, 2) Nte ededi, nnyịn n̄ko ikpenyene ndifiọk ke Jehovah odụn̄ọde mme andituak ibuot nnọ enye ke eti usụn̄. Enye esikụt ini emi nnyịn idade esịtekọm ikere iban̄a enye.
Afo emekeme ndibụp ete, “Ndi Jehovah esinen̄ede ekere aban̄a kpukpru nti ekikere oro ata ediwak mme andituak ibuot nnọ enye ẹnyenede?” Ke akpanikọ, enye esikere. Jesus ama owụt ke Jehovah enyene udọn̄ ke idem nnyịn ke ndikọdọhọ ke enye ikam ifreke n̄kpri akadan̄abasi, onyụn̄ adian do ete: “Mbufo ẹmesọn̄ urua ẹkan ediwak akadan̄abasi.” (Luke 12:6, 7) Akadan̄abasi ikemeke nditie n̄kere mban̄a Jehovah. Ntre, edieke Jehovah ekerede aban̄a mmọ, adan̄a didie akan oro ke enye edikere aban̄a nnyịn onyụn̄ okop inemesịt ini ekededi oro itiede ikere iban̄a enye! Ih, kpa nte David, nnyịn imekeme ndibọn̄ akam emi ye mbuọtidem ite: ‘Yak ekikere esịt mi ẹnem fi esịt, O Jehovah, akwa itiat mi, ye andifak mi.’—Psalm 19:14.
Se prọfet Malachi akadade odudu spirit Abasi ewet edi uyarade efen oro owụtde ke Jehovah enen̄ede ekere aban̄a se mme anam-akpanikọ andituak ibuot nnọ enye ẹsikerede. Prọfet oro eketịn̄ ntem aban̄a eyo nnyịn: ‘Ndien mme abak Jehovah ẹneme kiet ye kiet: ndien Jehovah akpan̄ utọn̄, onyụn̄ okop, ẹnyụn̄ ẹwet n̄wed editi ke iso esie ẹnọ mme abak Jehovah ye mme ekere enyịn̄ esie.’ (Malachi 3:16) Nditi ke Jehovah ‘esikpan̄ utọn̄,’ ke ini itiede ikere iban̄a enye ekeme ndinen̄ede nnam enem nnyịn nditie n̄kere mban̄a enye. Mmọdo, nnyịn ikpakam itiene itịn̄ ikọ andiwet psalm emi: “Nyekere kpukpru se afo anamde, nyonyụn̄ n̄kere utom fo.”—Psalm 77:12.