Ndi Omoyom Ndinyene Nti Ufan?

ATA ediwak owo ẹyom ndinyene nti ufan. Ndibuana ifiọk n̄kpọntịbe fo ye mme n̄kpet n̄kpet nsan̄a ekeme ndinam uwem fo enem. Edi didie ke afo ekeme ndinyene eti ufan? Ke n̄kpọ nte isua 2,000 emi ẹkebede, Jesus ama owụt ke ima oro mîsan̄ake ye ibụk esinen̄ede anam owo okụt unen ke itie ebuana oro owo enyenede ye mbon en̄wen. Enye ekekpep ete: “Nte mbufo ẹyomde mme owo ẹnam ye mbufo, ẹnam kpasụk ntre ye mmọ.” (Luke 6:31) Ikọ emi, oro ẹsiwakde ndikot Mfọnmma Ibet, owụt ke man afo enyene mme ufan, ke iyomke afo edi ibụk, edi ke oyom atat ubọk. Ke nditịn̄ ibio ibio, ana etie ufan ufan edieke oyomde ndinyene ufan. Didie?

Owo ikemeke ndinyene n̄kpet n̄kpet ye edima ufan ke mbuari. Kamse, ufan idịghe ukem ye ọdiọn̄ọ. Ufan edi owo emi afo enen̄erede ama. Oyom ukeme man ọtọn̄ọ onyụn̄ aka iso enyene n̄kpet n̄kpet itie ebuana ye mme ufan. Esiwak ndiyom ufan ebem iso oyom ufọn ufan esiemmọ. Ufan esitiene ufan okop idatesịt onyụn̄ etiene ufan okop mfụhọ.

Afo owụt ke imọ inen̄ede idi ata ufan ebe ke ndisọn̄ọ owo oro oyomde un̄wam idem ye ke ndinam n̄kpọ nnọ enye. Mme N̄ke 17:17 ọdọhọ ete: “Ufan amama ufan kpukpru ini, edi eyen-eka [eke amanade] ọnọ ini nnan-enyịn.” Ke akpanikọ, owo ekeme ndinen̄ede n̄kpere ufan esie idem n̄kan ndusụk mbonubon. Mme N̄ke 18:24 ọdọhọ ete: “Owo (ediwak) ufan ayabiat idem esie: edi andima odu emi eyịrede owo akan eyen-eka.” Nte afo akpama ndifiọk n̄kpọ efen efen mban̄a nte ekpenyenede utọ eti ufan oro? Nte afo akpama ndikabade ndi kiet ke otu mme owo emi ẹdiọn̄ọde nte mbon oro ẹnyenede ima ke otu idemmọ? (John 13:35) Edieke edide ntre, Mme Ntiense Jehovah ke edem mbufo ẹyedat esịt ndiwụt fi nte ekpenyenede mme ufan akpanikọ.