Ndi Jesus Ama Enyene Bible?

BABA, Jesus ikenyeneke Bible. Ntak-a? Koro ofụri Bible nte emi inyenede idahaemi ikodụhe ke eyo Jesus. Nte ededi, mme ikpan̄wed oro ẹdọn̄ọde se isịnede idahaemi ke Bible ẹma ẹdu ke mme synagogue. Jesus ama okot ikpan̄wed Isaiah ke synagogue ke Nazareth. (Luke 4:16, 17) Apostle Paul ama okop ‘ẹkotde Ibet ye mme Prọfet’ ke Antioch ke Pisidia. (Utom 13:14, 15) N̄ko, James mbet Christ ọkọdọhọ ke ẹma ẹkot “uwetn̄kpọ [Moses] ke mme synagogue ke kpukpru sabbath.”—Utom 15:21.

Ndi mme owo ẹma ẹnyene mme ikpan̄wed Bible ke akpa isua ikie? Etie nte eunuch owo Ethiopia, emi okodude ke esa Candace Ọbọn̄ an̄wan, ama enyene, sia ẹdọhọ ke “enye eketie ke chariot esie okot n̄wed prọfet Isaiah” ke ini Philip okosobode ye enye ke usụn̄ Gaza. (Utom 8:26-30) Apostle Paul ama ọdọhọ Timothy ete atan̄ ‘n̄wed edi, akpan akpan n̄wed ikpa.’ (2 Timothy 4:13) Okposụkedi Paul mîketịn̄ke utọ n̄wed oro mmọ ẹkedide, enen̄ede etie nte mmọ ẹkedi mbai N̄wed Abasi Usem Hebrew.

Alan Millard emi edide prọfesọ usem Hebrew ọdọhọ ke etie nte ke “ata ikpọ owo ke Palestine, kpukpru mbon emi ẹkedọhọde ke imọfiọk n̄wed, ndusụk Pharisee ye mme andikpep nte Nicodemus” kpọt ẹkesinyene mme ikpan̄wed Bible. Ntak kiet ekedi ke enye ama enen̄ede ọsọn̄ urua. Millard ọdọhọ ke “ndinyene n̄wed Isaiah ekedi n̄kpọ nte denarius itiokiet esịm duop,” onyụn̄ ọdọhọ ke ofụri N̄wed Abasi Usem Hebrew “ekedi n̄kpọ nte ikpan̄wed 15 esịm 20,” m̀mê ke ekeme ndikpa okụk utom ọfiọn̄ itiokiet.

Bible itịn̄ke m̀mê Jesus m̀mê mme mbet esie ẹma ẹnyene mme ikpan̄wed Bible. Kpa ye oro, Jesus ama enen̄ede ọfiọk N̄wed Abasi, ekeme nditịn̄ mban̄a nnyụn̄ n̄kot enye ke ibuot. (Matthew 4:4, 7, 10; 19:4, 5) Ndi emi ikpanamke nnyịn itịm imehe ye Bible sia enye ememde urua onyụn̄ awakde mfịn?