San̄a Kpere Abasi
Enye Eti ke “Nnyịn Idi Ntan”
EYENAN̄WAN kiet emi edide Christian ọdọhọ ntem aban̄a ndudue emi enye akanamde ete: “N̄kenịmke ke Jehovah ekeme ndifen nnọ mi ofụri ofụri. N̄kekere ke esịt edisụk imamia mi ufen ke ofụri eyouwem mi.” Owo emi esịt amiade ufen isibọhọ emem. Edi, Bible etịn̄ n̄kpọ emi ekemede ndinọ mbon oro ẹkabarede esịt ndọn̄esịt. Se se David, andiwet psalm, eketịn̄de mi ke Psalm 103:8-14.
David ama ọfiọk ke “Jehovah enyene esịtmbọm,” ndien ke enye ‘isikwe ndudue inọ owo kpukpru ini.’ (Ufanikọ 8-10) Ke ini Abasi okụtde ke oyom itua owo mbọm, enye esinam emi ke ofụri esịt. David emi ekedide ata ewet uto ama ọnọ uwụtn̄kpọ ita ndiwụt nte mbọm Abasi okponde ke idem nnyịn.
“Kpa nte enyọn̄ okon̄de akan isọn̄, ntre ke ima-mfọnido esie okpon ye mmọ eke ẹbakde enye.” (Ufan̄ikọ 11) Ke ini imenerede enyịn ise ikpaenyọn̄ ke okoneyo, nnyịn isikemeke nditịn̄ adan̄a nte enyọn̄ oyomde usụn̄ ọkpọn̄ isọn̄. Ikọ David emi anam ikụt nte mbọm Abasi, emi owụtde ima-nsọn̄ọnda esie, okponde. Enye esitua “mmọ eke ẹbakde enye” mbọm—oro edi, “mbon oro ẹnen̄erede ẹten̄e enye,” nte ataifiọk Bible kiet ọdọhọde.
“Kpa nte edem usiahautịn oyomde usụn̄ ọkpọn̄ edem usoputịn, ntre ke enye enịm mme ndudue nnyịn oyom usụn̄ ọkpọn̄ nnyịn.” (Ufan̄ikọ 12) Ikọ David anam ifiọk ke Abasi ama efen ọnọ owo, ke enye esiduọk idiọkn̄kpọ emi ke ebiet emi nnyịn mîkemeke ndisịm.
“Kpa nte ete atuade nditọ esie mbọm, ntre ke Jehovah atua mbon oro ẹbakde enye mbọm.” (Ufan̄ikọ 13) Sia David ke idemesie ekedide ete nditọ, enye ama ọfiọk utọ esịt emi eti ete esinyenede. Utọ ete emi esitua nditọ esie mbọm, akpan akpan ke ini emi mmọ ẹkopde ubiak. David ọsọn̄ọ ke edima Ete nnyịn eke heaven esitua nnyịn nditọ esie eke isọn̄ mbọm, akpan akpan ke ini ‘esịt obụn̄ọde nnyịn” ke ntak idiọkn̄kpọ nnyịn.—Psalm 51:17.
Ke David ama ọkọnọ uwụtn̄kpọ ita emi ama, enye ama etịn̄ se isinamde Jehovah atua mme anana-mfọnmma nditọ esie mbọm. Enye ọkọdọhọ ete: “Enye [etịm] ọfiọk nte ẹbotde nnyịn, emeti ete ke nnyịn idi ntan.” (Ufan̄ikọ 14) Jehovah ọdiọn̄ọ ke nnyịn idi ntan, ke nnyịn imemem inyụn̄ ifọnke ima. Ke ini enye ekerede aban̄a nte nnyịn itiede, enye ‘esinyịme ndifen nnọ’ nnyịn, ama akam edi imenen̄ede ikabade esịt.—Psalm 86:5.
Ndi se David etịn̄de aban̄a mbọm Jehovah otụk fi? Ke ini eyenan̄wan oro iketịn̄de iban̄a ke enyọn̄ emi okodụn̄ọrede ikọ Bible oro ọdọhọde ke Abasi enyịme ndifen nnọ nnyịn, enye ama ọdọhọ ete: “Ọtọn̄ọ nditie mi ke idem nte ke mmekeme ndinen̄ede n̄kpere Jehovah. Etie mi nte ke ẹbiomode mi ata akamba mbiomo.”a Mbọk kpep n̄kpọ ban̄a mbọm Abasi ye se akpanamde man enye atua fi mbọm. Ekeme ndidi eyetie fi ntem n̄ko.
[Ikọ Idakisọn̄]
a Kot ibuot 26, “Abasi Emi ‘Amade Ndidahado,’” ke n̄wed San̄a Kpere Jehovah, emi Mme Ntiense Jehovah ẹsiode.
Itie Bible emi okpokotde ke august:
[Se ẹwetde ke ikpọ abisi ke page 13]
“Ọtọn̄ọ nditie mi ke idem nte ke mmekeme ndinen̄ede n̄kpere Jehovah. Etie mi nte ke ẹbiomode mi ata akamba mbiomo”