Ndi Abasi Amia Nnyịn Ufen?
“Kpa ye emi mbọm mmọ anamde mi, n̄kere ke Abasi amia mmọ ufen.” Akwa ebre mbre ukara Japan eketịn̄ ikọ emi ke ini akamba unyekisọn̄ ye ata akwa mbufịt inyan̄ibom ọkọnọmọde Japan ke March 2011.
Ke ini unyekisọn̄ okowotde se ibede owo 220,000 ke Haiti ke January 2010, ọwọrọetop ọkwọrọikọ ke ekebe ndise ọkọdọhọ ke emi eketịbe ke ntak emi “mme owo ẹdụkde ediomi ye devil,” ke se idin̄wamde mmọ edi “ndiwọn̄ọde mbịne abasi.”
Oku Catholic kiet ọkọdọhọ ke ini ẹkefịkde owo 79 ke ikpat ẹwot ke Manila ke Philippines, ete: “Abasi oyom ndinam mbon emi esịt ama okodoro ufiọn ẹfiọk ke imọ do.” N̄wedmbụk n̄kpọntịbe kiet ke obio oro ọdọhọ ke “ndusụk ikpọ owo oro ẹnịmde ke Abasi do ẹdọhọ ke Abasi esida unyekisọn̄, oyobio, ye mme oto-obot afanikọn̄ eken,” emi ẹsiwakde nditịbe ke idụt oro “owụt mme owo iyatesịt esie.”
EBỊGHI mme owo ẹketọn̄ọ ẹnịm ke Abasi esida mme oto-obot afanikọn̄ amia mme idiọkowo ufen. Ke 1755, ke unyekisọn̄, ikan̄, ye ata akwa mbufịt inyan̄ibom, ẹma ẹkewot n̄kpọ nte owo 60,000 ke Lisbon ke Portugal, Voltaire, ọwọrọetop owo akwaifiọk ama obụp ete: “Ndi idiọkn̄kpọ mbon Lisbon okpon akan eke mbon Paris emi ẹsụk ẹdarade ko?” Ke nditịm ntịn̄, ata ediwak owo ẹsikere m̀mê Abasi esikam ada oto-obot afanikọn̄ amia mme owo ufen. Ndusụk idụt ẹkot oto-obot afanikọn̄ ubọkutom Abasi.
Ke ikerede iban̄a emi, imekeme ndibụp nte: Ndi edi akpanikọ ke Abasi esida mme oto-obot afanikọn̄ amia mme owo ufen? Ndi udịm udịm oto-obot afanikọn̄ emi ẹtịbede idahaemi ẹdi ufen Abasi?
Mbon emi ẹsidọhọde ke oto-obot afanikọn̄ edi ufen Abasi ẹsida mme itie Bible emi ẹwụtde nte Abasi akadade mme n̄kpọ-obot osobo ererimbot ẹsọn̄ọ ikọ mmọ. (Genesis 7:17-22; 18:20; 19:24, 25; Numbers 16:31-35) Edi edieke enen̄erede odụn̄ọde mme itie Bible emi, oyokụt akpan n̄kpọ ita oro ẹsisan̄ade ye nsobo Abasi. Akpa, Abasi esibem iso ọnọ ntọt. Ọyọhọ iba, Abasi isisoboke kpukpru owo—nti ye idiọk—nte emi oto-obot afanikọn̄ esisobode. Enye esisobo ata ndiọi owo emi mîmaha ndikabade esịt m̀mê mbon oro mîmaha ndikop item esie. Ọyọhọ ita, Abasi esisio usụn̄ ubọhọ ọnọ mbon oro mîduehe.—Genesis 7:1, 23; 19:15-17; Numbers 16:23-27.
Mmọdo, idụhe n̄kpọ ndomokiet emi owụtde ke Abasi edi ntak udịm udịm oto-obot afanikọn̄ oro ẹnọmọde ata ediwak owo mfịn. Ntak ndien emi oto-obot afanikọn̄ ẹwakde ntem idahaemi-e? Nso ke ikpanam ke ini oto-obot afanikọn̄ etịbede? N̄ko, ndi ini oyodu emi afanikọn̄ emi mîdidụhe aba? Oyokụt ibọrọ mbụme emi ke ibuotikọ ita oro ẹtienede.