Se Iwọrọde Iban
“Ke ini n̄kụtde nte ẹnamde n̄kpọ ye iban, esitie mi nte n̄kposụk ndi eyenọwọn̄.”—ZAHRA, EYEN ISUA 15, ẹwet se enye eketịn̄de ke magazine French oro ẹkotde GEO.
IKỌ eyenan̄wan emi owụt se ikade iso idahaemi ke ofụri ererimbot—oro edi, nte ẹfiomode ẹnyụn̄ ẹsaride iban. Ẹyak ise usụn̄ ifan̄ oro ẹnamde emi.
● Asari. Ediwak ete ye eka ke Asia ẹma ndinyene nditọ irenowo. Ndụn̄ọde oro Esop Edidiana Mme Idụt ẹkenamde ke 2011 owụt ke n̄kpọ nte nditọiban miliọn 134 ẹkpan̄a ke Asia. Nso iwot mmọ? Ẹsosion̄o ndusụk ke idịbi, ẹwowot ndusụk ke ẹma ẹkemana, ndusụk ẹkpan̄a sia owo mîtịmke ikama.
● N̄wed. Owo iba ke otu kpukpru owo ita oro mîkaha n̄wed ke ofụri ererimbot ẹdi iban.
● Idan̄ n̄kanubọk. Se ibede iban biliọn iba ye ubak ẹdu ke mme idụt emi ẹkerede ke idiọkke ebe ndidan̄ n̄wan esie ke n̄kanubọk.
● Usọbọ. Ke mme idụt oro owo mînen̄ekede iforo, iban 30 ẹsikpan̄a kpukpru hour ke ntak idịbi m̀mê uman sia owo mînọhọ mmọ usọbọ emi ẹkpenọde.
● Unen edinyene isọn̄ m̀mê ufọk. Okposụkedi emi edide iban ẹtọ in̄wan̄ ẹkan ke ofụri ererimbot, ke ediwak idụt, iban inyeneke unen ndinyene isọn̄ m̀mê ufọk.
Ntak emi owo mîyakke iban ẹnyene mme utọ unen emi-e? Ke ndusụk obio, mme owo ẹsifiomo iban sia ẹnamde se ido ukpono mmọ ekpepde. N̄wedmbụk n̄kpọntịbe kiet ke France etịn̄ se ekpeibet kiet ke India ọkọdọhọde ete: “Kpukpru ibet ido ukpono ẹdi kiet: Mmọ ẹnam ẹsari iban.”
Ndi afo ekere ke akpana ẹsari iban? Ediwak n̄wed ido ukpono ẹsụhọde iban itie. Ndi emekere ke Bible osụhọde iban itie n̄ko? Ndusụk owo ẹkere ke enyene mme itie Bible emi ẹwụtde ke akpana ẹsari iban. Edi didie ke Abasi ese iban? Kpa ye oro n̄kpọ emi ekemede ndifịna owo, nditịm ndụn̄ọde se Bible etịn̄de aban̄a n̄kpọ emi ayan̄wam nnyịn inyene ibọrọ mbụme emi.
[Ebiet Ẹdade Ndise Ẹto ke page 3]
© G.M.B. Akash/Panos Pictures