San̄a Kpere Abasi

“Mme Idụt Ẹyefiọk Ẹte ke Ami Ndi Jehovah”

EKPETIE fi didie ke idem edieke ẹkpemende se mûkunamke ẹdori fi ke ibuot? Edieke edide n̄kpọ oro ama anam ediwak owo ẹbọ ufen, nso ke akpanam? Imekere ke akpanam n̄kpọ aban̄a enyịn̄ fo emi ẹbiatde mi. Ndi ọmọfiọk ke ntre ke ẹbiat enyịn̄ Jehovah n̄ko? Mfịn ediwak owo ẹnam ndudue ẹdọhọ ke Abasi edi ntak ufịk ye ufen oro mme owo ẹbọde ke ererimbot emi. Ndi ọdọn̄ Jehovah ndinam enyịn̄ esie asana? Ih ọdọn̄. Se se Abasi etịn̄de mi ke n̄wed Ezekiel.—Kot Ezekiel 39:7.

Jehovah ọdọhọ ete: “Ndinyụn̄ nyakke ẹsabade aba enyịn̄ mi.” Mme owo ẹsisabade Abasi enyịn̄ ke ini mmọ ẹdọhọde ke enye edi ntak ufịk oro ikụtde mfịn. Didie ke emi edi ntre? Ke Bible, “enyịn̄” esiwak ndida mban̄a utọ owo emi owo edide. N̄wed ndụn̄ọde kiet ọdọhọ ke enyịn̄ Abasi ada aban̄a “utọ owo emi Abasi edide, se enye etịn̄de aban̄a idemesie, etop oro enye ọwọrọde, ye ukpono oro enye odotde.” Abasi ese didie ufịk? Enye asasua ufịk. Mbọm mbon oro ẹfịkde esinam Abasi etieti.a (Exodus 22:22-24) Ke ini mme owo ẹdọhọde ke Abasi anam n̄kpọ emi enye akam asuade-sua, mmọ ẹbiat m̀mê ‘ẹsuene enyịn̄’ Abasi.—Psalm 74:10.

Omokụt ke Jehovah ọdọhọ ke enyịn̄ imọ edi “edisana” ke ufan̄ikọ 7. Bible ọdọhọ ke enyịn̄ Jehovah edi edisana ke ediwak itie. “Edisana” enye emi ọwọrọ n̄kpọ ndinana ndo. Enyịn̄ Jehovah asana sia Abasi emi ekerede enyịn̄ emi inyeneke ndo, inyụn̄ inyeneke ubọk ke idiọkn̄kpọ ndomokiet. Emi owụt ke mbon emi ẹdọhọde ke Jehovah edi ntak idiọkn̄kpọ ererimbot emi ẹnen̄ede ẹsuene “edisana enyịn̄” Abasi!

Jehovah aduak ndida Obio Ubọn̄ esie nnam enyịn̄ esie asana. Emi edi akpan ibuotikọ Bible. Ẹnen̄ede ẹtịn̄ ẹban̄a emi ke n̄wed Ezekiel emi Jehovah awakde ndidọhọ ke ‘mme idụt ẹyefiọk ẹte ke imọ idi Jehovah.’ (Ezekiel 36:23; 37:28; 38:23; 39:7) Jehovah idọhọke ke mme itie Bible emi ite ke mme idụt ẹdimek ke idemmọ m̀mê iyọfiọk imọ m̀mê idifiọkke. Edi ọdọhọ ke mmọ ‘ẹyefiọk ẹte ke imọ idi Jehovah’ m̀mê mmọ ẹma m̀mê imaha. Jehovah aduak ndinam n̄kpọ emi edinamde mme idụt ererimbot emi ẹfiọk ke imọ emi enyịn̄ imọ edide Jehovah, kpa Akakan Ọbọn̄ Andikara ekondo, idi ata edisana Abasi.

Abasi etịn̄ ediwak ini ke n̄wed Ezekiel ete: “Mme idụt ẹyefiọk ẹte ke ami ndi Jehovah.” Ikọ emi enen̄ede enem kpukpru mbon oro ẹtiede ẹbet ini emi Abasi edisiode ufịk ye ufen ifep ke ererimbot emi. Jehovah ọmọn̄ ọsọsọp anam emi onyụn̄ etre kpukpru esuene emi ẹsuenede edisana enyịn̄ esie. Enye oyosio idiọkn̄kpọ efep, osobo kpukpru mbon oro ẹnamde idiọk, onyụn̄ anyan̄a kpukpru mbon oro ẹfiọkde ẹnyụn̄ ẹkponode edisana enyịn̄ esie. (Mme N̄ke 18:10) Ndi idọn̄ke fi ndikpep nte ekpenen̄erede asan̄a ekpere edisana Abasi nnyịn, Jehovah, kpa Abasi emi “amade unenikpe”?—Psalm 37:9-11, 28.

Itie Bible emi okpokotde ke September:

◼ Ezekiel 39-48–Daniel 1-3

[Ikọ Idakisọn̄]