Ọdọn̄ Mme Owo Ndikop Inem Christmas

“Mme owo ẹsinyene ekese ndinam ke ini Christmas. Mmọ ẹsida mme n̄kpọ oro mmọ ẹnyenede ndinam ke ini emi nte mbiomo, ndien mmọ isinen̄ekede inyene ini inọ mme ufan m̀mê mbonubon mmọ ke ntak emi mmọ ẹnyenede ekese ndinam. Ndusụk ini, ọkpọsọn̄ utom isiyakke ikop inemesịt oro ikpokopde ini emi.”​—BRAD HENRY, AKANI ANDIKARA OKLAHOMA KE U.S.A., DECEMBER 23, 2008.

NTE ini Christmas asan̄ade ekpere, ẹsibre ikwọ, ẹsio fim, ẹnyụn̄ ẹnam mme edinam ke TV oro ẹsinamde usọrọ emi enen̄ede aduai mme owo idem. Afo ekere ke nso ikpenen̄ede inam ini emi aduai mme owo idem ntre? Ndi ekpedi ke ntak

● Nditi Jesus Christ?

● Ndikop inemesịt ndinọ owo enọ?

● Ndin̄wam mbon oro ẹyomde un̄wam?

● Ndidu ye mbonubon?

● Ndidu ke emem ye mme owo?

Esisọn̄ ediwak mbon oro ẹdiade Christmas ndinam ekededi ke otu mme n̄kpọ emi ke ini Christmas, nte Henry akani andikara Oklahoma eketịn̄de. Ini Christmas esiwak nditie itọk itọk, ọyọhọ ye utom, ndien n̄kpọ esinen̄ede ọsọn̄ urua. Ndi ọwọrọ ke owo ikemeke ndikop inem oro mme owo ẹkerede nte ẹkpekopde ke ini Christmas?

Bible esịn udọn̄ ọnọ kpukpru nnyịn ete iti Jesus Christ, itat ubọk inọ owo n̄kpọ, in̄wam mbon oro ẹyomde un̄wam, inyụn̄ inyene ini inọ mbonubon nnyịn. Enye onyụn̄ ekpep nnyịn ndidu ke emem ye mme owo. Akpa ibuotikọ itiaba emi ẹban̄ade Christmas mi idinemeke ntak emi ndusụk owo mîsidiaha Christmas,a edi ẹdibọrọ mme mbụme oro ẹtienede mi:

● Ndusụk owo ẹkere ke nso ikpanam mme owo ẹdia Christmas?

● Ntak emi ọsọn̄de ndikop inem oro mme owo ẹkerede nte ẹkpekopde ke ini Christmas?

● Mme edumbet Bible ewe ẹn̄wam ata ediwak owo ẹfiọk n̄kpọ emi ẹfọnde ẹkan Christmas?

[Ikọ Idakisọn̄]