Ubon Ndidu Ọtọkiet
“Sese! Ọfọn didie onyụn̄ enem didie ntem nditọete ndidụn̄ ọtọkiet ke edidianakiet!”—PSALM 133:1.
Ntak emi ndusụk owo ẹsidiade Christmas.
Kpukpru nditọ Israel ẹkedi nditọ Jacob m̀mê Israel, ntre mmọ ẹkedi “nditọete,” oro edi, ẹketo ubon kiet. Ama ‘esifọn onyụn̄ enem’ kpukpru mmọ ndisop idem ọtọkiet ke Jerusalem ke mme ini usọrọ. Kpasụk ntre, ediwak ubon ẹsinen̄ede ẹdori enyịn ndidu ọtọkiet ke ini Christmas, ẹkerede ke emi ‘ọyọfọn onyụn̄ enem.’
Ntak emi esisọn̄de ubon ndidu ọtọkiet?
Encyclopedia of Christmas and New Year’s Celebrations ọdọhọ ete: “N̄kpri mfịna oro ẹkedude ke ubon ẹkeme ndikabade ikpọ mfịna ke ini ubon ẹsopde idem ndidia Christmas.”
Mme edumbet Bible ewe ẹkeme ndin̄wam?
“Ẹka iso ẹsio usiene oro ekemde ẹnọ mme ete ye mme eka ye mme ete ete ye mme eka eka [mbufo].” (1 Timothy 5:4) Diomi ndisika n̄kese mbonubon fo adan̄a ediwak ini nte ekekeme. Idem ọkpọkọm iman fo ẹdụn̄ oyom usụn̄ ọkpọn̄ fi, emekeme ndisụk nnyene nneme ye mmọ ke ubọk ke ubọk. Emekeme ndiwet leta nnọ ẹsọk mmọ, okot mmọ ke fon, ọnọ mmọ e-mail, mîdịghe ada Intanet enyene nneme ye mmọ. Ndinyene nneme ye iman ke ubọk ke ubọk esinam mfịna okûnen̄ede odu.
“Ufan̄ idụhe ke esịt mbufo inọ ima. . . . ẹtat esịt mbufo.” (2 Corinth 6:12, 13) Edieke ẹsikade ẹkese iman mbufo ini kiet kpọt ke isua, mbufo idinen̄ekede idiana, n̄ko nditọ mbufo ẹdida mmọ nte isenowo. Ndusụk nditọ isinen̄ekede idiana ye mme ete ete ye eka eka m̀mê iman mmọ emi mîdụhe ikpere. Ntre, sịn udọn̄ nọ nditọ fo “ẹtat esịt” ẹma iman mbufo emi ẹsọn̄de.a Nditọwọn̄ emi ẹsiwakde ndidu ye mbonusọn̄ ẹsinen̄ede ẹkpep ndima nnyụn̄ n̄kere mban̄a mbon oro ẹkponide ẹkan mmọ.
“Ikọ eke ẹtịn̄de ke nnennen ini ọfọn didie ntem!” (Mme N̄ke 15:23) Nso ke ekeme ndinam mbak ndutan̄uyo edibiat emem ke ubon mbufo? N̄kpọ kiet oro ekemede ndinam edi ndimek “nnennen ini” ndineme mme mfịna. Edieke afo esinemede nneme ke ubọk ke ubọk ye mbonubon fo, eyenen̄ede emem fi utom ndineme mfịna oro afo enyenede ye iman fo ekededi, ẹyenyụn̄ ẹkop ‘inem’ ini ekededi oro ẹdude ọtọkiet.
[Ikọ Idakisọn̄]
a Se ibuotikọ emi “Why Should I Get to Know My Grandparents?” ye “How Can I Get Closer to My Grandparents?” ke Awake! eke April 22 ye May 22, 2001, oro Mme Ntiense Jehovah ẹkesiode.