Ikasan̄a Didie Ididu ke Isọn̄ Emi?

Genesis, akpa n̄wed Bible, etịn̄ ibio ibio nte ekondo emi akasan̄ade edidu. Enye ọdọhọ ete: “Ke editọn̄ọ, Abasi okobot enyọn̄ ye isọn̄.” (Genesis 1:1) Abasi okobot Adam ye Eve ke enye ama okobot mme eto ye mme unam. Mmọ iketiehe nte mme unam sia Abasi okobot mmọ ke mbiet idemesie, onyụn̄ ọnọ mmọ ifụre ndimek se mmọ ẹyomde ndinam. Ntre, edieke mmọ ẹkopde uyo Abasi, ọyọfọn ye mmọ. Mmọ ẹyenyụn̄ ẹtiene ẹnam uduak Abasi osu ke isọn̄, ẹnyene mfọnmma nditọ ẹyọhọ isọn̄, ẹnyụn̄ ẹdụn̄ ke emem ye ifụre ke nsinsi nsinsi.

Edi angel kiet ama edi edinam Adam ye Eve ẹkpọn̄ Abasi ẹtiene enye. Ntak edi oro ẹkotde enye Satan, emi ọwọrọde, “Andibiọn̄ọ.” Enye akada urụkikọt abian̄a Eve, ọdọhọ ke n̄kpọ ọyọfọn ye enye edieke enye ọkpọn̄de Abasi. Adam ye Eve ẹma ẹkpọn̄ Abasi emi okobotde mmọ ẹtiene Satan. Idiọkn̄kpọ emi ikayakke mmọ ẹdu uwem aba ke nsinsi nte mme mfọnmma owo. Ntre mmọ ẹma ẹkpan̄a, ẹyak idiọkn̄kpọ, unana mfọnmma, ye n̄kpa ẹnọ kpukpru nnyịn.

Ke ndondo oro Adam ye Eve ẹkenamde idiọkn̄kpọ, Abasi ama etịn̄ se imọ idinamde man nditọ mmọ ẹkpedu uwem ke nsinsi. Enye ọkọdọhọ ke iyọnọ “mfri” emi edisobode Satan inyụn̄ isio nnyịn ke kpukpru afanikọn̄ oro Satan, Adam ye Eve ẹkesịnde nnyịn mi. (Genesis 3:15) Anie ekedi “mfri” emi? Iyọdiọn̄ọ nte ikotde ika.

Edi Satan okosụk an̄wan̄wana ndibiat uduak Abasi. Mme idiọkowo ẹma ẹdọdiọn̄ ẹwak ke isọn̄. Ntre Abasi ama ebiere ndisobo mme idiọkowo oro ke mmọn̄ ukwọ. Enye ama ọdọhọ Noah emi ekedide eti owo ete ọkọn̄ ubom man ada anyan̄a idemesie ye ikọtufọk esie ye mme unam emi Abasi ọkọdọhọde enye atan̄ ọdọn̄ ke ubom oro.

Noah ye ubon esie ẹma ẹwọrọ ke ubom oro ke n̄kpọ nte isua kiet ama ekebe tọn̄ọ Ukwọ ọkọtọn̄ọ. Idiọkowo ndomokiet ikodụhe aba ke isọn̄. Edi nso kaban̄a “mfri” emi Abasi ọkọn̄wọn̄ọde?

​—Ẹda ẹto Genesis ibuot 1-11; Jude 6, 14, 15; Ediyarade 12:9.