MME MBỤME BIBLE ORO ẸBỌRỌDE
Ndi imekeme ndifiọk utọ owo emi Abasi edide?
Ntak emi Abasi oyomde nnyịn ifiọk akpanikọ? Kot John 17:3
Abasi esineme nneme ye nnyịn mme owo. Enye akada edisana spirit esie anam mme andiwet Bible ẹfiọk se enye oyomde mmọ ẹwet. (2 Peter 1:20, 21) Edieke ikotde Bible, iyọfiọk utọ owo emi Abasi edide.—Kot John 17:17; 2 Timothy 3:16.
Abasi etịn̄ ediwak n̄kpọ aban̄a idemesie ke Bible. Enye anam ifiọk ntak emi imọ ikobotde owo, nte imọ iyomde nnyịn idu uwem, ye se imọ idinamde inọ nnyịn ke ini iso. (Utom 17:24-27) Jehovah Abasi oyom nnyịn inen̄ede ifiọk utọ owo emi imọ idide.—Kot 1 Timothy 2:3, 4.
Ntak emi Abasi oyomde mbon emi ẹmade akpanikọ?
Jehovah edi Abasi akpanikọ, ndien enye ama ọdọn̄ Jesus Eyen esie edi isọn̄ man edikpep mme owo akpanikọ. Ntre, mbon emi ẹmade akpanikọ ẹsikop uyo Jesus. (John 18:37) Ndien utọ mbon oro ke Abasi oyom ẹkpono imọ.—Kot John 4:23, 24.
Satan emi ẹkotde n̄ko Devil iyakke mme owo ẹdiọn̄ọ Abasi. Ntre enye anam ẹkpep mme owo nsu ẹban̄a Abasi. (2 Corinth 4:3, 4) Mbon emi mîmaha se ifọnde ẹsima mme utọ nsunsu ukpepn̄kpọ oro. (Rome 1:25) Edi ediwak mbon oro ẹnyenede eti esịt ke ẹkpep Bible man ẹfiọk se Bible etịn̄de aban̄a Abasi.—Kot Utom 17:11.