Mbono District “Idara Idara Mme Anditoro” eke Mme Ntiense Jehovah eke 1995
1 Nso n̄kpọ idatesịt ke ekedi ntem ndidu ke otu owo 458,353 oro ẹkedụkde Mme Mbono District “Mbak Abasi” ke Nigeria isua oko! Ofụri ibat owo 7,459 ẹma ẹwụt eti ndịk Abasi ebe ke ndina baptism. Nso n̄kpọ nsịnudọn̄ ke edidi ntem isua emi ndisop idem kaban̄a Mme Mbono District “Idara Idara Mme Anditoro” usen ita eke 1995! Edemede owo udọn̄ ibuotikọ oro akpana enen̄ede onụk nnyịn ndisịn kpukpru ukeme ndidụk ọkọrọ ye nditọ ukpepn̄kpọ Bible nnyịn. Ndutịm oro edidi ata n̄kpọ nsịnudọn̄ ọnọ kpukpru nnyịn nte nnyịn ikade iso ndinam n̄kpọ Jehovah ke edinam akpanikọ ke utịt ini emi.
2 Kụt ete ke amabak anam ndutịm mbono fo man afo okpodu do ndidara kpukpru inem inem ndutịm eke spirit usen ita oro, ọtọn̄ọde ke ikwọ ediberede tutu osịm akam ediberi. Idahaemi edi ini nditọn̄ọ ndibọk okụk nnịm nnọ ukpeusụn̄ ye mme ubiatokụk eken man otodo ini mbono ama edisịm afo ekpenyene okụk oro ekemde. Ke ima buan mbon oro ekemede ndiyom un̄wam ke ndutịm fo, akpan akpan mbufa mbon oro ẹnyenede udọn̄, man mmọ n̄ko ekeme ndidụk kpukpru ikpehe edinam. Eyenen̄ede an̄wam ndineme mme ntot ẹdude ke esịne—esịt n̄wed emi ye eyen ukpepn̄kpọ Bible ekededi oro edidiomide ndidụk. (Gal. 6:6,10) Ndutịm editọn̄ọ ye ikwọ ukwak ke n̄kanika ebede 9 ke minit 20 usenubọk ke Friday onyụn̄ etre ke n̄kpọ nte n̄kanika inan̄ mbubịteyo. Ndutịm eke Saturday editọn̄ọ ke n̄kanika usụkkiet usenubọk onyụn̄ etre ke ikwọ ye akam ke n̄kpọ nte n̄kanika ebede 4 ke minit 30 mbubịteyo. Ikpehe edinam usenubọk Sunday editọn̄ọ ke n̄kanika usụkkiet, ndien ndutịm usen oro edikụre ke n̄kpọ nte n̄kanika ebede 3 ke minit 30 uwemeyo. Mme ntot ẹtienede mi eyen̄wam fi ndibabak nnam ntịmidem fo.
3 Mme Item ke Ndibọ Itieidụn̄: Nnyịn iyedomo ndinọ ibat babru Room Request oro ekemde ẹsọk esop kiet kiet. Ewetn̄wed esop ekpenyene ndikụt nte Ice ẹwet n̄kpọ nnennen nnennen ẹyọhọ babru Room Request kiet kiet oro ẹnọde edi. KÛWET sụk ibat mme asuanetop oro ẹyomde itieidụn̄, utọ nte “asuanetop 50,” ke mme ufan̄ oro ẹkpewetde enyịn mbon ẹmi. Ẹnyene ndiwet kpukpru ntọt nte ẹyede ye nte ekemede ndikot. Mbọk kụt ete ke ọmọnọ ọyọhọ ntọt kaban̄a enyịn̄, isua emana, eren m̀mê n̄wan, ye m̀mê owo oro oyomde itieidụn̄ edi asiakusụn̄ m̀mê asuanetop esop. Sịn nditọwọn̄ ke udịm enyịn̄ emi. Ke ini edem ndusụk esop ẹkesiwet enyịn ikpọ owo kpọt. Emi esinam ndutịm unọ itieidụn̄ enen̄ede ọsọn̄ utom. Edieke oyomde ufan̄ oro okponde akan se idude ke babru oro, da ikọn̄ babru efen wet. Edieke ewetde awak akan enyịn̄ owo kiet ke babru oro, mbọk wụt itie ebuana mbon oro ẹyomde itieidụn̄ ke nnennen ufan̄ oro ẹnịmde. Ewetn̄wed esop ekpenyene ndikụt nte ke ẹwet n̄kpọ ẹyọhọ babru Room Request nte enende mbemiso enye ọnọde aka Itieutom Unọ Ufọkidụn̄ mbono.
4 San̄asan̄a Un̄wam: Ndutịm emi edi n̄kukụre kaban̄a mbon oro ẹyomde san̄asan̄a un̄wam edi ẹmi ẹdide mme asuanetop oro ẹnịmde eti uwụtn̄kpọ, esịnede nditọ mmọ oro ẹdude eti uwem, ẹmi Kọmiti Utom Esop ọnọde unyịme. Ẹkpenyene ndinam mme ndutịm ndise mban̄a mbon oro ẹyomde san̄asan̄a un̄wam ke esop emi mmọ ẹsidụkde mme mbonoesop, idịghe ndisịk mbiomo emi ndori mme anam ndutịm mbono ke idem. Mbiowo ye mbon en̄wen ẹmi ẹdiọn̄ọde ẹban̄a idaha owo oro ẹkeme ndinọ ima ima un̄wam. Emi esiwak ndiyom mme asuanetop ẹkere ẹban̄a udọn̄ mbon oro ẹdude ke utom uyọhọ-ini, mbonusọn̄, mbon n̄kpọnnam, ye ndusụk mbon eken. Mme asuanetop ẹkeme ndinọ un̄wam ebe ke ndisan̄a ye mme utọ owo oro m̀mê ndise mban̄a se mmọ ẹyomde ke mme usụn̄ efen.—Jas. 2:15-17; 1 John 3:17,18.
5 Nte ededi, Itieutom Unọ Ufọkidụn̄ eyedomo ndinọ mme asuanetop ẹyomde san̄asan̄a un̄wam ufọkidụn̄ oro ẹdotde edieke mbon oro ẹdude ke esop mîkemeke ndin̄wam mmọ. Mme asuanetop ẹmi ẹkeme ndineme idaha mmọ ye ewetn̄wed esop. Ewetn̄wed ekpenyene ndineme ye Kọmiti Utom Esop man ese m̀mê esop eyekeme ndin̄wam mme owo ẹmi ke ndise mban̄a itieidụn̄ mmọ. Edieke esop mîkemeke ndinọ un̄wam oro ẹyomde, ewetn̄wed ekeme ndinọ utọ mbon oro babru Special Needs Room Request. Mbon oro ẹyomde san̄asan̄a un̄wam kpọt ẹkpenyene ndiwet n̄kpọ nyọhọ babru emi. Owo oro esịnde eben̄e emi enyene ndiwet n̄kpọ nyọhọ enye. Ẹkpenyene ndifiak nyak enye nnọ ewetn̄wed, emi edisede nte ẹwetde ofụri n̄kpọ, enende, onyụn̄ odụn̄ọde mme idaha oro ẹnamde owo oro odot ndidi se ẹnọde utọ un̄wam oro. Mme idaha oro ẹdi se ewetn̄wed enyenede NDINAM AN̄WAN̄A KE NDE KE NDE ke ufan̄ oro ẹnịmde ke babru emi. Ẹkpenyene ndibabak nnam kpukpru emi mbemiso mbono. Ewetn̄wed ndien eyenọ babru emi ẹsọk Itieutom Unọ Ufọkidụn̄. Ẹyesian owo oro esịnde eben̄e emi nnennen ẹban̄a mme itieidụn̄.
6 Mbon oro ẹyomde san̄asan̄a un̄wam IKPENYENEKE ndika itiembono nnyụn̄ n̄kesịn eben̄e ufọkidụn̄ ke ini mmọ ẹsịmde, koro Itieutom Unọ Ufọkidụn̄ ana enyene unyịme oto Kọmiti Utom Esop.
7 Edieke ẹnọde fi ufọk owo odụn̄, edide eke eyenete m̀mê eke owo an̄wa, mbọk nyene ke ekikere ete ke idotke ndida mfọnido mmọ nnam n̄kpọ nte mîfọnke nnyụn̄ ndori enyịn mmọ ndiyak fi akaiso odụn̄ do ke usen efen efen mbemiso m̀mê ke mbono ama okokụre. Ẹnọ itieidụn̄ emi ke ini mbono oro IKPỌN̄ÎKPỌN̄. Mbon oro ẹbọde mme utọ itieidụn̄ oro ẹkpenyene ndikụt ẹte ke mmimọ ye nditọ mmimọ imanam n̄kpọ ukpono ukpono ke itieidụn̄ mme enyeneufọk mmimọ inyụn̄ isuanke n̄kpọ m̀mê ndibiat mme inyene enyeneufọk m̀mê ndidụk mme itie oro mînaha inọ isenowo ke ufọk oro. Edieke enyeneufọk ọtọtde imenyene mfịna ke afan̄ emi, ẹkpenyene ndinam esenyịn unọ ufọkidụn̄ ke mbono oro ọdiọn̄ọ aban̄a mmọ usọp usọp, ndien enye eyekop inemesịt ndin̄wam.
8 Ndimek Mbono Fo: Ẹwet obio mbono ye mme circuit (m̀mê mme ikpehe ẹdemede ẹsịn) nte ekemde ye ndutịm usenọfiọn̄ emi ẹnọde ndidụk mbono kiet kiet. Afo ekpenyene ndidụk mbono oro ẹdemede circuit m̀mê esop mbufo ẹsịn, ibọhọke mme idaha oro ntak ẹdotde ẹdu. Ke ebiet oro ẹnịmde mbono iba m̀mê awakde ebe oro ke ukem itie, afo ekpenyene ndidụk ke mme usenọfiọn̄ oro ẹwụtde eke circuit mbufo m̀mê ikpehe oro ẹdemede mbufo ẹsịn. Nte afo anamde mme ndutịm fo ndidụk, buan mbon oro ẹyomde un̄wam ke ima ima usụn̄, akpan akpan mbufa mbon oro ẹnyenede udọn̄, man mmọ n̄ko ẹkpekeme ndidụk kpukpru ikpehe edinam.—Gal. 6:10.
9 Editịn̄ Ikọ ke Idiọn̄ọ Nnọ Mbon Inan: Ke Mbono Ota 6, emi ẹdinịmde ke December 15—17,1995, ẹyenam ndutịm ẹnọ nditọete iren ye iban oro ẹdotde ndikabade ata ediwak edinam, edieke mîdịghe kpukpru, nsịn ke Utịn̄ikọ Idiọn̄ọ eke Mbon America. Ẹsịn udọn̄ ẹnọ mme inan ke kpukpru esop ke Nigeria nditọn̄ọ ndinam ndutịm nnọ edidụk mbono emi. Mbiowo ẹkpenyene nditịn̄ enyịn nnam ndụn̄ọde ye inan kiet kiet ke esop mmọ oro ẹdiọn̄ọde Utịn̄ikọ Idiọn̄ọ eke Mbon America man ẹkụt ẹte ke mmọ ẹfiọk ẹban̄a ndutịm emi man ẹnyụn̄ ẹbiere m̀mê ẹyom un̄wam ekededi man mmọ ẹkpekeme ndidụk.
10 Mme Andidụk Mbono Ọwọrọde Ọkpọn̄ Ebiet Ẹkenọde Mmọ: Ke ekperede ndidi ke kpukpru idaha, itie emi ẹdemede mbufo ẹsịn edi kiet oro ekperede esop mbufo akan. Ndutịm edinyene n̄kpọitie, n̄wed, udia, ye itieidụn̄ oro ekemde, ye ntre ntre, ọkọn̄ọ ke ekikere nte ke ediwak mme asuanetop ẹdidụk mbono oro ẹdemede esop mmọ ẹsịn. Nte ededi, edieke eti ntak odude afo ndidụk mbono ke ebiet efen utu ke enyeoro ẹkedemede fi ẹsịn onyụn̄ oyom ufọkidụn̄, ewetn̄wed esop ekeme ndinọ fi babru Room Request. Afo emekeme ndiwet n̄kpọ nyọhọ onyụn̄ anam ewetn̄wed esịn ubọk mbemiso afo ọnọde enye aka itiembono oro afo oyomde ndidụk.
11 Ẹyom Edidianakiet Fo: Ndutịm unọ ufọkidụn̄ emi ndikụt unen ọkọn̄ọ ke edidianakiet eke kpukpru mbon oro ẹbuanade. (Heb. 13:17) Ntre, nnyịn imeben̄e kpukpru owo ndidiana ọyọhọ ọyọhọ ye ndutịm unọ ufọkidụn̄ N̄ka. Mbọk nyịme ndibọ itieidụn̄ oro ẹnọde fi m̀mê otu m̀mê esop oro abuanade. Edieke anade anam ọkpọkpọ ndutịm fo, ndusụk ke ntak mûmaha itieidụn̄ oro ẹnọde fi, afo emekeme ndinam ntre. Edi kûdomo ndibọ itieidụn̄ oro Itieutom Unọ Ufọkidụn̄ mbono ama ọkọbọbọ ebe ke ndiyom ndikpe okụk awak akan se ẹma ẹkenyenyịme. Emi ikpedịghe ediwụt mfọnido ye ima nnọ nditọete fo, n̄ko enye edi edinam unana edinam akpanikọ nnọ esop Jehovah. Nnyịn imọfiọk ite ke nditọete ke ofụri ofụri ẹsima ndinyene itieidụn̄ oro ẹkperede itiembono, edi idịghe kpukpru owo ke ẹkeme ndinọ itieidụn̄ ntre. Ndusụk owo ẹnyene ndidụn̄ ke ebiet oyomde usụn̄ esisịt ọkpọn̄ itiembono. Edieke otịbede nte afo odụn̄ ke ebiet oyomde usụn̄ esisịt ọkpọn̄ itiembono isan̄ emi, bat emi nte uwa oro afo enyenede ndinam nyụn̄ wụt esịtekọm ke ọkpọsọn̄ utom oro Itieutom Unọ Ufọkidụn̄ mbono akanamde ke ndidiomi itieidụn̄ nnọ fi. Enye edi ke usen ifan̄ kpọt, ndien ekem afo eyefiak ọnyọn̄ esop obio fo. Edi edieke afo oyomde ndinam ndutịm idemfo, mbọk bemiso bụp Itieutom Unọ Ufọkidụn̄ fiọk m̀mê ẹma ẹbebem iso ẹbọ ebiet oro afo oyomde ndinam ndutịm mban̄a. Edidi uduak Itieutom Unọ Ufọkidụn̄ mbono ndikụt nte ke nditọete nnyịn ye isenowo eken ẹnyene mme itieidụn̄ ẹfọnde ẹnyụn̄ ẹsụhọrede ubiatokụk nte ekekeme, nte ekemde ye mme idaha mmọ, man ẹkop inemesịt ẹnyụn̄ ẹkeme ndidara nti ufọn n̄kpọ spirit eke ndutịm mbono ọyọhọ ọyọhọ.
12 Ndisịn ndinam se ẹtịn̄de ke kpukpru ikpehe oro ẹsiakde ke enyọn̄ emi eyenam edi ọkpọsọn̄ n̄kpọ ndidiomi ndibọ mme itieidụn̄, ndien mmọ ẹyeda esuene ẹsọk enyịn̄ ye esop Jehovah. (Ps. 119:168) Ke ntre, N̄ka ọyọdọhọ Itieutom Unọ Ufọkidụn̄ ndinam ndụn̄ọde ye mme enyeneufọk man ẹfiọk m̀mê owo ekededi enyene mfịna n̄ko m̀mê anie abuana. Mme anam ndutịm mbono ke ẹnam utom ọkpọsọn̄ ndin̄wam nditọete nnyịn ẹtre ọkpọsọn̄ ubiatokụk nte ekekeme, ntre edi ke ufọn kpukpru nnyịn ndidiana ọyọhọ ọyọhọ ye ndutịm unọ ufọkidụn̄ N̄ka man ndutịm emi ekpekeme ndisụk n̄kaiso. Ye ndutịm emi, uduak nnyịn edi ndin̄wam mme andidụk mbono ndinyene itieidụn̄ oro ọfọnde onyụn̄ osụhọrede ubiatokụk nte ekekeme man mmọ ẹkeme ndidara eti ndutịm eke spirit ke mbono.
[Ntọt Ẹnọde Otu Mbiowo: Ke ẹbọde esịne-esịt n̄wed emi, mbọk ẹtọt ke Esoputom efen ye ke Ukpepn̄kpọ Enyọn̄-Ukpeme oro editienede, ebiet ye mme usenọfiọn̄ ẹmi N̄ka edemede esop mbufo esịn. Ọkpọfọn ndidụri udịm ke obio mbono ye mme usenọfiọn̄ oro ẹdemede esop mbufo ẹsịn ke udịm enyịn̄ circuit oro ẹnọde, ẹnyụn̄ ẹdian ikpehe esịne-esịt n̄wed emi ke obukpọk ntọt.
Ewetn̄wed esop ekpenyene ndise mban̄a n̄kpọ ẹban̄ade mme mbono ye mme ntọt mbono ke mme mbonoesop ini iso. Kpukpru mbiowo ẹnyene ndidiana kiet ọyọhọ ọyọhọ man ẹkụt ẹte ke ẹse ẹban̄a mme n̄kpọ ẹban̄ade mbono usop usọp, ke usụn̄ emi esịnede ufiop, ifịk ifịk, ye nte ọfọnde.]