Ikọ Obio Ubọn̄—Ndifiọk Se Enye Ọwọrọde
1 Ke n̄ke esie oro aban̄ade asuan n̄kpasịp, Jesus ọkọdọhọ ke n̄kpasịp oro ọduọde ke “eti isọn̄” ada aban̄a “owo emi okopde ikọ, onyụn̄ ọfiọkde se enye ọwọrọde.” (Matt. 13:23) Ke ima ikokop iban̄a Obio Ubọn̄, nte nnyịn ‘imọfiọk se enye ọwọrọde’? Adan̄a didie ke enye akara uwem nnyịn? Nte nnyịn imonịm mme udọn̄ n̄kpọ Obio Ubọn̄ ke akpa itie, ke ntre iyadarede iwụt nte ke nnyịn imọfiọk se etop oro ọwọrọde?
2 Edinyene nnennen ifiọk mban̄a etop Obio Ubọn̄ oyom ukpepn̄kpọ idemowo. (Oyom nnyịn ida ini itie ikere udia eke spirit oro ẹnọde. Ndikot Enyọn̄-Ukpeme itọk itọk etie nte ndimemen inem inem udia oro ọnọde nsọn̄idem. Nte afo emesida ini nditịn̄ enyịn n̄kere mban̄a udia eke spirit? Man ẹbọ n̄kponn̄kan ufọn, ana se inụkde owo odu ye eti udọn̄ n̄kpọ eke spirit. Edieke mmọemi mîdụhe, mme edinam eken ekeme ndisụhọde mme ufọn ẹtode ukpepn̄kpọ idemowo mîdịghe ẹdia ini oro nnyịn iyomde kaban̄a enye. Idịghe mmemmem n̄kpọ ndisọn̄ọ mmụm eti ndutịm ukpepn̄kpọ n̄kama. Ke adan̄aemi oyomde editịn̄ enyịn nda ukem ukem kaban̄a mme ebeiso n̄kpọ, mme ufọn eke spirit oro edibọde edi ata ọsọn̄urua.—N̄ke 3:13-18; Col. 1:27.
3 Ẹdụn̄ọde N̄wed Abasi an̄wam nnyịn ke usen ke usen ndinyene nnennen ekikere oro ọbọpde-bọp kaban̄a Obio Ubọn̄. Mbon oro “ẹnyenede udọn̄ ke n̄kpọ eke spirit mmọ” ẹsidiomi ndida minit ifan̄ kpukpru usen n̄kot itien̄wed ye mme utịn̄ikọ. (Matt. 5:3, NW) Ediwak itien̄wed ẹsinam nsio nsio ikpehe Obio Ubọn̄ an̄wan̄a. Ke uwụtn̄kpọ, ke November 22, 1994, itien̄wed oro ẹkekotde ekedi Matthew 13:4. Utịn̄ikọ ekeneme aban̄a idotenyịn Obio Ubọn̄ onyụn̄ eti nnyịn aban̄a mme n̄kpọndịk eke edidụk idiọk nsan̄a ye mme iman ye mme mbọhọidụn̄. Akpanikọ oro nte ke ẹsineme itien̄wed eke usen ke usen ke usenubọk usen utom kiet kiet ke minit 15 ke mme ufọkidụn̄ Bethel ke ofụri ererimbot ọsọn̄ọ owụt mme ufọn ye nte edineme itien̄wed eke usen ọtọkiet edide akpan n̄kpọ. Nte ubon fo esịn utọ nneme oro ke ndutịm mbufo eke usen ke usen?
4 Nte esịtekọm fo kaban̄a Obio Ubọn̄ ọkọride, afo eyenyene akamba udọn̄ ndibuana etop Obio Ubọn̄ ye mmọ en̄wen. Enyọn̄-Ukpeme ye Awake! ẹnọ se ẹkemede ndimen ndomo ye udia ekikere oro ọyọhọde ekikere nnyịn ye mbufa ntọt oro edide eke idahaemi. Mmọ ẹn̄wam nnyịn nditịm mfiọk nte ererimbot enen̄erede oyom Obio Ubọn̄ Abasi. Mmọ ẹn̄wam nnyịn ndidi mme owo oro ẹnyenede udọn̄ n̄kpọ eke spirit, ẹmi ‘ẹnyenede ekikere Christ.’ (1 Cor. 2:15, 16) Kpukpru emi ekeme ndisọn̄ọ idotenyịn nnyịn onyụn̄ ọkọri ifịk oro isịnde ke ndibuana idotenyịn Obio Ubọn̄ ye mbon en̄wen.—1 Pet. 3:15.
5 Edi akpan n̄kpọ nnyịn owo kiet kiet ndifiọk se etop Obio Ubọn̄ ọwọrọde. Obio Ubọn̄ edi usụn̄ oro Abasi edidade owụt itie edikara esie, etre idiọkido, onyụn̄ ada obufa ererimbot edi—kpa paradise. Jesus ama owụk nnyịn ndinịm enye akpa ke uwem nnyịn. Ana nnyịn idi mbon mbieterọn̄ man idu ke idak ukara esie. (Matt. 6:10, 33) Bọ ọyọhọ ufọn to ifet oro afo enyenede man adara mme edidiọn̄ esie.