Ata Akpan Edinam ke Mbụk Owo
1 Jesus ekedi isọn̄ ke ndausụn̄ Ete esie man editie ntiense ọnọ akpanikọ oro edidade nnyịn ikosịm nsinsi uwem. (John 18:37) Edinam akpanikọ esie tutu osịm n̄kpa ama ada ukpono ọsọk Jehovah, anam enyịn̄ Abasi asana, onyụn̄ ọnọ ufak. (John 17:4,6) Emi edi se ikanamde n̄kpa Jesus edi ata akpan edinam ke ofụri mbụk owo.
2 Tọn̄ọ nte ẹkebot Adam, mfọnmma irenowo iba kpọt akanam ẹdu ke isọn̄ emi. Adam ama odu ke idaha ndida mme utịbe utịbe edidiọn̄ nsọk nditọ esie oro mîkamanake kan̄a. Utu ke oro, enye ke ibụk ama ọsọn̄ ibuot, anamde mmọ ẹnyene ubiomikpe edidu ke itie unana inemesịt oro osụn̄ọde ke n̄kpa. Ke Jesus ama ekedi, enye ama owụt mfọnmma edinam akpanikọ ye nsụkibuot, anamde ifet edinyene nsinsi uwem eberede ọnọ kpukpru mbon oro ẹwụtde mbuọtidem.—John 3:16; Rome 5:12.
3 Idụhe edinam efen oro ẹkemede ndimen ndomo ye n̄kpa uwa Jesus. Enye ama okpụhọde usụn̄ edinam ke mbụk owo. Enye ama ọnọ isọn̄ ka” ban̄a edinam ediwak biliọn owo ẹset ke n̄kpa. Enye ama esịn itiat idakisọn̄ ọnọ nsinsi Obio Ubọn̄ oro edidade utịt ọsọk ukwan̄ido onyụn̄ anam isọn̄ edi paradise. Enye eyesio ofụri ubonowo ke kpukpru orụk ufịk ye ufụn efep ofụri ofụri.—Ps. 37:11; Utom 24:15; Rome 8:21, 22.
4 Kpukpru emi n̄wam nnyịn ndifiọk ntak emi Jesus eketemede mme mbet esie ete ẹsiti n̄kpa imọ ke edinịm Editi kpukpru isua. (Luke 22:19) Ke ima ikọfiọk se enye ọwọrọde, nnyịn ke idori enyịn ndisop idem ye mme esop Mme Ntiense Jehovah ke ofụri ererimbot ke utịn ama okosụhọde ke Friday, April 14. Mbemiso ini oro, ọyọfọn mme ubon nditie ọtọkiet n̄kot mme mbụk Bible ẹban̄ade mme akpatre usen Jesus ke isọn̄ ye uko uko idaha oro enye akadade ọnọ akpanikọ. (Ẹwụt mme ufan̄ikọ oro oyomde ẹkot ke 1995 Calendar nnyịn, April 9-14.) Enye ama onịm uwụtn̄kpọ edisịn idem ke utom Andibot ọnọ nnyịn. (1 Pet. 2:21) Ẹyak nnyịn inam ofụri ukeme nnyịn man ikot mme ufan ye ubon nnyịn, ọkọrọ ye nditọ ukpepn̄kpọ Bible ye mbon eken oro enyenede udọn̄, ẹdidụk akpan mboho emi. Bemiso nam an̄wan̄a se ididade itie ye se mme n̄kpọ idiọn̄ọ ẹdade ẹban̄a.—1 Cor. 11:23-26.
5 Mbiowo ẹkpenyene ndibem iso ntịm idem mfọn mfọn man ẹkụt ẹte ke Ufọkmbono Obio Ubọn̄ odu ke eti idaha onyụn̄ asana. Ẹkpenyene ndinam ndutịm man owo ọbọ mme n̄kpọ idiọn̄ọ. Ẹkpenyene ndinen̄ede nnam ndutịm nnọ edimen mme n̄kpọ idiọn̄ọ nsan̄a n̄kanade. Ẹma ẹnọ nti ekikere ke nte nnyịn ikemede ndiwụt ukpono nnọ Udia Mbubịteyo Ọbọn̄ ke Enyọn̄-Ukpeme eke February 15, 1985, page 19. Eyetịm odot esop ndidiomi ntatara utom an̄wautom ke ndusụk usen mbemiso edinam emi ọkọrọ ye ke usen ifan̄ ke oro ebede.
6 Isua oko, owo 12,288,917 ẹkedụk akpan edinam editi emi ke ofụri ererimbot. Sia enye edide ata akpan usen ke n̄wed usenọfiọn̄ nnyịn, kpukpru nnyịn ikpenyene ndidụk.