Enyọn̄-Ukpeme ye Awake!—Mme Magazine Ẹdude Ẹnọ Usọp Usọp Ini Nnyịn!
1 Ke ndisu prọfesi Bible, mme n̄kpọntịbe oro ẹnyen̄ede ererimbot ke ẹda itie! Nte nnyịn ikerede iban̄a se itịbede ikan nnyịn ikụk ke ererimbot ye n̄ko ke esịt esop ukara Abasi, nnyịn imekeme ndikụt nte edide usọp usọp n̄kpọ nnyịn ndikwọrọ “eti mbụk” Obio Ubọn̄. (Mark 13:10, NW) Emi ọnọ nnyịn ntak ndikaiso nnam utom ukwọrọikọ nnyịn ye ifịk ke ọfiọn̄ April.
2 Man inam ifiopesịt nnyịn kaban̄a utom emi ọkọri ke adianade ye ndifori udọn̄ oro inyenede ke efakutom nnyịn, Enyọn̄-Ukpeme ye Awake! ẹyedọn̄ọ mme ekemini ibuotikọ oro ẹsọn̄ọde ẹtịn̄ se mme ntịn̄nnịm ikọ ẹban̄ade mme n̄kpọntịbe oro ẹtịmede ererimbot ẹwọrọde. Didie ke nnyịn ikeme nditịm nneme oro edidemerede udọn̄ ke mme magazine ẹmi?
3 Anaedi afo eyekeme nditọn̄ọ nneme oro enyenede uforo ebe ke nditiene mme akpan usio-ukot ẹmi: (1) Mek ibuotikọ kiet ke kiet ke mme magazine oro afo ekerede ke mme owo ke n̄kann̄kụk mbufo ẹyema. (2) Sio ikọ m̀mê itien̄wed Abasi oro ẹkotde ẹsịn ke ibuotikọ emi afo onịmde ke eyedemede udọn̄ enyeneufọk. (3) Tịm ibio ibio nneme oro esịnede ufan ufan ekọm, mbụme m̀mê ikọ oro osiode ekikere N̄wed Abasi oro edemerede udọn̄ owụt, ye ikot ofụri esịt ndinọ editobo. Nte afo ekemede ndikụt, emi enen̄ede emem inyụn̄ iwakke n̄kukọhọ. Iso-ọfọn afo eyekeme ndidiana kiet ye asuanetop efen emi afo anamde utom kiet ke utom ukwọrọikọ unyụn̄ utịm nneme kiet.
4 Sia “Awake!” April 22 edemerede mbụme emi, “Are These the Last Days?” (Nte Emi Edi Ukperedem Ini?), afo emekeme ndidụn̄ọde n̄kpọ odude ke idak ibuotikọ oro “Last Days” (Ukperedem Ini) ke page 13 ke n̄wed “Reasoning.” Afo emekeme nditọn̄ọ ke ndidọhọ:
◼ “Nnyịn iwaha ndineme se mme ntịme ntịme n̄kpọntịbe oro ẹkande nnyịn ẹkụk ẹwọrọde. Tịmfiọk se ibuotikọ emi ọdọhọde . . .”
5 “Enyọn̄-Ukpeme” April 1 edemede mbụme emi: “Ido Ukpono—Ibuot Nneme Oro Mînaha Ẹneme?” Ke ini ọnọde magazine emi, afo emekeme ndidọhọ:
◼ “Ẹsiwak ndidọhọ ke ido ukpono edi ibuot nneme kiet oro owo mîkpenyeneke ndineme koro enye enen̄ede okpon eneni. Nso ke afo ekere aban̄a oro?” Ekem tịn̄ tụk ikọ oro odude ke ibuotikọ emi.
6 Afo emekeme ndikama “Enyọn̄-Ukpeme” April 15 ye ibuotikọ oro “Nte Ekeme Ndinyene Akpanikọ Ido Ukpono?” Afo emekeme ndimụm n̄kpan̄utọn̄ ye ntọn̄ọikọ emi:
◼ “Koro ata ediwak ido ukpono ẹdude mfịn, ndusụk owo ẹkere m̀mê ẹkeme ndinyene akpanikọ ido ukpono. Ibuotikọ emi ayarade usụn̄ oro ami ye afo ikemede ndikụt ibọrọ oro ọnọde uyụhọ nnọ mbụme emi. . . .”
7 Mbemiso ọwọrọde an̄wautom, ntak mûnamke ndomonse ke nneme fo ye asuanetop efen man emehe fi? Anaedi afo eyekeme ndibuana mme ekikere oro ẹnyenede ufọn ye kiet eken oro edinamde uforo oro enyenede ọkọri edinyụn̄ ọnọde fi n̄kponn̄kan uko.
8 Nte utịt editịm n̄kpọ emi otịmde-tịm asan̄a ekpere, nnyịn ikpakam itotịm isịn ifịk ndin̄wam mbon esịt akpanikọ ẹfehe ẹwọrọ ke Akwa Babylon. (Edi. 18:4) Enyọn̄-Ukpeme ye Awake! ẹnyene akpan itie ke utom oro owo mîdifiakke inam tutu amama mi. Nnyịn imowụt esịtekọm nte ke Jehovah ọmọnọ nnyịn nti n̄kpọutom ẹmi ndikama!