Nte N̄kpọ Editi Ẹtode Jehovah Ẹnam Nnyịn Idu ke Edidemede ke N̄kan̄ eke Spirit?
1 Andiwet psalm ama otoro Jehovah, ọdọhọde ete: “Mme n̄kpọ editi fo ẹdi se ntiede n̄kere.” (Ps. 119:99, NW) Ikọ Hebrew oro adade ọnọ “mme n̄kpọ editi” ọnọ ekikere nte ke Jehovah anam nnyịn iti se ẹwetde ke mme ibet esie, mme item esie, ye mme ewụhọ esie. Edieke nnyịn inamde n̄kpọ iban̄a, mmọ ẹyedemede nnyịn ke n̄kan̄ eke spirit ẹnyụn̄ ẹnam nnyịn ikop inemesịt.—Ps. 119:2.
2 Nte ikọt Jehovah, nnyịn imesibọ item kpukpru ini. Nnyịn ima ikokop ẹkese ke otu mmọ mbemiso. Okposụkedi nnyịn idarade nsịnudọn̄ emi, nnyịn imenyene ntụhọ ndifre mmọ. (Jas. 1:25) Jehovah ke ima esinọ nnyịn ima ima n̄kpọ editi. Apostle Peter ama ewet ndusụk ke otu n̄kpọ editi ẹmi man ‘edemede ediden̄i esịt nnyịn nditi item ọbọn̄.’—2 Pet. 3:1, 2.
3 Ẹsiti nnyịn ndien ndien ẹban̄a nte ukpepn̄kpọ idemowo ye edidụk mme mbonoesop ẹdide akpan n̄kpọ. Ẹnam mi koro mme edinam ẹmi ẹdide ata akpan n̄kpọ ẹnọ nsọn̄idem eke spirit nnyịn—1 Tim. 4:15; Heb. 10:24, 25.
4 N̄kponn̄kan n̄kpọ-ata oro ndusụk owo ẹnyenede edi ndinam utom oro ẹnọde mme Christian ẹte ẹkwọrọ ikọ. Enye oyom ukeme, iwụk, ye ediyọ. Idem okposụkedi enye oyomde n̄kpọ ekese oto nnyịn, ẹn̄wam nnyịn ‘ndisọn̄ọ nda’ ebe ke ndida ‘mben̄eidem ndikwọrọ gospel emem nsịne nte ikpaukot.’—Eph. 6:14, 15.
5 N̄kpọ oro onụkde nnyịn ndinam utom enyene ndikpon n̄kan ikpîkpu edifiọk se Jehovah oyomde ke ekikere. Apostle Paul eti nnyịn ete ke esịt esinọ nsịnudọn̄ oro nnyịn iyomde man ‘ida inua inyịme inyene edinyan̄a.’ (Rome 10:10) Edieke nnyịn inyenede ọkpọsọn̄ mbuọtidem, edieke esịt nnyịn onyụn̄ amade mme n̄kpọ editi oro ẹtode Jehovah, eyenụk nnyịn ndisioro uyo ntịn̄ ikọ ndinọ enyịn̄ esie itoro.—Ps. 119:36; Matt. 12:34.
6 Ke ini inamde utom ọkpọsọn̄ ke ndinam nti utom, nnyịn nte enende imesidori enyịn nte ke emi eyenọ nnyịn idatesịt. (Eccl. 2:10) Paul owụt ke idatesịt edi mbun̄wụm spirit Jehovah, ndien nnyịn ikpenyene ndiyom ediwak usụn̄ ndiwụt enye. (Gal. 5:22) Peter ama adian do ete ke utịp ‘nsịnifịk ofụri ukeme’ edidi utom ukwọrọikọ oro on̄wụmde mfri, emi edidade idatesịt edi—2 Pet. 1:5-8.
7 Ke ini nnyịn isobode n̄kpọ-ata, nnyịn ikpenyene nditi nsọn̄ọnda mme apostle nte mmọ ẹkedọhọde ete: “Nnyịn [ikemeke] nditre nditịn̄ se nnyịn ikokopde inyụn̄ ikụtde.” (Utom 4:20) Nnyịn imokop nsọn̄idem ndikaiso ke ini nnyịn itide ite ke edinam ntem nnyịn iyenyan̄a idem nnyịn ye mmọemi ẹkopde uyo nnyịn.’—1 Tim. 4:16.
8 Nnyịn iyatke esịt m̀mê nditọhọ ke ntak ibọde mme n̄kpọ editi kpukpru ini. Utu ke oro, nnyịn imenen̄ede idara nti ufọn mmọ. (Ps. 119:129) Ke ndiọkeyo ẹmi, nnyịn imadat esịt nte ke Jehovah akaiso ndinọ nnyịn mme n̄kpọ editi man edemede nnyịn ke n̄kan̄ eke spirit onyụn̄ onụk nnyịn ndisịn ifịk ke ndinam nti utom!—2 Pet. 1:12, 13.