Nso Orụk Owo ke Mbufo Ẹkpedi?
1 Ini edinam ibat ke asan̄a ekpere ọnọ ofụri ubonowo. Bible okot enye “usen Abasi.” Enye edi usen oro ẹdisobode mme idiọkowo; enye n̄ko edi ini ubọhọ ọnọ nti owo. Ẹyekot kpukpru owo ẹmi ẹdude uwem adan̄aoro ẹdinam ibat ẹban̄a usụn̄ oro mmọ ẹkedade uwem mmọ ẹnam n̄kpọ. Ye oro ke ekikere, Peter obụp mbụme ndụn̄ọde ete: “Nso orụk owo ke mbufo ẹkpedi”? Enye ọsọn̄ọ etịn̄ aban̄a ufọn ‘edisana ido, uten̄e Abasi, ye edisọn̄ọ nyom edidi usen Abasi,’ ọkọrọ ye ediyom oro oyomde ‘ẹnana ntọi, ẹnana ndo, ẹnyụn̄ ẹtie ke emem.’—2 Pet. 3:11-14.
2 Edisana Ido ye Uten̄e Abasi: Edisana ido esịne nti utom oro ẹwụtde ukpono ẹnọ mme edumbet Bible. (Titus 2:7, 8) Ana Christian efep edu ererimbot oro ibụk ibụk udọn̄ obụkidem edemerede.—Rome 13:11, 14.
3 Ẹdọhọ ke “uten̄e Abasi” edi “ọkpọkpọ ima ẹnyenede ẹnọ Abasi, emi otode esịt oro ntotụn̄ọ esịtekọm ẹnyenede ẹban̄a mme edu esie oro ẹmade edemerede.” Ifịk oro isịnde ke utom ukwọrọikọ edi n̄wọrọnda usụn̄ oro nnyịn iwụtde edu emi. Uduak nnyịn ndikwọrọ ikọ aka anyan akan edinam sia onyụn̄ anade ẹnam; enye oto ntotụn̄ọ ima oro inyenede inọ Jehovah. (Mark 12:29, 30) Sia utọ ima oro onụkde nnyịn, nnyịn ise utom ukwọrọikọ nnyịn nte n̄wọrọnda usụn̄ ndiwụt uten̄e Abasi oro inyenede. Sia anade nnyịn inyene uten̄e Abasi kpukpru ini, udeme nnyịn ke utom ukwọrọikọ ekpenyene ndinyene iwụk. Enye ekpenyene ndidi akpan ubak ndutịm utom nnyịn eke urua ke urua.—Heb. 13:15.
4 ‘Ndisọn̄ọ nyom’ edidi usen Jehovah ọwọrọ ndinyene enye akpa ke ekikere nnyịn eke usen ke usen, idehede iyak enye akabade etie nnyịn ukpọn̄ ukpọn̄ ke ekikere. Enye ọwọrọ ndinịm mme udọn̄ n̄kpọ Obio Ubọn̄ akpa ke uwem nnyịn.—Matt. 6:33.
5 Ndinana Ntọi, Nnana Ndo, Nnyụn̄ Ntie ke Emem: Nte ubak akwa otuowo, nnyịn ‘imeyet ọfọn̄idem nnyịn inam afia ke iyịp Eyenerọn̄.’ (Edi. 7:14) ‘Ndinana ntọi’ ọwọrọ, ndien, nte ke ana nnyịn isọn̄ọ ikpeme edisana uwem nnyịn oro iyakde inọ mbak ndek ererimbot emi edinam enye edehe. Nnyịn ‘inana ndo’ ebe ke ndisịn ndiyak edu uyom inyene ye edu unana uten̄e Abasi abiat edu Christian nnyịn. (Jas. 1:27; 1 John 2:15-17) Nnyịn iwụt ke nnyịn ‘itie ke emem’ ebe ke ndiwụt “emem Abasi” ke kpukpru se nnyịn inamde ye mmọ en̄wen.—Phil. 4:7; Rome 12:18; 14:19.
6 Edieke nnyịn ikụtde unen ke ndikpeme mbiọn̄ọ mme n̄kpọ ererimbot oro ẹsabarede owo, nnyịn ididehede ‘ibiet eyo emi,’ emi Jehovah ama okobiom ikpe. Utu ke oro, nti utom nnyịn ẹyen̄wam mmọ en̄wen ndikụt “nte anam n̄kpọ Abasi ye owo eke mînamke n̄kpọ esie ẹsan̄ade isio.”—Rome 12:2; Mal. 3:18.
7 Nnyịn ke isak iso ise edidụk Mbono District “Idara Idara Mme Anditoro” ke ọfiọn̄ ifan̄ ẹmi ẹdide, ndien nte eyịghe mîdụhe edemede-owo-ukpọn̄ udia eke spirit oro eyenam udọn̄ nnyịn ndiwụt uten̄e Abasi ototịm ọsọn̄. Ediwak mbufa owo ẹtiene ẹnyene udọn̄ emi. Nnyịn imekeme ndidi mme andinam ẹnyene edidiọn̄ ebe ke ndin̄wam mmọ ẹbuana ke an̄wautom ke August.
8 Ke ini nnyịn isịnde ifịk inyene “nti ido,” emi ọnọ enyịn̄ Jehovah ubọn̄, anam esop ọsọn̄ idem, mmọ en̄wen ẹnyụn̄ ẹbọ ufọn. (1 Pet. 2:12) Akpakam nnyịn idi mme utọ owo oro kpukpru ini.