Ndibiere Mme Mfịna ke Ima Christian
1 Leta James, ke ibuot 4, ufan̄ikọ 1, obụp mbụme emi: “Ekọn̄ ye en̄wan ẹto m̀mọ̀n̄ ẹdu ke otu mbufo?” Enye ọbọrọ in̄wan̄în̄wan̄ ete ke oto ediyom uwọrọiso eke obụkidem m̀mê udọn̄ edidi n̄kpọ n̄kan mbon efen. Nte an̄wan̄ade, ke ini spirit en̄wan odude, ẹnyụn̄ ẹyakde ufụp ye ndomoidem ẹdọn̄ n̄kam ke esop, unana ima ye ndutịme isitreke ndidu ke ufọk mbon mbuọtidem.—Gal. 5:15.
2 En̄wan: Ndusụk owo isikam ikereke ite ke en̄wan, emi edide ediwụt iyatesịt, edi idiọkn̄kpọ emi ẹkemede ndida nsio owo mfep ke esop. Ke ndusụk ubon mbon ererimbot, idịghe esen n̄kpọ ebe ndimia n̄wan esie ke mme ọkpọkpọ ntak m̀mê ke ini ayatde enye esịt. Didie ke esop edise utọ n̄kpọ oro edieke enye abuanade mme andibuana ke esop? Ke etịn̄de n̄kpọ aban̄a utọ ebeubọk ataata umia oro, Enyọn̄-Ukpeme eke November 1, 1988, page 22, ikpehe ekikere 11, ọdọhọ ubak ubak ete: “Akpana mbiowo esop ẹda ini ẹdụn̄ọde ikọ aban̄ade imia esuene ke ini abuanade Christian iba ke ndọ oro enyenede mfịna, ndien ẹkeme ndidi se ẹsiode ẹfep ke esop.” N̄wed Abasi ọdọhọ ete ke “akananam baba owo kiet isuaha obụkidem esie.” Esop Abasi iyọhọ mme amia ibanndọ.—Eph. 5:29.
3 Nte Ẹkpenamde N̄kpọ ke Ini Mme Mfịna Ẹdahade Ẹda: Ke John 13:34, 35 Ọbọn̄ nnyịn Jesus Christ ọkọdọhọ ete ke ima ekpenyene ndinịm ata mme anditiene enye idiọn̄ọ. Ke akade iso etịn̄ n̄kpọ aban̄a emi apostle Paul ama abat nte ima mme ata Christian akpanamde n̄kpọ. (Kot 1 Corinth 13:4-7.) N̄ko ke 1 Peter 4:8, enye ọdọhọ ete ke ‘ima ofofụk ekese idiọkn̄kpọ.’ Nte ima fo ọsọn̄ ekem ndifụk mme ndudue m̀mê mme idiọkn̄kpọ oro ekemmọ andinịm ke akpanikọ m̀mê andibuana ke ubon anamde fi? Domo ndikọri mme edu oro ẹdin̄wamde fi anam n̄kpọ ima ima ye nditọete fo ye mme andibuana ke ubon.
4 Mme Usụn̄ Edibiere Mme Mfịna ke Ima: Ndiwụt edikere mban̄a ọsọn̄ọ edidianakiet ke otu mme asan̄autom Jehovah. Nte ededi, ke ini ke ini, mme ọkpọkpọ mfịna ẹkeme ndidemede. Ke ini n̄kpọsọn̄ mfịna ẹbuanade, mme Christian ẹnyene nditiene item Jesus oro ẹwetde ke Matthew 18:15-17. Tịmfiọk akpa usio-ukot. Edi ndinyene nneme ye eyenete fo ke ndịbe. Ye nso uduak? ‘Edifiak nda eyenete fo nnyene.’ Ọyọhọ usio-ukot iba (edieke oyomde) edi afo ndisan̄a ye owo kiet m̀mê iba n̄kosobo ye owo oro “man ke inua ntiense iba m̀mê ita kpukpru ikọ ẹkpesọn̄ọ ẹda.” Ke ediwak idaha ekeme ndidi idikam iyomke ẹnam ọyọhọ usio-ukot ita.
5 Se Ẹnyenede Ndikere Mban̄a: Mbemiso anamde item Matthew 18:15-17, kere nte idiọkn̄kpọ oro ẹnamde fi okponde eketre. Enyọn̄-Ukpeme eke February 1, 1982, page 17-20, ọdọhọ ete ke mmọ ẹdi “me idiọkn̄kpọ oro okponde oro ekemede ndida n̄kosịm owo ndidi se ebịnde efep ke esop,” utọ nte edidọk m̀mê idiọk iban̄a edem. Owo ikpenyeneke ndikpe ikpe nnọ owo ke edidọk ke ini mbon oro n̄kpọ emi abuanade mîdaha Matthew 18:15-17 isịn ke edinam. (Se n̄ko n̄wed Utom Nnyịn, page 142-145.) Owo oro ẹduede n̄ko ekpenyene ndibụp idemesie, ‘Nte mmekeme ndidahado nnọ nnyụn̄ mfre mban̄a?’—Col. 3:13.
6 Ẹsịn udọn̄ ẹnọ mme Christian ndibịne mme n̄kpọ eke ẹnamde emem odu. (Rome 14:19; 1 Pet. 3:10-12) Esịt esop ikpedịghe an̄waekọn̄ ndida n̄n̄wana ekọn̄ ye kiet eken, edi ekpedi itie ifụre eke spirit. Ntre edieke mme mfịna ẹdahade ẹda, akpakam nnyịn idu ke edidemede ndibiere mmọ ke ima Christian.