Ẹdi Mme Andinanam—Idịghe Sụk Mme Andikokop
1 Mme ata Christian mfịn ẹda item Bible oro ọdọhọde ẹdi mme anam-ikọ, idịghe sụk mme andikokop, ẹsịn ke edinam. (Jas. 1:22) Emi anam mmọ ẹdi ata isio ye mbon ẹmi, okposụkedi ẹdọhọde nte idide Christian, ẹnamde ikpîkpu utom n̄kpọkinua ẹnọ Abasi. (Isa. 29:13) Jesus ama etịn̄ in̄wan̄în̄wan̄ ete ke ẹdinyan̄a mbon oro ẹnamde uduak Abasi kpọt.—Matt. 7:21.
2 Utuakibuot eke mîsan̄ake ye utom Abasi iwọrọke n̄kpọ. (Jas. 2:26) Ntre nnyịn ikpenyene ndibụp idem nnyịn ite, ‘Didie ke mme utom mi ẹwụt ke mmenyene ata mbuọtidem? Nso iwụt ite ke mmenen̄ede ndu uwem ekekem ye se nnịmde ke akpanikọ? Didie ke n̄keme ndikpebe Jesus ata ọyọhọ ọyọhọ?’ Mme ibọrọ esịt akpanikọ emi inọde ke mme mbụme ẹmi ẹyen̄wam nnyịn ikụt n̄kọri oro nnyịn inamde m̀mê osụk oyomde inam ke edinam uduak Abasi.
3 Nte mme anditiene Jesus, ana nnyịn inyene ukem akpan utịtmbuba ke uwem nte enyeoro andiwet psalm eketịn̄de ete: “Nnyịn ida Abasi itoro ofụri usen, iyenyụn̄ ikọm enyịn̄ fo ke nsinsi.” (Ps. 44:8) Ido Ukpono Christ edi usụn̄uwem emi owụtde idemesie kpukpru usen ye ke kpukpru se inamde. Nso uyụhọ ke nnyịn ikop ntem nte nnyịn iwụtde udọn̄ ofụri esịt nnyịn nditoro Jehovah ke kpukpru edinam nnyịn!—Phil. 1:11.
4 Ndinọ Jehovah Itoro Abuana Se Ikande Edidu Edinen Uwem: Ke ekpedide ofụri se Abasi oyomde edi eti eduuwem, nnyịn ikpekeme n̄kukụre ndiwụk ntịn̄enyịn ke ndinam edu nnyịn ọfọn. Nte ededi, utuakibuot nnyịn n̄ko abuana editan̄a mme utịbe utịbe edu Jehovah ye an̄wan̄wa editan̄a enyịn̄ esie!—Heb. 13:15; 1 Pet. 2:9.
5 An̄wan̄wa edikwọrọ eti mbụk edi kiet ke otu akpan utom oro nnyịn inamde. Jesus ama ayak uwem esie esịn ke utom emi sia ọkọfiọkde ke emi ọwọrọ nsinsi uwem ọnọ mbon ẹmi ẹkpan̄de utọn̄. (John 17:3) Mfịn “utom ikọ Abasi” edi akpan n̄kpọ kpasụk ntre; enye edi n̄kukụre usụn̄ emi ẹkemede ndida nnyan̄a mme owo. (Utom 6:4; Rome 10:13) Ke ifiọkde akpakịp ufọn ẹmi ẹdude, nnyịn imekeme ndifiọk ntak emi Paul eketemede nnyịn ete ‘ikwọrọ ikọ Abasi’ inyụn̄ ‘isịn ifịk inam emi.’—2 Tim. 4:1b, 2.
6 Nditoro Jehovah ekpenyene nso udomo ke uwem nnyịn? Andiwet psalm ọkọdọhọ ete ke enye odu imọ ke ekikere ofụri usen. Nte itiehe nnyịn ke idem ukem ntre? Ih, nnyịn iyenyụn̄ ida kpukpru edisobo oro isobode ye owo en̄wen nte idaha oro edidade osịm edinyene nneme mban̄a enyịn̄ Jehovah. Nnyịn iyeyom mme ifet ẹmi ẹdotde man iwọn̄ọde nneme nnyịn ika mme n̄kpọ eke spirit. Nnyịn n̄ko iyedomo ndibuana kpukpru ini ke utom an̄wautom oro esop odiomide. Mbon oro idaha mmọ ẹyakde ẹkeme ndinen̄ede n̄kere mban̄a utom usiakusụn̄, sia emi esin̄wamde nnyịn inịm utom ukwọrọikọ akpa kpukpru usen ke uwem nnyịn. Ikọ Abasi ọn̄wọn̄ọ ọnọ nnyịn ete ke edieke ikade iso idi mme anam uduak Abasi, nnyịn iyekop inemesịt.—Jas. 1:25.