Nte Ẹkemede Ndida N̄wed Ifiọk Nnam Mme Mbet
1 Utịtmbuba oro kpukpru Christian ẹyomde edi ndikpep mbon en̄wen akpanikọ nnyụn̄ nnam mbon oro “ẹnyenede esịt akpanikọ kaban̄a nsinsi uwem” ẹkabade ẹdi mbet. (Utom 13:48, NW; Matt. 28:19, 20) Esop Jehovah emesịn nnyịn utịbe utịbe n̄kpọutom ke ubọk emi ikemede ndida nnam emi—kpa n̄wed oro Ifiọk Oro Adade Osịm Nsinsi Uwem. Ibuotikọ esie osio akwa ufọn oro mme ukpepn̄kpọ Bible ẹnyenede owụt, koro uwem nsinsi ọkọn̄ọ ke ndinyene ifiọk Jehovah, ata Abasi kierakiet, ye eke Eyen esie, kpa Jesus Christ.—John 17:3.
2 N̄wed Ifiọk idahaemi edi akpan n̄wed N̄ka ndikama nnịm mme ukpepn̄kpọ Bible. Ke ndikama enye, nnyịn imekeme ndikpep akpanikọ ke mmemmem, in̄wan̄în̄wan̄, ye ibio ibio usụn̄. Emi eyen̄wam ẹsịm esịt mbon ẹmi ẹnọde ukpep. (Luke 24:32) Nte ededi, oyom ada ukpepn̄kpọ akama nti usụn̄ unọ ukpep. Ẹtịm esịne-esịt emi kaban̄a uduak oro man owụt mme ekikere ye mme n̄kpọ editi kaban̄a ido unọ ukpep oro ẹkụtde unen. Ye mbufiọk, ndien nte ekemde ye mme idaha owo kiet kiet, afo sụn̄sụn̄ emekeme ndida ndusụk m̀mê kpukpru ekikere oro ẹwụtde mi nsịn ke edinam. Tịm esịne-esịt emi nịm, nyụn̄ siwak ndika mbịne enye. Nsio nsio akpan n̄kpọ ẹmi ẹdude ke enye ẹkeme ndin̄wam fi otịm okụt unen, ke ndikama n̄wed Ifiọk nnam mme mbet.
3 Nịm Ukpepn̄kpọ Bible Oro Enyenede N̄kọri: Nyene ọkpọkpọ udọn̄ esịt akpanikọ ke idem eyen ukpepn̄kpọ nte owo emi ekemede ndikabade ndi mbet Christian ye eyenete eren m̀mê eyenete an̄wan eke spirit. Tie ufiop ufiop, ufan ufan, nyụn̄ nyene ifiopesịt. Ebede ke ndidi eti andikpan̄ utọn̄, afo emekeme ndidi ndifiọk owo enye eken—idaha esie ke uwem—emi edin̄wamde fi ọfiọk mfọnn̄kan usụn̄ ndin̄wam enye ke n̄kan̄ eke spirit. Nyịme ndiyak idemfo nnọ ke ntak eyen ukpepn̄kpọ.—1 Thess. 2:8.
4 Ndondo oro ẹma ẹketọn̄ọ ukpepn̄kpọ, ẹtoro ẹte ẹkpep mme ibuot n̄wed Ifiọk ke adiana ke adiana. Emi eyenam eyen ukpepn̄kpọ enyene ifiọk akpanikọ ke n̄kaiso usụn̄, sia n̄wed oro atatde ibuot nneme Bible ke adiana ke adiana ke usụn̄ otịmde owụt mbufiọk. Nam ukpepn̄kpọ oro emem onyụn̄ enyene inem man otodo esịne ufiop onyụn̄ aka iso. (Rome 12:11) Ọkọn̄ọde ke mme idaha ye ukeme eyen ukpepn̄kpọ, afo emekeme ndikụre ekese ibuot ke ikpehe ini ukpepn̄kpọ kiet edide hour kiet m̀mê n̄kpọ ntre, ye unana edinam ukpepn̄kpọ etie itọk itọk. Nditọ ukpepn̄kpọ ẹyenam eti n̄kọri ke ini andikpep ye eyen ukpepn̄kpọ ẹdude ke ini oro ẹnịmde ẹnọ ukpepn̄kpọ kpukpru urua. Ntem, ye ekese owo, ẹkeme ndikụre mme ibuot 19 ke n̄wed oro ke n̄kpọ nte ọfiọn̄ itiokiet m̀mê n̄kpọ ntre.
5 Tọn̄ọ ikpehe kiet kiet ye ibio ibio utịn̄ikọ oro edemerede udọn̄ ke ukpepn̄kpọ oro. Afo eyekụt nte ke enyịn̄ ibuot kiet kiet edi ibuotikọ esie, emi oyomde ẹsọn̄ọ ẹtịn̄. Ekpri ibuotikọ kiet kiet osio akpan n̄kpọ kiet owụt, an̄wamde fi ndinyene ibuotikọ ibuot oro ke ekikere. Kpeme mbak udutịn̄ ikọ ukaha. Utu ke oro, domo ndinam eyen ukpepn̄kpọ etịn̄ ikọ. Ndibụp eyen ukpepn̄kpọ mme akpan mbụme ndausụn̄, ọkọn̄ọde ke se enye ama ọkọfiọk, eyen̄wam enye ekere n̄kpọ onyụn̄ edisịm nnennen ubiere. (Matt. 17:24-26; Luke 10:25-37; se Ñwed-item Ufök-ñwed, page 50, ikpehe ekikere 10.) Yịre ketket ke ntọt oro ẹmịn̄de-mịn̄ ke n̄wed Ifiọk. Ndida mme n̄kpọ efen efen ndisịn ekeme ndiwọn̄ọde ntịn̄enyịn m̀mê ofụk mme akpan n̄kpọ onyụn̄ anam ukpepn̄kpọ oro ada ini. (John 16:12) Edieke ẹbụpde mbụme oro mînyeneke ebuana ye ibuotikọ oro ẹkpepde, ke ediwak idaha afo emekeme ndise mban̄a oro ke ikpehe ini oro okụrede. Emi eyen̄wam fi ndikụre ukpepn̄kpọ urua oro ye unana ntịn̄enyịn ndiwọn̄ọde. Nam an̄wan̄a eyen ukpepn̄kpọ nte ke ẹyebọrọ ekese ọkpọkpọ mbụme esie ke ukperedem nte ukpepn̄kpọ akade iso.—Se Ñwed-item Ufök-ñwed, page 93, ikpehe ekikere 14.
6 Edieke eyen ukpepn̄kpọ ọsọn̄ọde onịm Abasi-Ita-ke-Kiet, ukpọn̄ ikpaha ke nsinsi, hell ikan̄, m̀mê mme utọ nsunsu ukpepn̄kpọ oro, ndien se ẹwetde ke n̄wed Ifiọk mîyụhọke enye, afo emekeme ndinọ enye n̄wed Reasoning m̀mê n̄wed en̄wen oro enemede ibuotikọ oro. Dọhọ enye ke imọ iyeneme ibuotikọ oro ye enye ke enye ama ekere aban̄a se enye okotde.
7 Nditọn̄ọ nnyụn̄ mberi ukpepn̄kpọ oro ye akam kaban̄a ndausụn̄ ye edidiọn̄ Jehovah anam ukpepn̄kpọ oro enyene uku, anam owo enyene idaha ekikere oro owụtde ukpono, onyụn̄ odụri ntịn̄enyịn ebịne Jehovah nte ata Andikpep. (John 6:45) Edieke eyen ukpepn̄kpọ osụk esidade un̄wọn̄, nte ini akade afo emekeme ndidọhọ enye ke ini ukpepn̄kpọ ete etre.—Utom 24:16; Jas. 4:3.
8 Da N̄wed Abasi, Mme Uwụtn̄kpọ, ye Mme Mbụme Ndụn̄ọde Kpep N̄kpọ Uforo Uforo: Inamke n̄kpọ m̀mê ikafan̄ ke enye ekebem iso ekpep ibuotikọ oro, andikpep emi enyenede usọ eyedụn̄ọde ukpepn̄kpọ kiet kiet ye akpan eyen ukpepn̄kpọ ke ekikere. Emi esin̄wam ndibem iso ndori enyịn ke ndusụk mbụme oro eyen ukpepn̄kpọ edibụpde. Man ekpep n̄kpọ uforo uforo, nyene in̄wan̄în̄wan̄ ifiọk ban̄a mme akpan n̄kpọ odude ke ibuot oro. Kụbọde mme itien̄wed Abasi man okụt nte mmọ ẹnyenede ebuana ke ukpepn̄kpọ oro, nyụn̄ biere m̀mê ewe ke ẹkpekot ke ini ukpepn̄kpọ. Kọk ibuot ban̄a nte afo ekemede ndida mme uwụtn̄kpọ ye mme mbụme ndụn̄ọde ẹdude ke utịt ibuot oro nnọ ukpep.
9 Ebede ke ndida mme itien̄wed Abasi nnam n̄kpọ uforo uforo, afo eyen̄wam eyen ukpepn̄kpọ ọfiọk ete ke imọ ke akpanikọ ikpep Bible. (Utom 17:11) Ke adade ekebe oro “Da Bible Fo Nam N̄kpọ Mfọn Mfọn,” ke page 14 ke n̄wed Ifiọk, kpep enye nte ẹkemede ndiyom mme itien̄wed Abasi. Wụt enye nte ẹkemede ndidiọn̄ọ mme ufan̄ikọ ẹkotde-kot ẹsịn ke ukpepn̄kpọ oro. Nte ini ayakde, kụbọde nyụn̄ kot mme itien̄wed Abasi oro ẹsiakde-siak oro owo mîkotke-kot. Dọhọ eyen ukpepn̄kpọ etịn̄ nte mmọ ẹsọn̄ọde m̀mê ẹnamde se idude ke ikpehe ekikere oro an̄wan̄a. Sọn̄ọ tịn̄ mme akpan n̄kpọ ke itien̄wed oro man otodo enye edi edifiọk mme ntak ẹdude kaban̄a mme akpan n̄kpọ ke ukpepn̄kpọ oro. (Neh. 8:8) Ke ofụri ofụri, ufọn idụhe inọ andikpep ndida mme itien̄wed efen efen ndisịn ke ukpepn̄kpọ n̄kan mbon oro n̄wed emi ọnọde. Tịn̄ ban̄a ufọn edifiọk mme enyịn̄ ye nte ẹtịmde mme n̄wed Bible. Ekeme ndidi n̄kpọ un̄wam nnọ eyen ukpepn̄kpọ ndikot page 27-30 ke Enyọn̄-Ukpeme, June 15, 1991. Ke ini odotde, sịn udọn̄ nọ edikama New World Translation. Afo emekeme ndiwụt sụn̄sụn̄ nte ẹkemede ndida nsio nsio ikpehe esie nnam n̄kpọ, utọ nte mme ikọ mben n̄wed ye mme ikọ Bible ẹsion̄ode ẹwet ẹtiene abisi enyịn̄.
10 Ukpepn̄kpọ 34 ke Ñwed-item Ufök-ñwed Utom Ukara-Abasi anam an̄wan̄a nte uwụtn̄kpọ esidemerede idaha ukere n̄kpọ owo onyụn̄ anam edi mmemmem ndimụm mbufa ekikere. Mmọ ẹbuan ikike ye ntụk, anamde etop oro asan̄a ye odudu emi mîsiwakke nditịbe ke ikpîkpu nneme. (Matt. 13:34) N̄wed Ifiọk enyene ekese uwụtn̄kpọ unọ ukpep oro ẹmemde edi ẹkopde odudu. Ke uwụtn̄kpọ, uwụtn̄kpọ oro ẹdade ke ibuot 17 ọkọri esịtekọm kaban̄a nte Jehovah ke usụn̄ eke spirit ọnọde udia, edisịnen̄kpọ, ye itie udakibuot ebe ke esop Christian. Ẹkeme ndikama ndiye ndise uwụtn̄kpọ ke n̄wed Ifiọk uforo uforo ke ndidemede mme ntụk. Ke idak ekpri ibuotikọ oro “Idara Idara Ediset ke N̄kpa,” ke page 185, ẹyesọn̄ọ odudu oro ikpehe ekikere 18 enyenede ebe ke ndidọhọ eyen ukpepn̄kpọ afiak aka edem ekese ndise oro ke page 86. Emi ekeme ndinụk enye ndikere mban̄a ediset ke n̄kpa nte ata idem n̄kpọ ke idak Obio Ubọn̄ Abasi.
11 Oyom nditọ ukpepn̄kpọ Bible ẹnam n̄kọri eke spirit ke ukpepn̄kpọ kiet kiet. Ke ntak emi, kûkpu ndibụp mme mbụme ndụn̄ọde ke ekebe “Domo Ifiọk Fo Se” oro odude ke utịt ibuot kiet kiet. Yom se ikande edinọ nnennen ibọrọ ke se ẹkpepde. Ẹtịm ekese mbụme ẹmi man ẹkop ọkpọkpọ ibọrọ otode esịt. Ke uwụtn̄kpọ, se page 31, ke ebiet emi ẹbụpde eyen ukpepn̄kpọ ẹte: “Mme edu Jehovah Abasi ewe ke afo enen̄ede ama?”—2 Cor. 13:5.
12 Nọ Nditọ Ukpepn̄kpọ Ukpep Nditịm Idem nnọ Ukpepn̄kpọ: Eyen ukpepn̄kpọ oro ebemde iso okot ukpepn̄kpọ, onịmde idiọn̄ọ ke mme ibọrọ, onyụn̄ ekerede nte ekemede nditịn̄ mmọ ke mme ikọ idemesie eyenam usọp usọp n̄kọri eke spirit. Ebede ke uwụtn̄kpọ ye nsịnudọn̄ fo, afo emekeme ndinọ enye ukpep nditịm idem nnọ ukpepn̄kpọ. Wụt enye n̄wed fo, emi afo ama okonịm idiọn̄ọ mîdịghe emi ama okodụri udịm ke mme ọkpọ ikọ ye mme ubak udịmikọ. Nam an̄wan̄a nte ẹkemede ndikụt nnennen ibọrọ nnọ mme mbụme oro ẹmịn̄de-mịn̄. Nditịm idem ke ibuot kiet ọtọkiet ekeme ndin̄wam eyen ukpepn̄kpọ. Sịn udọn̄ nọ enye etịn̄ ikọ ke mme ikọ idemesie. Edi n̄kukụre do ke ana in̄wan̄în̄wan̄ m̀mê ukpepn̄kpọ oro an̄wan̄a enye. Edieke enye okotde ibọrọ esie oto n̄wed, afo emekeme ndinam enye ekere n̄kpọ ebe ke ndidọhọ enye etịn̄ nte enye edinamde n̄kpọ emi an̄wan̄a owo en̄wen ke ikọ idemesie.
13 Sịn udọn̄ nọ eyen ukpepn̄kpọ esikot mme itien̄wed Abasi oro owo mîkotke-kot isịn nte ubak ntịmidem esie eke urua ke urua, sia ekemede ndidi ini ididụhe ndikot kpukpru mmọ ke ini ukpepn̄kpọ. Toro enye ke ukeme oro enye esịnde ke mme ukpepn̄kpọ esie. (2 Pet. 1:5; se Enyọn̄-Ukpeme, August 15, 1993, page 13-14, kaban̄a mme ekikere efen efen ke se andikpep ye eyen ukpepn̄kpọ ẹkemede ndinam man ẹkọri ubọ ukpep ke ukpepn̄kpọ Bible.) Ke usụn̄ emi, ke ẹnọ eyen ukpepn̄kpọ ukpep nditịm idem nnọ nnyụn̄ nnọ nti ibọrọ ke mme mbonoesop. Enye eyekpep nte ẹforide nti edu ukpepn̄kpọ idemowo oro editịmde enye idem ọnọ edinam n̄kọri ke akpanikọ ke ama okokụre ọkpọkpọ ukpepn̄kpọ Bible esie ke n̄wed Ifiọk.—1 Tim. 4:15; 1 Pet. 2:2.
14 Da Nditọ Ukpepn̄kpọ Wụt Esop Jehovah: Edi mbiomo anam-mbet ndidụri udọn̄ eyen ukpepn̄kpọ n̄wụt esop Jehovah. Eyen ukpepn̄kpọ eyesọp ọkọri osịm ọyọhọ idaha ke n̄kan̄ eke spirit edieke enye ọdiọn̄ọde onyụn̄ adarade esop onyụn̄ ọfiọkde ufọn odude ke owo ndikabade ndi ubak esie. Nnyịn iyom enye okop inemesịt ke ndibuana ye ikọt Abasi nnyụn̄ nsak iso nse edidu ye nnyịn ke Ufọkmbono Obio Ubọn̄, ke ebiet emi enye ekemede ndibọ un̄wam eke spirit ye eke ntụk oro esop Christian ọnọde.—1 Tim. 3:15.
15 Ẹkesio ediye uduot ekpri n̄wed oro Mme Ntiense Jehovah—Ẹdiana Kiet Ẹnam Uduak Abasi ke Ofụri Ererimbot man ẹnam mme owo ẹfiọk n̄kukụre esop oro Jehovah adade mfịn ndiyọhọ uduak esie. Ndondo oro ẹma ẹketọn̄ọ ukpepn̄kpọ, ntak mûnịmke idem kiet ye eyen ukpepn̄kpọ oro? Toto ke ata ntọn̄ọ, ka iso ndinọ eyen ukpepn̄kpọ ikot ndidi mme mbonoesop. Nam nte ẹsinịmde an̄wan̄a. Afo emekeme ndisian enye ibuotikọ utịn̄ikọ an̄wa en̄wen mîdịghe owụt enye ibuotikọ emi ẹdinemede ke Ukpepn̄kpọ Enyọn̄-Ukpeme. Ndusụk emekeme ndida enye n̄kowụt Ufọkmbono Obio Ubọn̄ ke ini mbonoesop mîdụhe man osụhọde ndịk ekededi emi enye ekemede ndinyene mban̄a edika obufa itie ke akpa ini. Eyedi afo emekeme ndinam n̄kpọisan̄ odu ọnọ edika mme mbonoesop. Ke ini enye odụkde, nam enye okop idatesịt ye ifụre. (Matt. 7:12) Men enye wụt Mme Ntiense eken, esịnede mbiowo. Nte ẹdoride enyịn, enye eyetọn̄ọ ndise esop nte ubon esie eke spirit. (Matt. 12:49, 50; Mark 10:29, 30) Afo emekeme ndinịm utịtmbuba nnọ enye, utọ nte edidụk mbonoesop kiet kpukpru urua, ekem emenede utịtmbuba oro sụn̄sụn̄.—Heb. 10:24, 25.
16 Nte ukpepn̄kpọ Bible akade iso ke n̄wed Ifiọk, sọn̄ọ tịn̄ n̄kpọ ke mme ikpehe oro owụtde ufọn edibuana kpukpru ini ke mme mbonoesop. Se akpan akpan page 52, 115, 137-139, 159, ọkọrọ ye ibuot 17. Tịn̄ ntotụn̄ọ ekikere esịtekọm oro afo enyenede aban̄a esop Jehovah. (Matt. 24:45-47) Tịn̄ n̄kpọ in̄wan̄în̄wan̄ ban̄a esop n̄kann̄kụk ye se afo ekpepde ke mme mbonoesop. (Ps. 84:10; 133:1-3) Ọkpọfọn edieke eyen ukpepn̄kpọ ekpesede kpukpru vidio N̄ka, ọtọn̄ọde ye Jehovah’s Witnesses—The Organization Behind the Name. Kaban̄a mme ekikere efen efen ke nte ẹkemede ndidụri udọn̄ n̄wụt esop, se Enyọn̄-Ukpeme eke May 15, 1985, page 14-18 ye esịne-esịt Utom Obio Ubọn̄ Nnyịn eke July 1993.
17 Sịn Udọn̄ nọ Nditọ Ukpepn̄kpọ Ndinọ Mbon En̄wen Ikọ Ntiense: Utịtmbuba nnyịn ke ndikpep mme owo n̄kpọ edi ndinam mme mbet oro ẹnọde ikọ ntiense ẹban̄a Jehovah. (Isa. 43:10-12) Oro ọwọrọ ke andikpep ekpenyene ndisịn udọn̄ nnọ eyen ukpepn̄kpọ etịn̄ ọnọ mbon en̄wen aban̄a se enye ekpepde oto Bible. Ẹkeme ndinam emi mfefere mfefere ke ndibụp: “Didie ke afo akpanam akpanikọ emi an̄wan̄a ubon fo?” m̀mê “Ewe itien̄wed Abasi ke akpada ọsọn̄ọ emi ọnọ ufan fo?” Sọn̄ọ tịn̄ mme akpan itie emi ẹsịnde udọn̄ ẹnọ edinọ ikọ ntiense ke n̄wed Ifiọk, utọ nte page 22, 93-95, 105-106, ọkọrọ ye ibuot 18. Ke ini odotde, ẹkeme ndinọ eyen ukpepn̄kpọ oro ndusụk tract akama ke ndinọ mbon en̄wen ikọ ntiense ido nneme. Nọ ekikere ete enye okot mbonubon esie ẹtiene ẹdụk ukpepn̄kpọ esie. Ndi enye enyene mme ufan ẹmi ẹkpemade ndikpep n̄kpọ n̄ko? Dọhọ enye asian fi mbon ẹmi ẹnyenede udọn̄.
18 Ebede ke ndidụk Ufọkn̄wed Utom Ukara Abasi ye Esoputom, mbet ini iso emi ekeme ndibọ ukpep ye nsịnudọn̄ efen efen emi edin̄wamde enye akabade edi asuanetop eti mbụk. Ke ini enye owụtde udọn̄ ndisịn enyịn̄ ke ufọkn̄wed m̀mê ndikabade ndi asuanetop oro mînaha baptism, mme edumbet oro ẹwụtde ke page 98 ye 99 ke n̄wed Utom Nnyịn eyenyene n̄kpọ ndinam. Edieke odude ikpehe eduuwem esie emi anamde enye etre ndidot, afo emekeme ndidụn̄ọde n̄wed N̄ka nyom un̄wam oro enyenede ebuana ke n̄kpọ oro onyụn̄ abuana ye enye. Ke uwụtn̄kpọ, eyen ukpepn̄kpọ ekeme ndinyene mfịna ke ndikan mbumehe un̄wọn̄ m̀mê n̄kpọsọn̄ ibọk eken. N̄wed Reasoning owụt nti ntak N̄wed Abasi ẹmi ẹnamde mme Christian ẹfep utọ ndiọi edu oro, ndien ke page 112 enye owụt usụn̄ oro okụtde unen ke ndin̄wam mbon en̄wen ẹbọhọ. Bọn̄ akam ye enye ban̄a n̄kpọ emi, ekpepde enye ndiberi edem ke Jehovah kaban̄a un̄wam.—Jas. 4:8.
19 Ẹwụt ndutịm oro ẹnyenede nditiene man ẹbiere m̀mê owo odot ndibuana ke utom an̄wautom ke Enyọn̄-Ukpeme, January 15, 1996, page 16, ikpehe ekikere 6. Ke ini eyen ukpepn̄kpọ odotde, eyedi n̄kpọ un̄wam ndinịm ini ukpep man ẹtịm enye idem ẹnọ akpa usen utom an̄wautom esie. Ke in̄wan̄în̄wan̄ edu, neme nte mme owo ẹsinamde n̄kpọ ye mme ọsọ mfan̄a ke efakutom mbufo. Edieke ekemede ke usụn̄ ekededi, nam enye ọtọn̄ọ ye utom eke ufọk ke ufọk, nyụn̄ nọ enye ukpep sụn̄sụn̄ ke mme ikpehe utom ukwọrọikọ eken. Edieke anamde ukwọrọikọ fo edi ibio ibio onyụn̄ emem, eyemem enye utom ndikpebe. Di se ibọpde-bọp nyụn̄ nọ nsịnudọn̄, enyenede idatesịt ke utom, man enye okụt edu fo onyụn̄ ekpebe oro. (Utom 18:25) Utịtmbuba obufa eyen ukpepn̄kpọ ekpedi ndikabade ndi asuanetop eti mbụk ofụri ini emi esịnde ifịk. Eyedi afo emekeme ndin̄wam enye odiomi eti ndutịm ọnọ utom an̄wautom. Man enye ọkọri ke ukeme esie ndinọ mbon en̄wen ikọ ntiense, afo emekeme ndinọ ekikere ete enye okot mme nsiondi Enyọn̄-Ukpeme eke August 15, 1985, page 15-25; July 15, 1988, page 9-20; January 15, 1991, page 15-20; ye January 1, 1994, page 20-25.
20 Demede Nditọ Ukpepn̄kpọ Udọn̄ Kaban̄a Uyakidem ye Baptism: Eyen ukpepn̄kpọ oro enyenede esịt akpanikọ ekpenyene ndikeme ndikpep n̄kpọ oro ekemde ke ukpepn̄kpọ oro ẹkpepde ke n̄wed Ifiọk man anam uyakidem ọnọ Abasi onyụn̄ odot ndina baptism. (Men Utom 8:27-39; 16:25-34 domo.) Nte ededi, mbemiso edidemede owo udọn̄ ndinam uyakidem, oyom enye atuak ibuot ọnọ Jehovah. (Ps. 73:25-28) Ke ofụri ini ukpepn̄kpọ oro, yom mme ifet ndikọri esịtekọm nnọ mme edu Jehovah. Tịn̄ mme ntotụn̄ọ ekikere fo kaban̄a Abasi. N̄wam eyen ukpepn̄kpọ ekere n̄kpọ ke usụn̄ oro anamde enye ofori ufiop ufiop, ọkpọkpọ itie ebuana ye Jehovah. Edieke enye enen̄ede edi edidiọn̄ọ onyụn̄ ama Abasi, do enye eyenam n̄kpọ ọnọ Enye ke edinam akpanikọ, koro uten̄e Abasi enyene n̄kpọ ndinam ye nte nnyịn ikerede iban̄a Jehovah nte owo.—1 Tim. 4:7, 8; se Ñwed-item Ufök-ñwed, page 75, ikpehe ekikere 11.
21 Domo ndisịm esịt eyen ukpepn̄kpọ. (Ps. 119:11; Utom 16:14; Rome 10:10) Oyom enye okụt nte akpanikọ otụkde enye nte owo nnyụn̄ mbiere se enye ekpenyenede ndinam ye se enye ekpepde. (Rome 12:2) Nte enye enen̄ede onịm akpanikọ oro ẹwụtde enye ke urua ke urua? (1 Thess. 2:13) Ke ntak oro, afo emekeme ndinam eyen ukpepn̄kpọ etịn̄ ekikere esie ebe ke ndibụp mme esịne-mbufiọk mbụme ẹdade ẹfiọk ekikere owo, utọ nte: Afo ekere didie aban̄a n̄kpọ emi? Didie ke afo ekeme ndida emi nsịn ke edinam ke uwem fo? Ebede ke mme ibọrọ esie afo emekeme ndidiọn̄ọ ebiet emi oyomde un̄wam efen efen man osịm enye esịt. (Luke 8:15; se Ñwed-item Ufök-ñwed, page 50, ikpehe ekikere 11.) Mme uwetn̄kpọ ndise ẹdude ke page 172 ye 174 ke n̄wed Ifiọk ẹbụp ẹte: “Nte afo ama ayak idem ọnọ Abasi ke akam?” ye “Nso ibiọn̄ọ fi ndina baptism?” Mmọemi ẹkeme ndikụt unen ke ndinụk eyen ukpepn̄kpọ ndinam n̄kpọ.
22 Ẹwụt ndutịm emi ẹnyenede nditiene ke ini asuanetop oro mînaha baptism oyomde ndina baptism ke Enyọn̄-Ukpeme, January 15, 1996, page 17, ikpehe ekikere 9. Ẹkewet n̄wed Ifiọk ye uduak editịm owo idem ndibọrọ “Mme Mbụme Ẹnyenede Mbon Ẹyomde Ndina Baptism,” ẹmi ẹdude ke se ẹwetde ẹdian ke n̄wed Utom Nnyịn, emi mbiowo ẹdidụn̄ọrede ye enye. Edieke edide afo ama ọsọn̄ọ etịn̄ mme ibọrọ ẹnọde ke mbụme oro ẹmịn̄de-mịn̄ ke n̄wed Ifiọk, ekpenyene ndidi ẹma ẹtịm eyen ukpepn̄kpọ mfọn mfọn ẹnọ mme ikpehe ini mbụme emi mbiowo ẹnịmde kaban̄a baptism esie.
23 Ẹn̄wam Mbon Oro Ẹkekụrede Ukpepn̄kpọ Bible: Ẹkpenyene ndidori enyịn ke etisịm ini owo okụrede ukpepn̄kpọ ke n̄wed Ifiọk, nte udọn̄ esie ke ndinam n̄kpọ Abasi edide eke esịt akpanikọ onyụn̄ otụn̄ọde eyena in̄wan̄în̄wan̄. (Matt. 13:23) Ntak edi oro akpatre ekpri ibuotikọ ke n̄wed oro obụpde ete, “Nso ke Afo Edinam?” Mme ikpehe ekikere oro ẹdade ẹberi ẹben̄e eyen ukpepn̄kpọ ndinọ ntịn̄enyịn ke itie ebuana oro anade edi enye emenyene ye Abasi, ufọn edida ifiọk oro enye ekpepde nsịn ke edinam, ye ufọn ndinam n̄kpọ usọp usọp man owụt ima oro enye enyenede ọnọ Jehovah. Ndutịm idụhe kaban̄a edikpep mme udiana n̄wed ye owo oro okụrede n̄wed Ifiọk. Tịn̄ ke mfọnido ye ke usụn̄ an̄wan̄ade nọ eyen ukpepn̄kpọ oro okpude ndinam n̄kpọ mban̄a ifiọk Abasi se enye enyenede ndinam man anam n̄kọri ke n̄kan̄ eke spirit. Afo emekeme ndisika n̄kosobo ke ini ke ini, anamde usụn̄ eberede ọnọ enye ndinam mme usio-ukot oro ẹdade ẹsịm nsinsi uwem.—Eccl. 12:13.
24 Obufa mbet oro edide edidiọn̄ọ akpanikọ onyụn̄ anade baptism eyenyene ata ekese n̄kọri ndinam ke ifiọk esie man ọsọn̄ọ ada ke mbuọtidem. (Col. 2:6, 7) Utu ke ndika iso ke ukpepn̄kpọ Bible ke ama okokụre n̄wed Ifiọk, emekeme ndinọ ọkpọkpọ un̄wam emi enye ekemede ndiyom man ọkọri osịm ọyọhọ idaha ke n̄kan̄ eke spirit. (Gal. 6:10; Heb. 6:1) Ke n̄kan̄ esie, enye ekeme ndinam ifiọk esie ọyọhọ ebe ke ndikot Bible ke usen ke usen, ekpepde Enyọn̄-Ukpeme ye mme n̄wed “asan̄autom emi anamde akpanikọ,” ke idemesie, otịmde idem ọnọ onyụn̄ odụkde mme mbonoesop, onyụn̄ enemede akpanikọ ye ekemmọ mme andinịm ke akpanikọ. (Matt. 24:45-47; Ps. 1:2; Utom 2:41, 42; Col. 1:9, 10) Enye ndikot n̄wed Utom Nnyịn ye edida se isịnede ke enye nsịn ke edinam eyenyene akpan udeme ke ndinam enye etịm idem ke n̄kan̄ ukara Abasi ndinam utom esie mma ọyọhọ ọyọhọ.—2 Tim. 2:2; 4:5.
25 Fori Usọ Unọ Ukpep: Ẹnọ nnyịn ewụhọ ‘ndinam kpukpru mme owo ẹdi mbet nnyụn̄ n̄kpep mmọ.’ (Matt. 28:19, 20) Sia usọ unọ ukpep adianade kiet ye edinam mbet, nnyịn iyom ndidomo ndinam n̄kọri nte mme andikpep. (1 Tim. 4:16; 2 Tim. 4:2) Kaban̄a mme ekikere efen efen ke nte ekemede ndifori usọ unọ ukpep, afo emekeme ndikot: “Ediköri Öniöñ Erikpep” ye “Edisim Esit me Andikop Fi” ke ukpepn̄kpọ 10 ye 15 ke Ñwed-item Ufök-ñwed; “Teacher, Teaching” (Andikpep, Unọ Ukpep) ke Insight, Eboho 2; ye mme ibuotikọ Enyọn̄-Ukpeme “Ndibọp ye Mme N̄kpọutom Ẹmi Mîkemeke Ndita Ikan̄” ye “Ke Ini Ekpepde N̄kpọ, Sịm Esịt,” February 1, 1985; “Nte Afo Emesibuen Ikọ Mfọn Mfọn oto N̄wed Abasi?,” September 1, 1986; ye “Nte Ẹkemede Ndikụt Idatesịt ke Ndinam Mbet,” February 15, 1996.
26 Nte afo akamade n̄wed Ifiọk odomo ndinam mme mbet, bọn̄ akam kpukpru ini ete Jehovah, enyeemi ‘n̄kọri otode,’ ọdiọn̄ mme ukeme fo ndida eti mbụk Obio Ubọn̄ nsịm mme owo esịt. (1 Cor. 3:5-7) Afo akpakam okop idatesịt eke edikpep mbon en̄wen ẹfiọk, ẹwụt esịtekọm, ẹnyụn̄ ẹnam n̄kpọ ẹban̄a ifiọk oro adade osịm nsinsi uwem!