Anie Odot Ndikwọrọ Ikọ?
1 Kaban̄a utom ukwọrọikọ, nte akanam etie fi ke idem nte eketiede Moses? Enye ọkọdọhọ ete: “Mbọk, Ọbọn̄ mi, ami ndịghe owo udọn-ikọ, akananam, ye idem ini emi afo ọdọhọde ye owo fo.” (Ex. 4:10) Edieke afo ekerede ntre, afo emekeme ndinyene ntụhọ edidop uyo. Edi, Jesus “ọnọ nnyịn uyo ete ikwọrọ inọ mbio-obio, inyụn̄ idi ntiense.” (Utom 10:42) Ntre nnyịn isan̄a didie idi mme ọkwọrọ eti mbụk oro ẹdotde?
2 Idịghe udomo ifiọkn̄wed nnyịn anam nnyịn idot ke utom ukwọrọikọ. Paul ọkọdọhọ ke owo “ikotke ediwak mmọ ẹmi owo ẹbatde ke mbon eti ibuot” ye nte ke “ifiọk ererimbot emi edi ndisịme ke iso Abasi.” (1 Cor. 1:26; 3:19) Jesus ekemek mme apostle esie osio ke otu mme anam ọkpọsọn̄ utom—ke nsụhọde n̄kaha owo inan̄ ke otu mmọ ẹdide mme ọkọiyak. Mme atan̄idem adaiso ido ukpono ẹkese mmọ ke ndek nte “mbon ẹmi mîkekpepke n̄wed, ẹnyụn̄ ẹdide ndisịme ke ifiọk n̄wed.” Ke ẹdade mme idaha ererimbot ẹbiere, mme apostle ikodotke ndikwọrọ ikọ. Edi, usọ usọ utịn̄ikọ oro Peter ọkọnọde ke usen Pentecost ama onụk owo 3,000 ndina baptism!—Utom 2:14, 37-41; 4:13.
3 Jehovah Anam Nnyịn Idot Ndikwọrọ Ikọ: Paul akatan̄a ete: “Ukeme nnyịn oto Abasi.” (2 Cor. 3:5) Jehovah, Ntọn̄ọ ọniọn̄, emekpep ediwak miliọn owo ndikwọrọ akpanikọ Obio Ubọn̄ nnọ mbon en̄wen. (Isa. 54:13) Ẹkeme ndikụt unen ye uforo utom emi ke idem owo 338,491 ẹmi ẹkenade baptism isua oko nte mme odu-uwem “n̄wed itoro.” (2 Cor. 3:1-3) Nnyịn imenyene kpukpru ntak ndikwọrọ ikọ ye uko ye nsọn̄uyo mban̄a mme n̄kpọ ẹmi nnyịn ikpepde ito Jehovah.
4 Esop Abasi omowụk ndutịm unọ ukpep ofụri ererimbot ọnọ mme asan̄autom. Ebede ke N̄wed Abasi ye akpakịp nsio nsio un̄wam ukpep Bible, ẹnọ nnyịn item ye ukpep man ‘inyene ọyọhọ ifiọk, inyụn̄ iben̄e idem ke kpukpru nde’ ndikwọrọ ikọ. (2 Tim. 3:16, 17) Ifiọk oro ọdọn̄ọde ke mme n̄wed N̄ka edemede udọn̄ ediwak owo. Ke uwụtn̄kpọ, n̄wedmbụk n̄kpọntịbe Sweden ọkọdọhọ ete: “N̄wọrọnda n̄kokon̄ ifiọk ntaifiọk Bible oro edide ke udomo eke ofụri ererimbot ọnọ ibetedem ke ukpepn̄kpọ oro Mme Ntiense Jehovah ẹkwọrọde.”
5 Ye ndausụn̄ oro ẹnọde ke mbonoesop nnyịn ition eke urua ke urua, ndutịm edikot ye edikpep Bible nnyịn, item oro ibọde ke Ufọkn̄wed Utom Ukara Abasi, ọkpọkpọ un̄wam oro ibọde ito mmọ eken ẹmi ẹdide mme asan̄autom ẹmi ẹnyenede mbufiọk, ndien ke akande kpukpru, un̄wam edisana spirit Jehovah, nnyịn imekeme ndinịm ke akpanikọ nte ke Jehovah ada nnyịn nte ke imotịm idot ndikwọrọ ikọ. “Itịn̄ ikọ ke Christ ke iso Abasi, nte owo emi edide owo akpanikọ ye owo Abasi etịn̄de.”—2 Cor. 2:17.
6 Edieke nnyịn ibọde ufọn ọyọhọ ọyọhọ ito ukpep ukara Abasi oro Abasi ọnọde ebe ke esop esie, nnyịn inyeneke ntak ndidop uyo m̀mê ndikop ndịk. Nnyịn imekeme ndikwọrọ ikọ idara idara nnọ mbon en̄wen, inịmde ke akpanikọ ite ke Jehovah eyediọn̄ mme ukeme nnyịn.—1 Cor. 3:6.