Obufa Ndutịm Usen Akpan Mbono
1 “Ẹdi Mbon Oro Jehovah Ọnọde Ukpep” edi ibuotikọ obufa ndutịm usen akpan mbono editọn̄ọde ke March. (John 6:45) Ukpepn̄kpọ Abasi otode Jehovah an̄wam nnyịn ke akpanikọ ndidu uwem emi ọnọde uyụhọ. Enye anam nnyịn inyene ntotụn̄ọ esịtekọm kaban̄a n̄kpọ-akpa eke spirit nnyịn. Ukeme nnyịn ndin̄wam mbon en̄wen ẹkop eti mbụk anam nnyịn idi nti mme andibuana ke n̄kaowo. Usen akpan mbono emi oyowụt mme edidiọn̄ oro mbon ẹmi Jehovah ọnọde ukpep ẹdarade.
2 Ndutịm oro oyowụt ukpụhọde odude ke ufọt ukpepn̄kpọ Abasi ye mme n̄kpọndịk eke ukpepn̄kpọ ererimbot. Nnyịn iyokụt ata in̄wan̄în̄wan̄ nte Jehovah ọnọde mfọnn̄kan orụk ukpep—ukpep oro ọkọn̄ọde ke Ikọ esie, kpa Bible. Ẹyedori nsọn̄uyo ke ikpehe ita ke utuakibuot emi nnyịn ikopde inemesịt ke ndidi se Abasi ọnọde ukpep. Ke adianade do, ẹyesịn udọn̄ ẹnọ n̄kparawa ndikpebe mme utọ n̄wọrọnda uwụtn̄kpọ Bible nte David ye Timothy nnyụn̄ mbọp uwem mmọ n̄kanade mme edinam eke spirit. Ẹyesọn̄ọ mbuọtidem nnyịn nte ẹsiode edinam akpanikọ n̄kani nditọete nnyịn ẹwụt. Mbufa mbon oro ẹyakde idem ẹnọ ẹmi ẹdotde ẹyena baptism. Mbemiso usen mbono oro, mmọ ẹkpenyene nditịn̄ udọn̄ mmọ nnọ esenyịn oro etiede ibuot.
3 Ibuotikọ akpan utịn̄ikọ ke usen akpan mbono oro edi “Jehovah Ọnọ Ukpep Man Ẹnam Uduak Esie.” Emi ọyọsọn̄ọ etịn̄ mme ntak anade kpukpru nnyịn ika iso ikpep n̄kpọ, isọn̄ọ ida ke mbuọtidem, inyụn̄ ika iso ndinam n̄kọri. Ẹyesịn udọn̄ ẹnọ nnyịn ndikpebe Jehovah ebe ke ndikpep mbon en̄wen akpanikọ oro adade esịm nsinsi uwem. Ẹyesịn mme ifiọkutom ẹbọpde-bọp ndiwụt nte mme n̄wed N̄ka ẹkemede ndin̄wam ediwak owo ndidi se Jehovah ọnọde ukpep. Ẹyewụt eti n̄kpọ oro ndutịm unọ ukpep ofụri ererimbot Jehovah anamde.
4 Nam mme akpan ndutịm man odụk. Sịn udọn̄ nọ kpukpru mbon ẹmi ẹnyenede udọn̄ ndidụk. Sak iso se edidi se Akwa Anditeme nnyịn ekpepde ediwak nti n̄kpọ.—Isa. 30:20, NW.