Di Uwụtn̄kpọ ke Ikọinua ye ke Eduuwem
1 Apostle Paul ọkọnọ Timothy item ete akabade edi uwụtn̄kpọ ke ikọinua ye ke eduuwem. (1 Tim. 4:12) Nnyịn n̄ko ikpenyene ndidi uwụtn̄kpọ ke ikọinua ye ke eduuwem, akpan akpan ke ini ibuanade ke utom ukwọrọikọ, koro ndinam ntre ekeme ndibiere m̀mê iyesịm esịt mbon oro nnyịn isobode m̀mê idisịmke.
2 Oyom nnyịn iwụt kpukpru ikpehe nti ido, esịnede eti edu, edikere mban̄a, mfọnido, ye usọ. Ke ndiwụt mme edu ẹmi, nnyịn iwụt ke imọfiọk nte mme edinam nnyịn ẹtụkde ekikere mbon en̄wen. Ẹkeme ndimen nti ido ke utom ukwọrọikọ ndomo ye mme n̄kpatan̄a n̄kpọ, ẹmi ẹdade ẹnam udia enem. Ke mmọ mîdụhe, eti udia ekeme nditie ibe ibe inyụn̄ idọn̄ke owo itọn̄. Ndikpu ndiwụt nti ido ke mme edinam nnyịn ye mbon en̄wen ekeme ndinyene ukem utịp oro.—Col. 4:6.
3 Di Uwụtn̄kpọ ke Ikọinua: Ufan ufan inua imam ye ufiop ufiop ekọm ẹdi akpan n̄kpọ ke eti mbụk oro nnyịn inemede. Ke ini idade ufiop ye esịt akpanikọ inam ntọn̄ọikọ nnyịn enyene inem, nnyịn inam enyeneufọk ọfiọk ete ke imenyene ata udọn̄ ke idemesie. Ke ini enye etịn̄de ikọ, nen̄ede nọ n̄kpan̄utọn̄ nyụn̄ wụt ukpono nte odotde ke ekikere esie. Ke ini afo etịn̄de ikọ, nam ntre ke usọ ye mfọnido.—Men Utom 6:8 domo.
4 Ke ini ke ini nnyịn imesisobo owo emi mîtiehe ufan ufan, idem edide owo utọk. Didie ke nnyịn ikpanam n̄kpọ? Peter akakpak nnyịn ete itịn̄ ikọ ke usụn̄ oro owụtde “sụn̄-sụn̄ ido ye . . . ido uten̄e.” (1 Pet. 3:15; Rome 12:17, 18) Jesus ọkọdọhọ ete ke edieke enyeneufọk ke nsọn̄ido esịnde etop Obio Ubọn̄, nnyịn n̄kukụre ikpenyene ‘ndiken̄ ntan ikpat nnyịn nduọk.’ (Matt. 10:14) Nnyịn ndiwụt nti ido ke mme utọ idaha oro ekeme ke akpatre ndinam esịt andibiọn̄ọ emem.
5 Di Uwụtn̄kpọ ke Eduuwem: Ndikwọrọ eti mbụk ke mme efak oro ẹyọhọde ye edinam ye ke mme an̄wan̄wa itie oyom ete iwụt edikere mban̄a, owo itịn̄ke ikọ ke ọkpọsọn̄ uyo m̀mê nditie uyịre uyịre, ye nte ke nnyịn ifịnake mbon ẹmi ẹsan̄ade ẹbe. Ke ini idude ke ufọk mbon ẹmi ẹnyenede udọn̄, nnyịn inyene ndiwụt edu oro odotde inyụn̄ ikama idem nnyịn nte isenowo oro ẹnyenede mfọnido, iwụtde esịtekọm iban̄a edu ukama isen mmọ. Nditọwọn̄ ekededi oro ẹsan̄ade ye nnyịn ẹnyene ndiwụt ukpono nnọ enyeneufọk ye inyene esie ndien ẹkpenyene ndiwụt eti ido nnyụn̄ nnọ n̄kpan̄utọn̄ ke ini nnyịn inyenede nneme. Edieke nditọwọn̄ mîdịghe se ẹkarade, emi eyenịm idiọk uwụtn̄kpọ.—N̄ke 29:15.
6 Nte nnyịn ikamade idem ekpenyene ndinam an̄wan̄a mmọ en̄wen nte ke nnyịn idi mme asan̄autom Ikọ Abasi. Ke usịnen̄kpọ ye ukamaidem nnyịn, nnyịn ikpenyeneke nditie mbumịn mbumịn ye nsuahade nsuahade m̀mê nditie uwouwo. Nnyịn ikpenyene ndikama idem kpukpru ini nte odotde ye gospel. (Men Philippi 1:27 domo.) Ke nditịm nnọ ntịn̄enyịn ke ukamaidem ye n̄kpọutom nnyịn, nnyịn idinọhọ mbon en̄wen ntak ndituak ukot nduọ m̀mê ndikụt ndudue nnọ utom ukwọrọikọ nnyịn. (2 Cor. 6:3, 4) Eti ikọinua ye eduuwem nnyịn ẹdian uyai ke etop Obio Ubọn̄, adade ukpono ọsọk Jehovah.—1 Pet. 2:12.