Ekebe Mbụme

◼ Ẹkpenịm ukpepn̄kpọ Bible ye owo ke n̄wed Ifiọk ebịghi adan̄a didie?

Jehovah ke ọdiọn̄ esop esie mfịn. Nnyịn imesikụt uyarade emi ke isua kiet kiet nte ediwak tọsịn mbufa owo ẹdade ẹnọ akpanikọ. N̄wed Ifiọk ke owụt nte idide enyene-uforo n̄kpọutom ke ndinam emi. Nsiondi Enyọn̄-Ukpeme eke January 15, 1996, owụt ete ke ẹtịm n̄wed emi man an̄wam eyen ukpepn̄kpọ Bible anam n̄kọri eke spirit usọp usọp, iso-ọfọn osịmde idaha baptism ke ufan̄ ọfiọn̄ ifan̄.

Ke ntak emi, kpa Enyọn̄-Ukpeme oro, page 17, eteme ete: “Ke owo ama okokụre ukpepn̄kpọ Bible esie ke n̄wed Ifiọk onyụn̄ ana baptism, ekeme ndidi ufọn ididụhe ndinịm ukpepn̄kpọ Bible ye enye ke ọyọhọ n̄wed iba.”

Nso kaban̄a owo emi mînaha baptism ke ama okokụre n̄wed Ifiọk? Utom Obio Ubọn̄ Nnyịn eke June 1996, page 6, ikpehe ekikere 23, eti nnyịn aban̄a n̄kpọ oro ẹkewetde ke Enyọn̄-Ukpeme ẹban̄a editre ndikpep mme n̄wed efen efen ye eyen ukpepn̄kpọ oro ke ama okokụre n̄wed Ifiọk. Ndi emi ọwọrọ ke nnyịn inyeneke udọn̄ ndin̄wam eyen ukpepn̄kpọ Bible mbe ọtọ emi? Baba. Nnyịn iyom mme owo ẹnyene akpan ifiọk akpanikọ. Nte ededi, ẹdori enyịn nte ke ndusụk udomo ibio ini, andikpep emi enyenede uforo eyekeme ndin̄wam ukeuke eyen ukpepn̄kpọ enyene ifiọk oro ekemde man anam ubiere oro asan̄ade ye ifiọk ndinam n̄kpọ Jehovah. Ekeme ndidi nte ke ntak mme ọkpọkpọ idaha mmọ, ndusụk nditọ ukpepn̄kpọ Bible ẹyekam ẹma ndikpep n̄kpọ n̄kan ini kiet ke urua.

Nte ẹnyịmede, ndusụk nditọ ukpepn̄kpọ idisọpke inam n̄kọri nte mbon eken. Edi edieke edide ke ama okokụre ndikpep n̄wed Ifiọk, emi ekemede ndidi ama ada ini akan nte ekpedide, owo oro ibiereke ke imoyom ndibuana ye esop, asuanetop oro eyenam ọfọn ndineme idaha emi ye kiet ke otu mbiowo ẹmi ẹdude ke Kọmiti Utom Esop. Edieke mme idaha ẹmi owo mîkemeke ndinyan̄a m̀mê oro ẹtiede esen esen ẹbuanade, ekeme ndiyom un̄wam efen efen. Emi odu ke n̄kemuyo ye edumbet oro ẹtịn̄de ke Enyọn̄-Ukpeme eke January 15, 1996, page 17, ikpehe ekikere 11 ye 12.

Esịtekọm ke ndikam nnyene akpan ifiọk akpanikọ ekpenyene ndinụk eyen ukpepn̄kpọ ndidụk mme mbonoesop Christian. Emi ekeme ndida eyen ukpepn̄kpọ nsịm edinọ in̄wan̄în̄wan̄ uyarade kaban̄a udọn̄ esie ndinam n̄kpọ Jehovah. Edieke utọ esịtekọm eke spirit oro mînaha in̄wan̄în̄wan̄ ke ẹma ẹkekpep n̄kpọ ke n̄wed Ifiọk ke anyanini, ekeme ndiwụt ifiọk nditre ukpepn̄kpọ oro.