Nnyịn Imenyene Utom
1 Jesus ama owụk mme anditiene enye ete “ẹkanam kpukpru mme idụt ẹdi mbet.” (Matt. 28:19) Ke idụt ye mme otu isuo 232 ke ofụri isọn̄, se ibede mme anditoro Jehovah Abasi miliọn ition ẹmenọ oduuwem uyarade ke nte ewụhọ Jesus oro osude. Edi nso kaban̄a nnyịn ke idem nnyịn? Nte nnyịn imada utom edikwọrọ ikọ emi ke akpan n̄kpọ?
2 Mbiomo Ido Uwem: Utom edi “ewụhọ ndinam mme n̄kpọ oro ẹtemede.” Nnyịn idu ke idak ewụhọ otode Christ ndikwọrọ ikọ. (Utom 10:42) Apostle Paul ama ọfiọk ke emi ama obiomo imọ mbiomo, m̀mê mbiomo ido uwem, nditan̄a eti mbụk. (1 Cor. 9:16) Ke ndinam an̄wan̄a: Da nte ke afo edi anamutom ke nsụn̄ikan̄ emi esịpde. Etubom nsụn̄ikan̄ owụk fi ete ọtọt mme akaisan̄ onyụn̄ anam mmọ ẹwọn̄ọ ẹdụk mme ubom unyan̄a uwem. Nte afo oyofụmi ewụhọ oro onyụn̄ ọnọ ntịn̄enyịn ke ndinyan̄a sụk idemfo? Ke akpanikọ ukpanamke. Mbon eken ẹberi edem ke afo. Uwem mmọ odu ke itiendịk. Afo emenyene mbiomo ido uwem ndinam utom man an̄wam mmọ.
3 Abasi ọmọnọ nnyịn utom ndinọ ntọt. Jehovah ọyọsọp ada utịt ọsọk ofụri idiọk editịm n̄kpọ emi. Ediwak miliọn owo ifiọkke se iditịbede inọ mmọ. Nte ọkpọfọn nnyịn ndifụmi n̄kpọndịk oro anade ebet mbon en̄wen nnyụn̄ n̄kere mban̄a ndinyan̄a idem nnyịn kpọt? Nte ededi, ikpọfọnke. Nnyịn imenyene mbiomo ido uwem ndin̄wam ke ndinyan̄a uwem mbon en̄wen.—1 Tim. 4:16.
4 Nti Uwụtn̄kpọ Nditiene: Prọfet Ezekiel akada nte ke edinọ nditọ Israel oro mîkanamke akpanikọ etop ntọt ekedi mbiomo. Jehovah ye nsọn̄uyo ama odụri enye utọn̄ aban̄a mme utịp oro ẹditienede edieke enye okpude ndinam utom esie: “Ke adan̄emi ndọhọde idiọk owo, nte, Afo udutreke ndikpa: ndien afo mûtemeke enye, . . . enye idiọk owo oro eyekpa ke mme idiọk ido esie; ndien nyekpak iyịp esie ke ubọk fo.” (Ezek. 3:18) Ezekiel ke edinam akpanikọ ama ọyọhọ utom esie idem ke osobode ọkpọsọn̄ ubiọn̄ọ. Ke ntre, enye ama ekeme ndidat esịt ke ini Jehovah ekebierede ikpe.
5 Ediwak isua ikie ke ukperedem, apostle Paul ama ewet aban̄a mbiomo esie ndikwọrọ ikọ. Enye ọkọdọhọ ete: “Iyịp owo baba kiet ikọbọke mi. Koro mmen̄kefeheke ndikwọrọ ofụri uduak Abasi nnọ mbufo.” Paul ama ọkwọrọ ikọ an̄wan̄wa ye ke ufọk ke ufọk koro enye ọkọdiọn̄ọde ete ke ndikpu ndinam ntre ekeme ndinam imọ inyene ubiomikpe iyịp ke iso Abasi.—Utom 20:20, 26, 27.
6 Nte nnyịn imenyene ifịk Ezekiel? Nte onụk nnyịn ndikwọrọ ikọ nte okonụkde Paul? Utom nnyịn edi ukem nte eke mmọ ekedide. Nnyịn inyene ndiyọhọ mbiomo nnyịn eke editọt mbon en̄wen, kpa ye unana udọn̄ m̀mê ubiọn̄ọ oro mmọ ẹsịnde. Ediwak tọsịn owo efen efen ẹkeme ndinam n̄kpọ mban̄a etop Obio Ubọn̄ ẹnyụn̄ ẹdọhọ ẹte: “Ẹyak nnyịn ika ye mbufo: koro nnyịn imokop ite ke Abasi odu ye mbufo.” (Zech. 8:23) Ima oro inyenede inọ Abasi ye ekemmọ owo akpakam onụk nnyịn nditre ndikpa mba. Nnyịn imenyene utom edikwọrọ ikọ!