Buana ke Utom Oro Owo Mîdifiakke Inam Tutu Amama
1 Ke nsio nsio ini ke ofụri mbụk ubonowo, ama oyom Jehovah ebiere ikpe ọnọ mme asua esie. Nte ededi, ke ntak mbọm esie, enye ama ọnọ mbon esịt akpanikọ ifet ndinyene edinyan̄a. (Ps. 103:13) Nte mmọ ẹkenamde n̄kpọ ekebiere akpatre utịp mmọ.
2 Ke uwụtn̄kpọ, mbemiso Ukwọ, ke 2370 M.E.N., Noah ekedi “ọkwọrọ edinen ido.” Mbon oro ẹketakde ẹkedi mmọ oro ẹkefụmide ntọt Abasi. (2 Pet. 2:5; Heb. 11:7) Mbemiso nsobo Jerusalem ke 70 E.N., Jesus ama etịn̄ edinam emi ediyomde in̄wan̄în̄wan̄ man owo ekededi ọbọhọ nsobo oro okoyomde ndisịm obio oro. Kpukpru mbon oro ẹkesịnde etop ntọt esie ẹma ẹsobo enyene-ndịk utịp. (Luke 21:20-24) Ẹma ẹfiak ẹnọ mme ntọt Abasi ye mme ubiereikpe oro ediwak ini ke ofụri mbụk.
3 Utom Unọ Ntọt Eyomfịn: Jehovah ke anyanini ko ama ọdọhọ ke iyan̄wan̄a iyatesịt imọ ifụk editịm n̄kpọ odude kemi ndien ke mbon nsụkidem kpọt ẹdibọhọ. (Zeph. 2:2, 3; 3:8) Ini ndikwọrọ etop ntọt emi ke okụre usọp usọp! “Akwa ukụt” ikam iyomke usụn̄, ndien ke ẹtan̄ mbon nsụkidem ẹbok idahaemi. Ke akpanikọ, “in̄wan̄” “ekem ini ukpen̄e.” Ntem, idụhe utom efen ẹkemede ndimen udomo ye enyeemi ke nte edide akpan n̄kpọ ye nte edide usọp usọp.—Matt. 24:14, 21, 22; John 4:35.
4 Ana nnyịn ibuana ke ndinọ mbon en̄wen ntọt eyomfịn, “ke mmọ ẹkopde, ye ke mîkopke.” Emi edi utom oro Abasi ọnọde, emi nnyịn mîkpedehede ifụmi. (Ezek. 2:4, 5; 3:17, 18) Nnyịn ndinyene ọyọhọ ebuana ke utom owụt ntotụn̄ọ ima oro inyenede inọ Abasi, ataata edikere mban̄a mme mbọhọidụn̄ nnyịn, ye mbuọtidem oro n̄kpọ mîsehekede oro inyenede ke Andinyan̄a nnyịn, Jesus Christ.
5 Ini Edi Emi Ndinam N̄kpọ: Ke Jehovah ama ekebiere ikpe ke mme ini edem, idiọkido ama esiwak ndidemede obufa kpukpru ini koro Satan ye mme demon esie ẹkesụk ẹnyenyene odudu. Nte ededi, edidi isio isan̄ emi. Ẹyesio odudu Satan ẹfep. Tutu amama owo idiyomke aba ntọt ofụri ererimbot aban̄ade “akwa ukụt.” (Edi. 7:14; Rome 16:20) Nnyịn imenyene san̄asan̄a ifet editiene mbuana ke utom oro owo mîdifiakke inam tutu amama. Ini edi emi ndida ifet emi nnam n̄kpọ ke mfọnn̄kan usụn̄.
6 Kaban̄a utom ukwọrọikọ esie, apostle Paul, ye akwa nsọn̄uyo, ọkọdọhọ ete: “Iyịp owo baba kiet ikọbọke mi.” (Utom 20:26) Enye ikenyeneke ubiomikpe iyịp ebe ke edikpu ekededi ndinọ ntọt oro. Ntak mîkenyeneke? Koro enye ama ekeme nditịn̄ mban̄a utom esie ete: “Mmonyụn̄ n̄kpa utom mban̄a n̄kpọ emi, . . . n̄wan̄wana ndinam.” (Col. 1:29) Yak nnyịn idara ukem uyụhọ eke edibuana ke ọyọhọ udomo nte nnyịn ikekeme ke utom oro owo mîdifiakke inam!—2 Tim. 2:15.