Ekebe Mbụme

◼ Nso ke ẹkpenam ke ini afanikọn̄ etịbede oro otụkde nditọete nnyịn nnennen nnennen?

Edieke Afanikọn̄ Etịbede ke N̄kann̄kụk Mbufo: Kûkop ndịk. Mụm idem kama, nyụn̄ wụk ekikere ke se inen̄ede idi akpan n̄kpọ—uwem, idịghe inyene. Se ban̄a mme n̄kpọ obụkidem emi ubon oyomde ke ebe oro. Ekem nam mbiowo ẹfiọk mme idaha ye ebiet mbufo ẹdude idahaemi.

Mbiowo ye mme asan̄autom unamutom ẹnyene akpan udeme ke ndinọ un̄wam. Edieke ẹkenọde mbemiso ntọt ẹban̄a afanikọn̄ oro, nte esidide ye ikpọ oyobio, nditọete ẹmi ẹkpenyene ndikụt nte ke kpukpru owo ẹdu ke ebiet emi ọnọde ubọhọ, ndien edieke ini odude, ẹkpenyene ndibọ nnyụn̄ ndeme mme n̄kpọ un̄wam ẹmi ẹkemede ndiyom.

Ke oro ebede, mme ada ukpepn̄kpọ n̄wedesop ẹkpenyene ndiyom ubon kiet kiet ẹnyụn̄ ẹbụp ẹban̄a mfọnọn̄kpọ mmọ. Ẹkpenyene ndisian esenyịn oro etiede ibuot m̀mê ebiowo efen mban̄a idaha ubon kiet kiet, ọkpọkọm kpukpru n̄kpọ ẹbono ẹfọn. Edieke owo akadade unan, mbiowo ẹyedomo ndinam ndutịm mban̄a edinọ usọbọ. Mmọ n̄ko ẹyenọ n̄kpọ obụkidem ekededi utọ nte udia, edisịnen̄kpọ, itie udakibuot, m̀mê mme n̄kpọ isọn̄ufọk oro ẹyomde. (John 13:35; Gal. 6:10) Mbiowo n̄kann̄kụk ẹyenọ un̄wam eke spirit ye eke ntụk ẹyenyụn̄ ẹnam ndutịm usọp usọp nte ẹkekeme man ẹfiak ẹtọn̄ọ mme mbonoesop. Ke ẹma ẹkenam ndụn̄ọde mfọn mfọn, ebiowo kiet ekpenyene ndisobo ye esenyịn circuit ke ibuot mbiowo ndinam enye ọfiọk unan ekededi ẹdade, Ufọkmbono Obio Ubọn̄ emi abiarade, m̀mê mme ufọk nditọete ẹmi ẹbiarade, ọkọrọ ye akpan udọn̄ ekededi. Esenyịn circuit ndien ọyọnọ ntọt aka n̄kọk itieutom mîdịghe okot ke urụk ukopikọ nditọt mban̄a se idude. N̄kọk itieutom eyese aban̄a akwa udomo n̄kpọ un̄wam ekededi oro oyomde.

Edieke Afanikọn̄ Etịbede ke Ebiet En̄wen: Ẹti nditọete iren ye iban ke akam mbufo. (2 Cor. 1:8-11) Edieke oyomde ndinọ un̄wam okụk, afo emekeme ndinọ etịbe fo ẹsọk N̄ka, ke ebiet emi ẹsiode okụk un̄wam ẹnịm kaban̄a uduak emi. Adres edi: Watch Tower, P.M.B. 1090, Benin City, Edo State. (Utom 2:44, 45; 1 Cor. 16:1-3; 2 Cor. 9:5-7; se Enyọn̄-Ukpeme eke August 1, 1986, page 20-22.) Kûnọ mme n̄kpọ m̀mê mme n̄kpọ un̄wam ẹka ikpehe afanikọn̄ emi ibọhọke nditọete ẹmi ẹsede enyịn ẹban̄a ẹnen̄ede ẹyom. Emi ayanam ẹnọ un̄wam ke nde ke nde ẹnyụn̄ ẹdeme mme n̄kpọ nte odotde. (1 Cor. 14:40) Mbọk kûkot N̄ka ke urụk ukopikọ nte mîdotke, sia emi ekemede ndinam edi ọkpọsọn̄ n̄kpọ ndibọrọ mme ikot ẹtode ikpehe afanikọn̄ oro.

Ke ẹma ẹkenam ndụn̄ọde oro ọfọnde, N̄ka eyebiere m̀mê ẹkpenyene ndinịm kọmiti unọ un̄wam. Ẹyenam nditọete ẹkemede ndibiom mbiomo ẹfiọk. Kpukpru owo ẹkpenyene ndidiana kiet ye mbiowo ẹnọde ndausụn̄ man ẹkeme ndinọ mme akpan n̄kpọ oro kpukpru nditọete ẹyomde mfọn mfọn.—Se Jehovah’s Witnesses—Proclaimers of God’s Kingdom, page 310-315.