Nnyịn Ikpedi Mme Andikpep, Idịghe Mme Ọkwọrọikọ Kpọt
1 Ẹkụt nte ke “Mme Ntiense Jehovah ke ata ata usụn̄ ẹmenọ ikọ ntiense mmọ ke ofụri isọn̄.” Didie ke emi edi ntre? Idịghe ke ukeme m̀mê odudu owo, edi ke spirit Abasi emi anamde utom ke idem mme asan̄autom esie nte mmọ ẹdade nsio nsio ndutịm ndiyọhọ utom ukwọrọikọ ye edinọ ukpep mmọ.—Zech. 4:6; Utom 1:8.
2 N̄wed edi enyene-uforo usụn̄ ndiyọhọ utom ukwọrọikọ nnyịn. Ke ediwak isua ẹmi ẹbede, Mme Ntiense Jehovah ẹmemịn̄ ẹnyụn̄ ẹsuan ediwak biliọn n̄wed, n̄kpri n̄wed, ndiye uduot n̄kpri n̄wed, mme magazine, ye mme tract ndin̄wam ẹdiọn̄ọ eti mbụk Obio Ubọn̄. Mme ntọt ẹdude ke 1997 Yearbook ẹwụt ke edision̄o mme n̄wed emesịm mme n̄wọrọnda udomo. Kan̄a ke emi, ẹmịn̄ se ibede idem New World Translation miliọn 91. Ke isua kiet ibat Enyọn̄-Ukpeme ye Awake! ẹmi ẹkemịn̄de ke United States ama ọdọk ke mbahade 7.1 eke ikie. Ke Germany, edimịn̄ magazine ama ọdọk ke mbahade 35 eke ikie. Ẹkemịn̄ se ibede mbahade kiet ke itie ita ke otu mme magazine oro ẹkemịn̄de do ẹnọ efakutom ẹsemde Russian.
3 Ntak emi ẹyomde utọ ediwak n̄wed ntre? Ke ofụri ererimbot, ẹnam n̄kpọ akamba akamba ẹban̄a nsịnudọn̄ oro ẹnọde nnyịn ẹban̄a edinọ ikọ ntiense ke ebiet ekededi oro ikemede ndikụt mme owo. Ye editat oro ekese nnyịn itatde utom edinọ ikọ ntiense nnyịn—ke mme an̄wan̄wa ebiet, ke mme efak, ye ke efakutom mbubehe—ẹmenịm ediwak ibat n̄wed ẹnọ mme owo ẹmi ẹwụtde ndusụk udọn̄. Ekedi ọkpọsọn̄ n̄kpọ ọnọ ediwak mmọ ẹmi ndikop, ke ekpedi ẹma ẹnyenyene ifet ndikop, etop Obio Ubọn̄. Man ẹyụhọ udọn̄ emi, mme esop ẹsinam nsio nsio n̄wed ẹdu ndida nnam n̄kpọ ke kpukpru ikpehe utom ukwọrọikọ.
4 Nso Idi Utịtmbuba Nnyịn ke Ndisuan Mme N̄wed? Utịtmbuba nnyịn idịghe sụk edinịm mme n̄wed. Utom edinam mbet abuana ikpehe iba—edikwọrọ ye edinọ ukpep. Akpa, nnyịn imenyene ifet edikwọrọ eti mbụk Obio Ubọn̄, inamde mme owo ẹfiọk ke enye edi n̄kukụre idotenyịn ubonowo. (Matt. 10:7; 24:14) Mme n̄wed nnyịn ẹmi ẹkọn̄ọde ke Bible ẹdi usụn̄ emi ẹma ẹkedomo ẹfiọk ke anyan ini emi onyụn̄ okụtde unen ke ndidemede udọn̄ nnyụn̄ nnọ mbon en̄wen ifiọk aban̄ade Obio Ubọn̄.
5 Udiana, edieke anade nnyịn inam mme mbet, ana nnyịn ikpep kpukpru n̄kpọ ẹmi Jesus eketemede. (Matt. 11:1; 28:19, 20) N̄ko, mme n̄wed ẹnyene akpan udeme ke ndinam akpanikọ ebe odụk esịt nditọ ukpepn̄kpọ, ẹn̄wamde mmọ ndikabade ndi mme mbet.
6 Mbon oro ẹbọde mme n̄wed ẹkeme ndidi ‘mme andikop ikọ,’ edi itiehe nte mmọ ẹyekabade ẹdi mme anam ikọ edieke ẹsanade mmọ ẹyak ke idem mmọ. (Jas. 1:22-25) Ibat ibat ẹdikabade ẹdi mme mbet ibọhọke owo ada mmọ usụn̄. (Utom 8:30, 31) Mmọ ẹyom andikpep man an̄wam mmọ ẹsọn̄ọ akpanikọ oro ẹkụtde ke N̄wed Abasi ẹnọ idem mmọ. (Utom 17:2, 3) Utịtmbuba nnyịn edi ndin̄wam mmọ ẹkọri ẹsịm idaha uyakidem nnọ ye baptism nnyụn̄ nnọ mmọ ukpep man ẹtịm ẹdot ndikpep mbon en̄wen.—2 Tim. 2:2.
7 N̄kponn̄kan Udọn̄ Edi Kaban̄a Mme Andikpep Efen Efen: Ke ini nnyịn ikwọrọde ikọ, nnyịn itan̄a eti mbụk an̄wan̄wa. Edinọ ukpep, nte ededi, abuana editeme owo ke adiana ke adiana. Ke adan̄aemi ukwọrọikọ anamde mbon en̄wen ẹfiọk etop Obio Ubọn̄, edinọ ukpep an̄wam mme owo ẹnyịme eti mbụk ẹnyụn̄ ẹnam n̄kpọ ẹban̄a enye. (Luke 8:15) Andikpep anam n̄kpọ akan editan̄a; enye anam an̄wan̄a, ada nti mfan̄a ebuen ikọ, ọnọ mme nsọn̄ọ, onyụn̄ ekpek.
8 Adan̄a ediwak nnyịn nte ikekeme ikpedi mme andikpep, idịghe mme ọkwọrọikọ kpọt. (Heb. 5:12a) Ndisuan mme n̄wed edi akpan ubak utom nnyịn, edi ndisịm udiana uduak utom ukwọrọikọ nnyịn ke akpatre ọkọn̄ọ ke se nnyịn inamde nte mme andikpep. Okposụkedi nnyịn ikemede ndikop inemesịt ke ini ikemede ndinịm mme n̄wed, man inam utom nnyịn ima ọyọhọ ọyọhọ, nnyịn ikpesehe unịm n̄wed nte akpatre utịtmbuba nnyịn. (2 Tim. 4:5) Edinịm n̄wed edi uforo uforo usụn̄ ndiberede usụn̄ nnọ mme ifet ndikpep mbon en̄wen akpanikọ.
9 Nam Mme Mfiakn̄ka Man Ọtọn̄ọ Mme Ukpepn̄kpọ Bible: Eyedi kpukpru nnyịn ima inịm ediwak n̄wed, ndiye uduot n̄kpri n̄wed, ye mme magazine, inyenede udịm enyịn̄ ke mfiakn̄ka. Nnyịn ikpenyene ndinam ndutịm kpukpru ini ndifiak n̄ka man ikedemede udọn̄. Akpan uduak nnyịn ndifiak n̄ka idịghe sụk edinịm mme n̄wed efen efen edi ndisịn udọn̄ nnọ mme owo ndikot nnyụn̄ mbọ ufọn nto se mmọ ẹma ẹkenyenyene. Nso udomo n̄kọri eke spirit ke nnyịn ke idem nnyịn ikpakanam ke owo mîkpakafiakke idi ndien ndien ndin̄wam nnyịn ikọ nnennen ifiọk?—John 17:3.
10 Fiak bịne kpukpru udọn̄ ye ekikere editọn̄ọ ukpepn̄kpọ Bible edide ke ediye uduot ekpri n̄wed Nso ke Abasi Oyom Oto Nnyịn? m̀mê ke n̄wed Ifiọk Oro Adade Osịm Nsinsi Uwem. N̄wed iba ẹmi ẹwụt etop Obio Ubọn̄ ke usụn̄ emi ọsọpde an̄wan̄a owo. Ediye uduot ekpri n̄wed Oyom esịne ọyọhọ ọyọhọ ukpepn̄kpọ, enemede mme akpan ukpepn̄kpọ Bible. N̄wed Ifiọk an̄wam ekpep owo akpanikọ ke ata ọyọhọ ọyọhọ usụn̄, edi edi mmemmem, in̄wan̄în̄wan̄, ye ibio ibio.
11 Mmemmem ndutịm unọ ukpep, nte ẹkenamde an̄wan̄a ke esịne-esịt Utom Obio Ubọn̄ Nnyịn eke 1996, anam edi mmemmem ọnọ andikpep nditeme ye eyen ukpepn̄kpọ ndibọ ukpep. Nam esịne-esịt oro odu ekpere man odụn̄ọde mme usụn̄ ye mme ido unọ ukpep oro okụtde unen. Ndusụk ekikere oro enye ọnọde abuana nte ẹkpenyenede ata ọkpọkpọ udọn̄ ke idem eyen ukpepn̄kpọ, udomo n̄kpọ oro ẹkpekpepde ini kiet, nte ẹkpesede ẹban̄a mme mbụme oro mînyeneke ebuana ye ibuot nneme, nte andikpep ye eyen ukpepn̄kpọ ẹkemede nditịm idem nnọ ukpepn̄kpọ ke mbemiso, ye nte ẹkemede ndimen eyen ukpepn̄kpọ n̄wụt esop Jehovah. Ebede ke nditiene mme ekikere ẹmi, ekese nnyịn, esịnede mbufa owo, iyekeme ndinịm mme ukpepn̄kpọ oro ẹkade iso ndinyene n̄kọri.
12 Mme Ntọt Ẹban̄ade Nti Unen Ẹkụtde ke An̄wautom: Ediye uduot ekpri n̄wed Oyom ye n̄wed Ifiọk ẹdi nti un̄wam ke ndinam utom edinam mbet awara. Ke ama ọkọbọ ediye uduot ekpri n̄wed Oyom, eyenete kiet ke Bolivia ama ọsọsọp ada enye ọtọn̄ọ ukpepn̄kpọ ye eren kiet. Ọfiọn̄ inan̄ ke ukperedem ke mbono district, eyen ukpepn̄kpọ emi ama esịne ke otu mme okop inemesịt mbon baptism!
13 Onụk ediwak owo ndiyak uwem mmọ nnọ Jehovah ke ẹma ẹkekụre ndikpep n̄wed Ifiọk. Ke esop kiet ke Angola, ibat ukpepn̄kpọ Bible emi mme asuanetop ẹkenịmde ama ọdọk oto ke 190 esịm 260 ndien ibat mme andidụk mbonoesop ẹwak utịm ikaba oto ke 180 esịm 360 ke n̄kpasịp ọfiọn̄ inan̄ ke ẹma ẹketọn̄ọ ndikama n̄wed Ifiọk ke ikpehe oro. Esisịt ini ke oro ebede, ama oyom ẹsiak esop efen.
14 Ke ama ọkọtọn̄ọ akpa ukpepn̄kpọ esie ke n̄wed Ifiọk, eyenete kiet ama ọdọhọ ke edinịm ukpepn̄kpọ ke enye “emem edieke enịm ukpepn̄kpọ obụpde mme mbụme kpọt, okot mme itien̄wed Abasi oro ẹnyenede ebuana, onyụn̄ okụtde ete ke an̄wan̄a eyen ukpepn̄kpọ.” Okposụkedi enye ekekerede ete ke mme asuanetop oro ẹtịmde ẹdot kpọt ẹkeme ndinịm mme ukpepn̄kpọ Bible oro ẹnyenede uforo ndien ke imọ tutu amama ikpekemeke ndinam oro, enye edifiọk ke imọ imekeme, ọdọhọde ete: “Edieke n̄kemede, owo ekededi ekeme.”
15 Edi ke ndinịm mme ukpepn̄kpọ Bible nte ubak utom ukwọrọikọ nnyịn ke nnyịn iyọhọ uduak edinam mbet. Mbon ẹmi ẹforide ukeme edibuana ke ikpehe utom ukwọrọikọ emi ẹkụt ke enye enen̄ede ọnọ uyụhọ onyụn̄ enen̄ede akama utịp. Akpakam ẹtịn̄ ẹban̄a nnyịn ẹte ke nnyịn n̄ko ‘imọkwọrọ Obio Ubọn̄ Abasi, . . . inyụn̄ ikpep mme owo iban̄a Jesus Christ an̄wan̄wa.’—Utom 28:31.