Wụt Ukpono nọ Itie Utuakibuot Jehovah
1 Ke ini nnyịn ikade esen ke ufọk owo, nnyịn imesiwụt ukpono inọ inyene owo oro, inamke n̄kpọ ekededi ndibiat enye, nnyịn isinyụn̄ itịmekede edinam ofụri ini ufọk oro. Emi ekpetetịm edi akpanikọ didie ntem ke ini ikade isen inọ Jehovah! Oyom nnyịn ifiọk nte ikpodude uwem ke ufọk esie. (Ps. 15:1; 1 Tim. 3:15) Edide ẹnịm mbonoesop Christian nnyịn ke Ufọkmbono Obio Ubọn̄, ufọk owo, m̀mê itie ofụri owo, ata ediwak ke otu nnyịn imesiwụt ukpono kpukpru ini inọ itie utuakibuot nnyịn nte n̄kpọ emi enye edide ufọk Jehovah, emi “ubọn̄ esie emenede akan isọn̄ ye enyọn̄.”—Ps. 148:13.
2 Ndusụk nditọete ẹsiwụt unana ukpono ke mme mbonoesop ebe ke ndinam uyom m̀mê ndinam nte ke ntọt oro ẹnọde idịghe akpan n̄kpọ. Ibat ibat ikpọ owo ẹsineme nneme oro mînyeneke ufọn ke enyịnusụn̄, etehe, itie uka ikọt, m̀mê ke an̄wa Ufọkmbono Obio Ubọn̄ ke adan̄aemi mbonoesop akade iso. Ke ini ẹyakde akamba eyen ese ekpri eyen enyịn, ndusụk ini mmọ mbiba ẹsitọn̄ọ ndibre mbre inyụn̄ ibọhọ ufọn ito ndutịm. Ẹsikụt ndusụk uyen ke an̄wa Ufọkmbono Obio Ubọn̄ ke mme mbonoesop ẹma ẹkesuana, ẹbrede mbre, ẹnamde uyom ebe ubọk, idem ẹnamde nte ẹbre karet ye kiet eken. Ke ndusụk idaha mmọ ẹsifịna mme mbọhọidụn̄ m̀mê ẹbiọn̄ọ n̄kpọisan̄ ke itie ubon n̄kpọisan̄ m̀mê ke efak.
3 Nte Ẹkpefepde Unana Ukpono: Ke ifiọkde ukpono ye edisana idaha oro utuakibuot nnyịn enyenede, nte eyịghe mîdụhe nnyịn idiyomke ndiwọn̄ọde ntịn̄enyịn mbon en̄wen ebe ke ndidọn̄ odu, ndidia udia, ndita chewing gum, ndifụt babru, ndika itie uka ikọt nte mîdotke, m̀mê ndinyene mbumehe edidi mme mbonoesop ke idiọk ini. Mme ete ye eka oro ẹwụtde ukpono ye esịtekọm isiyakke nditọ mmọ ẹdehe isọn̄ufọk, mme n̄kpọitie, m̀mê mme ibibene Ufọkmbono Obio Ubọn̄ m̀mê ufọk oro ẹnịmde ukpepn̄kpọ n̄wed. Nte eyịghe mîdụhe kpukpru nnyịn imenyịme ite ke ufan̄ idụhe inọ ndek ndek edu, ndisịme ikọ, m̀mê ikọ idiọk mbubru ekededi ke mbonoesop nnyịn.—Eph. 5:4.
4 Edieke nnyịn kpukpru ini isitide uduak mbonoesop Christian nnyịn, nnyịn iyokụt ite ke nnyịn ye nditọ nnyịn imowụt ukpono inọ utuakibuot Jehovah ke ebiet emi nnyịn ‘imekde ndida.’—Ps. 84:10.