“Ẹben̄e Idem ke Kpukpru Nde Ndinam Eti Utom Ekededi”
1 Ẹda akpakịp udia eke spirit ẹdiọn̄ ikọt Jehovah mfịn. (Isa. 25:6) Ekese ibuot nneme N̄wed Abasi ẹdu ndidara ebe ke ukpepn̄kpọ idemowo ye eke ubon ye ke mme mbono esop, n̄kpri mbono, ye ikpọ mbono. Edi nte nnyịn ke ibọ ọyọhọ ufọn ito mmọ ẹmi ye uduak ‘edinyene ọyọhọ ifiọk, nnyụn̄ mben̄e idem ke kpukpru nde ndinam eti utom ekededi’?—2 Tim. 3:17.
2 Kam kere ban̄a ndutịm udia eke spirit eke isua 1998, emi mbahade iba ama ekebe! Ebede ke mme mbono esop eke urua ke urua, nnyịn ke ineme ndusụk akpan n̄kpọ ke n̄wed 23 eke N̄wed Abasi Christian Usem Greek, idụn̄ọde mme ntọt ẹmi ẹdude ke Me Ibuot-ikö Bible Ndida Nyene Neme, inyụn̄ ineme mme ibuotikọ oro ẹsatde-sat ẹto magazine Enyọn̄-Ukpeme 1996. Nnyịn n̄ko ke ineme mbahade ita ke n̄wed Ifiọk, se ikperede ndidi ofụri n̄wed Inemesịt Ubon, ye ofụri n̄wed Inemesịt. Ke adianade do, ke ẹbọk nnyịn ke nsiondi Utom Obio Ubọn̄ Nnyịn 12, ibuotikọ ukpepn̄kpọ Enyọn̄-Ukpeme 52, ye se ikperede ukem ibat utịn̄ikọ an̄wa oro ke mme nsio nsio ibuot nneme Bible. Mme isek isek ndutịm ikpọ ye n̄kpri mbono ẹdiana ye kpukpru ẹmi. Nso akpakịp nti n̄kpọ eke spirit ke ẹnọ nnyịn ntem!
3 Wụt Esịtekọm nọ Mme Ndutịm Jehovah: Man ibọ ufọn ọyọhọ ọyọhọ, oyom nnyịn idiọn̄ọ ntak emi Jehovah ọnọde ekese n̄kpọ eke spirit ntre. Ndidia nti n̄kpọ ẹmi ọbọp mbuọtidem nnyịn onyụn̄ ọsọn̄ọ itie ebuana nnyịn ye enye. (1 Tim. 4:6) Nte ededi, owo inamke udia eke spirit odu kaban̄a ubọ ukpep nnyịn kpọt. Enye onụk nnyịn ndibuana akpanikọ ye mbon efen onyụn̄ etịm nnyịn idem ndikụt unen ke ndinam ntre nte mme ọkwọrọ gospel.—2 Tim. 4:5.
4 Ẹyak nnyịn ikûfụmi mme udọn̄ eke spirit nnyịn, edi ika iso ikọri udọn̄ kaban̄a isek isek ye ọnọ-uyụhọ ndutịm eke spirit oro ẹtode okpokoro Jehovah. (Matt. 5:3; 1 Pet. 2:2) Ndibọ ufọn ọyọhọ ọyọhọ oyom edisio ini oro ekemde nnịm nnọ mme utọ akpan n̄kpọ nte ukpepn̄kpọ Bible idemowo ye eke ubon ye edidụk mbono esop ofụri ini. (Eph. 5:15, 16) Mme akama-inemesịt utịp ke ndinam ntre edidu ke n̄kemuyo ye nsịnudọn̄ eke odudu spirit oro Paul ekewetde ọnọ mme anam-akpanikọ Christian Hebrew, nte ẹwetde ke Mme Hebrew 13:20, 21.